DAW 46
Hpa Majaw Apnawng Nna Hkalup Hkam Ging Ai Kun?
Yehowa hpe sha nawku na, prat hta shi a myit ra ai lam hpe shawng tawn na ngu akyu hpyi ga sadi jaw ai hku nna, na hkum nang Yehowa kaw apnawng ai. (Shakawn 40:8) Dai hpang nang hkalup hkam ai. Dai hku galaw ai hku nna, na a apnawng ai lam hpe kaga ni mu hkra madun ai re. Yehowa kaw tinang hkum tinang apnawng ai lam gaw, nang jahkrat wa ai dawdan lam ni kaw na ahkyak dik ai lam langai re. Dai zawn grai ahkyak nna prat hpe galai shai ya lu ai dawdan lam jahkrat na matu, nang hpe hpa gaw shadut ya ai kun?
1. Apnawng na matu marai langai hpe hpa gaw shadut ya ai kun?
Yehowa kaw apnawng na matu, tsawra myit gaw anhte hpe shadut ya ai. (1 Yawhan 4:10, 19) Chyum Laika hta anhte hpe ndai hku n-gun jaw da ai: “Na a Karai Kasang hpe, na a myit kraw lawang mahkra hte, na a myit masin mahkra hte, na a myit mang mahkra hte, na a n-gun lagaw mahkra hte, nang tsaw ra lu na ndai.” (Marku 12:30) Karai Kasang hpe tsawra ai lam anhte tsun ai hte sha n-ga, galaw ai lam hte mung madun ga ai. Marai lahkawng gaw shada da tsawra yang hkungran la ai zawn, Yehowa hpe tsawra ai myit gaw shi kaw apnawng nna hkalup hkam na matu shadut ya ai.
2. Hkalup hkam da ai Sakse Hkam ni gaw gara shaman chyeju ni lu na ngu Yehowa tsun da ai kun?
Nang hkalup hkam la yang, Yehowa a nta masha langai byin wa na re. Shi a tsawra myit hpe lam amyu myu hku nang hkam la lu nna, shi hte hku hkau lam mung, ya aten hta na grau nga wa na re. (Malahki 3:16-18 hpe hti u.) Yehowa gaw na a kawa langai zawn byin wa na, Yehowa hte mungkan ting na hpunau nauna kun dinghku hpe nang lu la na re. (Marku 10:29, 30 hpe hti u.) Raitim, hkalup garai n hkam shi yang nang galaw ra ai lam ni nga ai. Yehowa a lam sharin la ra ai. Shi hpe tsawra ra ai. Shi a kasha hpe kamsham ra ai. Dai hpang, na a prat hpe Yehowa kaw apnawng ra ai. Dai lam ni hpe galaw nna hkalup hkam la yang, htani htana ngwi pyaw lu ai prat hkrun lam hta nang hkawm sa lu na re. Karai a Mungga hta ndai hku tsun da ai: “Ya e baptisma ngu ai kumla gaw, nanhte hpe hkye hkrang la lu nga ai.”—1 Petru 3:21.
Kahtap Hkaja
Yehowa kaw apnawng nna hkalup hkam ai gaw, hpa majaw grai ahkyak ai hpe hkaja yu ga.
3. Kadai hpe nawku na hpe anhte yawng lata ra
Moi Israela prat hta masha nkau gaw Yehowa hpe mung, shut shai ai hpara Bala hpe mung, kalang ta nawku mai ai ngu sawn la ma ai. Raitim, Yehowa gaw dai shut ai lam hpe sharai ya na matu myihtoi Elia hpe shangun dat ai. 1 Hkawhkam 18:21 hpe hti nna, ndai ga san hpe bawngban u:
Gara lam hpe Israela ni lata ra wa ai kun?
Israela ni zawn anhte mung, kadai hpe nawku na hpe lata ra ai. Luka 16:13 hpe hti nna, ndai ga san ni hpe bawngban u:
Yehowa hte marai langai ngai (sh) kaga lama ma hpe hpa majaw rau n mai nawku ai kun?
Yehowa hpe nawku na matu lata ai hpe anhte gara hku madun lu na kun?
4. Yehowa a tsawra myit hpe myit sawn sumru u
Yehowa gaw anhte hpe manu dan ai kumhpa law law jaw da ai. Shi hpe anhte hpa jaw lu ai kun? VIDEO hpe hpaw.
Gara lam ni hku nna Yehowa nang hpe tsawra ai lam madun ai kun? Shakawn 104:14, 15 hte 1 Yawhan 4:9, 10 hpe hti nna, ndai ga san ni hpe bawngban u:
Yehowa nang hpe jaw da ai kumhpa ni kaw na gara a matu grau chyeju dum ai kun?
Dai kumhpa ni jaw da ai majaw shi hte seng nna nang gara hku hkamsha ai kun?
Anhte ra sharawng ai kumhpa lu la ai shaloi, dai kumhpa jaw ai wa hpe chyeju dum ai lam madun mayu na re. Tara Jahprang 16:17 hpe hti nna, ndai ga san hpe bawngban u:
Yehowa nang hpe galaw ya wa ai lam yawng hpe myit ai shaloi, shi hpe hpa bai galaw ya mayu wa ai kun?
5. Apnawng ai gaw shaman chyeju law law lu shangun
Mying gumhkawng ai, bungli kaja ai, gumhpraw lu ai gaw, ngwi pyaw lam jaw ai ngu masha law law kam ma ai. Dai gaw teng ai kun? VIDEO hpe hpaw, dai hpang ndai ga san ni hpe bawngban u.
Ndai video hta lawm ai ginsup ninghkrin wa gaw, gawdin ginsup ai hpe ra sharawng tim, dai bungli hpe hpa majaw kau da wa ai kun?
Shi gaw gawdin hpe n re ai sha, Yehowa kaw apnawng na matu dawdan wa ai. Shi a dawdan lam gaw jaw ai ngu nang shadu ai kun? Hpa majaw kun?
Kasa Pawlu gaw Hkristan garai n byin shi yang, grai kaja ai bungli hpe galaw nga ai. Mying gumhkawng ai sara kaw, Yuda tara hpe shi hkaja wa ai. Raitim, Hkristan langai byin na matu dai ni hpe shi kau da wa ai. Pawlu myit malai lu wa ai kun? Hpilipi 3:8-9 hpe hti nna, ndai ga san ni hpe bawngban u:
Pawlu gaw Hkristan garai n byin shi yang tawn kau da ai lam ni hpe, akyu n nga ai lam ni (sh) maza ni hku nna hpa majaw mu wa ai kun?
Shi hpa hpe amyat lu wa ai kun?
Yehowa a magam gun ai hte prat hta kaga lam galaw ai hpe shingdaw lu ai kun?
Pawlu gaw Hkristan byin wa ai shaloi, shi asum hkam kau ai hta grau nna lu wa
Nkau Mi Tsun Ai: “Na a prat hpe Karai Kasang kaw apnawng ai ngu ai gaw lachyum nan n nga ai.”
Yehowa kaw na hkum nang apnawng ai gaw lachyum nga ai ngu hpa majaw shadu ai kun?
Kadun Dawk
Tsawra myit gaw Yehowa kaw tinang hkum tinang apnawng nna hkalup hkam na matu shadut ya ai.
Bai Maram
Anhte a myit masin mahkra hte tsawra ai lam hte nawku dawjau ai lam hpe Yehowa hpa majaw lu ging ai kun?
Hkalup hkam da ai Sakse Hkam ni hpe Yehowa gara hku shaman chyeju jaw ai kun?
Yehowa kaw tinang hkum tinang apnawng mayu ai kun?
Sawk Sagawn
Yungwi ninghkrin hte ginsup ninghkrin gaw tinang hkum tinang Yehowa kaw apnawng na matu hpa majaw lata wa ai hpe yu yu u.
Ramma Ni A Ga San—Prat Hpe Gara Hku Akyu Jashawn Na?—Lai Wa Sai Aten Hpe Bai Maram (6:54)
Hpa majaw apnawng ging ai hte seng nna kahtap hkaja yu u.
“Hpa Majaw Yehowa Kaw Tinang Hkum Tinang Apnawng Ai Kun?” (Sin Langchyi, January 15, 2010)
Ndai yungwi video hta Yehowa kaw tinang hkum tinang apnawng ai ni a ngwi pyaw lam hpe yu yu u.
“Anhte Hpa Majaw Ndai Mungkan Hta Nga Taw Ai Kun? Ngu Ai Hpe Chye Mayu Ai Grai Na Sai” ngu ai labau hta, ahkyak ai lam hpe ginhka chye hkra num langai hpe hpa gaw shadut ya wa ai hpe hti yu u.
“Chyum Laika Gaw Prat Hpe Galai Shai Ya” (Sin Langchyi, November 1, 2012)