Poi Yawng Hpe Karai Kasang Ra Sharawng Ai Kun?

Yehowa gaw anhte hpe ngwi pyaw lam lu shangun mayu nna, kalang lang poi galaw shangun mayu ai. Raitim, poi lamang ni hte poi nhtoi yawng hpe shi ra sharawng ai kun? Ndai lam hta Yehowa hpe tsawra ai lam anhte gara hku madun mai ai kun?

1. Poi law law hpe Yehowa hpa majaw n ra sharawng ai kun?

Poi law law gaw, Chyum Laika sharin ya ai lam hte nhtan shai ai, shut shai ai nawku htung kaw na hpang wa ai hpe nang chye yang mau na re. Dai poi ni gaw, nat hpaji hte matut mahkai nga ai, wenyi gaw n si lu ai ngu ai lam ni kaw na yu hkrat wa chye ai. Nkau poi ni gaw, shingra tara hta jan ai lam (sh) gam maka makam masham kaw na yu hkrat wa ai. (Esaia 65:11) Yehowa gaw shi a masha ni hpe ndai hku sadi jaw da ai: “Kaga lak lak rai wa mu, . . . Awu asin re ai hpe hkum hkra mu.”​—2 Korinhtu 6:17.a

2. Shinggyim masha ni hpe shajan shalai shagrau ai poi ni hpe Yehowa gara hku hkamsha ai kun?

“Shinggyim masha hta shamyet shanat” ai lam n galaw na matu Yehowa anhte hpe sadi jaw da ai. (Yeremia 17:5 hpe hti u.) Poi nhtoi nkau gaw, uphkang du ni, hpyen la ni hpe shagrau ma ai. Nkau gaw, amyu sha masat dingsat hte seng ai poi ni, shanglawt lu ai nhtoi ni hta poi ni galaw ma ai. (1 Yawhan 5:21) Nkau gaw, mung masa lam (sh) shawa masha hte seng ai uhpung uhpawng hpe n-gun jaw ai. Yehowa a yaw shada lam hte nhtan shai ai lam ni hpe n-gun jaw ai marai langai hpe (sh) uhpung hpe anhte ladu lai shagrau ai nga yang shi gara hku hkamsha na kun?

3. Poi ni galaw ai shaloi gara zawn lailen ni hpe n mai hkap la ai kun?

“Tsabyi lu lai ai, tangpyaw shalai ai, lu sha marin ai” lam ni hpe Chyum Laika hta hkum pat da ai. (1 Petru 4:3) Poi nkau mi hta masha ni gaw, tinang hkum tinang n hkang lu ai lailen ni, akyang hten ai lailen ni hpe galaw ma ai. Yehowa a jinghku matut byin na matu, dai zawn n san seng ai lailen ni hpe koi ra ai.

Kahtap Hkaja

4. Yehowa hpe n shagrau ai poi ni hpe nyet kau u

Ehpesu 5:9 hpe hti nna, ndai ga san ni hpe bawngban u:

• Poi galaw na, n galaw na hte seng nna dawdan ai shaloi hpa hpe chye ra ai kun?

• Na a buga hta gara poi ni galaw ma ai kun?

• Dai poi ni hpe Yehowa ra sharawng ai ngu nang shadu ai kun?

Ga shadawn, shangai poi hte seng nna Karai Kasang gara hku mu mada ai hpe nang myit ga ai kun? Yehowa hpe nawku ai ni gaw, shangai poi galaw ai ngu tsun da ai lam Chyum Laika hta n mu lu ai. Raitim, Yehowa hpe n nawku ai marai lahkawng shangai poi galaw ai hpe gaw ka shalawm da ai. Ningpawt 40:​20-22 hte Mahte 14:​6-10 hti u. Dai hpang ndai ga san ni hpe bawngban u:

• Dai shangai poi lahkawng hta hpa byin wa ai kun?

• Ndai Chyum Laika labau hpe yu yang, shangai poi galaw ai hte seng nna Yehowa gara hku hkamsha na ngu nang shadu ai kun?

‘Shangai poi (sh) Chyum Laika hte nhtan shai ai poi hta ngai shang lawm ai gaw Yehowa a matu ahkyak ai kun?’ ngu nna nang myit yang myit nga na re. Pru Mat 32:​1-8 hpe hti u. Dai hpang, VIDEO hpe hpaw nna ndai ga san ni hpe bawngban u.

VIDEO: Yehowa N Ra Sharawng Ai Poi Ni (5:07)

• Yehowa hkap la ai lam hpe hpa majaw chye hkra galaw ra ai kun?

• Gara hku galaw lu ai kun?

Karai Kasang n ra sharawng ai poi ni hpe chye lu ai lam

• Ndai poi gaw Chyum Laika sharin achyin ai hte nhtan shai ai lam ni kaw na yu hkrat wa ai kun? Gara kaw na hpang wa ai hpe chye hkra galaw u.

• Dai poi gaw shinggyim masha ni, uhpung uhpawng ni, amyu sha hte seng ai masat dingsat ni hpe shajan shalai shagrau nga ai kun? Yawng mayawng hta na Yehowa hpe sha anhte shagrau ai. Mungkan a manghkang ni hpe hparan ya na matu shi hpe sha kamhpa ai.

• Dai poi a htung lailen ni gaw Chyum Laika a tsang madang ni hte nhtan shai nga ai kun? Anhte gaw akyang lailen matut san seng ra ai.

5. Tinang a makam masham hpe kaga ni hkungga wa hkra galaw u

VIDEO: Makam Masham Hpe Hpaji Rawng Ai Hku Sanglang Dan U (2:01)

Mahte 7:12 hpe hti nna, ndai ga san ni hpe bawngban u:

• Ndai Chyum daw hku nga yang, makam masham n bung ai nta masha ni hpe ndai poi n galaw ging ai ngu mai tsun ai kun?

• Nta masha ni hte rau poi lamang hta n shang lawm tim, shanhte hpe tsawra ai lam, manu shadan ai lam nang gara hku madun mai na kun?

6. Yehowa anhte hpe pyaw shangun mayu

Yehowa gaw anhte hpe nta masha, manang ni hte rau ngwi pyaw shangun mayu ai. Hpaji 8:15 hpe hti nna, ndai ga san hpe bawngban u:

• Yehowa gaw anhte hpe pyaw shangun mayu ai lam ndai Chyum daw gaw gara hku madun ai kun?

Yehowa gaw shi a amyu masha ni hpe rau ngwi pyaw shangun mayu ai. Mungdan ga daga zuphpawng ni hta gara hku ngwi pyaw nga ai hpe chye na matu, VIDEO hpe hpaw.

VIDEO: Mungdan Ga Daga Zuphpawng Ni Hta Manam Daw Ai Lam Madun (5:40)

Galati 6:10 hpe hti nna, ndai ga san ni hpe bawngban u:

• Kaga ni hpe “mai kaja ai” lam madun na matu poi galaw ra ai kun?

• Poi nhtoi ni hta jaw ra ai lit nga ai majaw kumhpa jaw ai hte jaw mayu ai shaloi jaw ai hta, gara gaw nang hpe grau pyaw shangun na kun?

• Sakse Hkam law law gaw, shanhte a kasha ni a matu kalang lang kanawn mazum poi ni galaw ya nna kumhpa ni pyi jaw ma ai? Nang hta ma ni nga yang, shanhte a matu laksan hku na hpa ni galaw ya lu ai kun?

Kadun Dawk

Yehowa gaw anhte hpe nta masha ni, manang ni hte rau ngwi pyaw shangun mayu ai. Raitim, shi n ra sharawng ai poi ni galaw ai hpe gaw koi shangun mayu ai.

Bai Maram

• Yehowa n ra sharawng ai poi hpe galaw na, n galaw na hte seng nna nang gara hku dawdan lu na kun?

• Poi ni hte seng ai na a dawdan lam hpe nta masha, manang ni chye na hkra gara hku tsun dan mai na kun?

• Yehowa gaw anhte hpe ngwi pyaw shangun mayu ai lam gara hku chye lu ai kun?

Sawk Sagawn

Hkristan ni n galaw ai poi nkau mi a lam hpe hti yu u.

“Yehowa Sakse Ni Gaw Poi Law Malawng Hpe Hpa Majaw N Galaw Ma Ai Kun?” (Web sumhpa)

Shangai poi galaw ai hpe, Karai Kasang hpa majaw n ra sharawng ai hte seng nna sanglang da ai lam 4 hpe hti yu u.

“Yehowa Sakse Ni Gaw Shangai Poi Hpa Majaw N Galaw Ai Kun?” (Web sumhpa)

Yehowa hpe tsawra ai ma ni gaw poi nhtoi ni laman shi hpe gara hku myit pyaw shangun lu ai lam yu yu u.

Jahpoi Asawng Ai Hpe Hpaji Rawng Ai Hku Hparan (2:04)

Wan hku law ai Hkristan ni gaw, Hkrismat poi n galaw na matu dawdan ma ai. Dai hte seng nna shanhte gara hku hkamsha ai kun?

“Grau Kaja Ai Hpe Shanhte Tam Mu Wa” (Sin Langchyi, December 1, 2012)