DAW 34
Yehowa Hpe Tsawra Ai Lam Gara Hku Madun Mai Ai Kun?
Chyum Laika hkaja hpang ai aten kaw nna, Karai Kasang hte grau nihtep wa ai ngu hkamsha ai kun? Shi hte hku hkau lam matut ngangkang hkra galaw mayu ai kun? Rai yang, ndai hpe dum u. Yehowa hpe nang tsawra wa ai hpe shi mu ai shaloi, nang hpe mung grau tsawra wa nna, grau lanu lahku na re. Shi hpe tsawra ai lam nang gara hku madun na kun?
1. Yehowa hpe tsawra ai lam gara hku madun na kun?
Anhte gaw, Yehowa a ga madat ai hku nna, shi hpe tsawra ai lam madun ai. (1 Yawhan 5:3 hpe hti u.) Shi a ga madat na matu, kadai hpe mung atik anang n shadut ai. De a malai, shi a ga madat na kun? n madat na kun? ngu ai hpe lata na matu, anhte langai hpra hpe ahkaw ahkang jaw da ai. Hpa majaw kun? Yehowa gaw, “sharawng ai myit hte madat mara” ai hpe ra sharawng ai majaw re. (Roma 6:17) Tsun mayu ai gaw, lit nga ai majaw n re ai sha, shi hpe tsawra ai majaw, madat mara ai hpe shi ra sharawng ai. Ndai Laika buk a Daw Kaba 3 hte 4 gaw, Yehowa ra sharawng ai hpe galaw nna, shi n ra sharawng ai hpe koi ai hku nna, shi hpe tsawra ai lam gara hku madun lu na hpe chye hkra lajang da ya ai.
2. Yehowa hpe tsawra ai lam madun na matu hpa majaw yak chye ai kun?
“Ding man ai wa gaw ru tsang law law hkrum” nga ai. (Shakawn 34:19) Anhte yawng gaw, n hkum tsup ai lam ni hpe gasat nga ra ai. Ja gumhpraw mayak mahkak ni, n tara ai lam ni hte kaga mayak mahkak ni hpe mung anhte hkrum chye ai. Anhte mayak mahkak hkrum ai shaloi, Yehowa hpyi shawn da ai hpe galaw na matu yak chye ai. Dai majaw, shut ai lam de du na matu loi mat ai. Yehowa hpyi shawn da ai lam ni hpe sadi dung let nang galaw ai nga yang, kaga lam ni yawng hta na shi hpe grau tsawra ai lam madun ai re. Nang gaw dinghpring ai nga yang, shi hpe sadi dung ai lam madun ai re.—Shakawn 4:3 hpe hti u.
Kahtap Hkaja
Yehowa hpe nang hpa majaw madat mara ai, shi hpe matut sadi dung lu hkra hpa gaw karum ya lu ai hpe hkaja yu ga.
3. Ndai ahkyak ai lam hta nang mung lawm
Yoba laika hku nga yang, Satan mara shagun ai gaw Yoba langai hpe sha n re. Yehowa hpe nawku mayu ai masha yawng mung lawm ai. Yoba 1:1; 1:6–2:10 hpe hti nna, ndai ga san ni hpe bawngban u:
Yehowa a ga hpe Yoba madat ai gaw hpa majaw re ai ngu Satan tsun ai kun?—Yoba 1:9-11 hpe yu u.
Satan gaw nang hte hpawn masha yawng hpe hpa tsun ai kun?—Yoba 2:4 hpe yu u.
Yoba 27:5b hpe hti nna, ndai ga san hpe bawngban u:
Yehowa hpe tsawra ai lam Yoba gara hku sakse madun wa ai kun?
Yoba gaw Yehowa hpe tsawra ai lam matut sadi dung ai hku nna madun
Anhte mung Yehowa hpe tsawra ai lam matut sadi dung ai hku nna madun
4. Yehowa a myit shapyaw ya u
Ga Shagawp 27:11 hpe hti nna, ndai ga san ni hpe bawngban u:
Nang hpaji rawng nna madat mara ai lam madun yang, Yehowa gara hku hkamsha ai kun? Hpa majaw kun?
5. Yehowa hpe nang sadi dung lu
Yehowa hpe tsawra ai myit gaw kaga ni hpe shi a lam tsun dan na matu shadut ya ai. Shi hpe sadi dung ai myit gaw, galaw na matu yak ai aten hta pyi galaw lu hkra karum ya ai. VIDEO hpe hpaw nna, lawu na ga san ni hpe bawngban u.
Yehowa a lam kaga ni hpe tsun dan na matu nang yak nga ai kun?
Ndai video hta hkrit ai myit hpe tawt lai lu hkra Gresan hpe hpa gaw karum ya wa ai kun?
Yehowa tsawra ai hpe tsawra nna, shi nju ndawng ai hpe nju ndawng ai nga yang, shi hpe sadi dung na matu grau loi wa na re. Shakawn 97:10 hpe hti nna, ndai ga san ni hpe bawngban u:
Anhte chye wa sai hte maren Yehowa tsawra ai lam nkau gaw hpa rai kun? Shi nju ndawng ai lam nkau gaw hpa rai kun?
Kaja ai hpe tsawra nna nhkru ai hpe nju ndawng na matu, gara hku sharin la mai ai kun?
6. Yehowa hpe madat mara na nga yang akyu lu
Yehowa a ga madat ai gaw, galoi mung kaja htum re. Esaia 48:17, 18 hpe hti nna, ndai ga san ni hpe bawngban u:
Anhte a matu kaja htum hpe Yehowa ayan na chye ai hpe kam mai ai ngu nang shadu ai kun? Hpa majaw kun?
Ya du hkra nang hkaja wa ai Chyum Laika lam hte, tengman ai Karai Kasang Yehowa a lam gaw nang hpe gara hku akyu jaw ai kun?
Nkau Mi Tsun Ai: “Ngai galaw ai lam hpe Karai Kasang hpa zawn n nawn ai.”
Anhte a galaw ai lam ni gaw Yehowa hpe pyaw shangun ai zawn, yawn shangun lu ai hpe madun na matu, gara Chyum daw hte nang tsun dan na kun?
Kadun Dawk
Yakhkak ai lam ni nga tim Yehowa a ga madat ai, matut sadi dung ai hku nna shi hpe tsawra ai lam madun mai ai.
Bai Maram
Yoba a kasi ningli kaw na hpa sharin la lu ai kun?
Yehowa hpe tsawra ai lam gara hku madun mai na kun?
Yehowa hpe matut sadi dung lu na matu hpa gaw karum ya lu ai kun?
Sawk Sagawn
Yehowa hte nawku hpung hpe gara hku sadi dung mai ai lam hpe hkaja yu u.
Shinggyim masha ni hpe Satan gara hku mara tam nga ai lam kahtap hkaja yu u.
“Yoba Matut Sadi Dung” (Chyum Laika Hta Gara Shiga Ni Lawm Ai Kun? daw 6)
Asak kaji ai ni pyi, Yehowa hpe tsawra ai lam gara hku madun lu ai hpe yu yu u.
Ramma shada a shadut hkrum nga ai ramma langai gaw, Karai Kasang hpe gara hku sadi dung lu ai kun?