DAW 45

Lapran Nga Ai A Lachyum

Dip Shapraw Ai Hkrang

Yesu gaw shi hpang hkan ai ni hpe, “mungkan ga hte seng ai ni n rai” na matu tsun da ai. (Yawhan 15:19) Dai hta lapran nga ai lam lawm ai. Mungkan a mung masa lam ni, majan ni hta n shang lawm ai hpe tsun mayu ai re. Tatut hta lapran nga na matu n loi ai. Jahpoi asawng hkrum chye ai. Gara hku matut lapran nga lu nna, Karai Kasang Yehowa hpe sadi dung lu na kun?

1. Jet ai Hkristan ni gaw shinggyim asuya ni hpe gara hku mu mada ai kun?

Hkristan ni gaw asuya hpe hkungga ai. “Kehta hte seng ai hpe gaw, Kehta hpe ya mu” ngu Yesu htet da ai ga hpe anhte hkan sa ai. Dai hta, hkansi jaw na matu hpyi shawn da ai lam ni zawn re ai, mungdan a tara ni hpe hkan sa ai. (Marku 12:17) Shinggyim asuya ni uphkang nga ai gaw, Yehowa ahkang jaw da ai majaw sha re ngu Chyum Laika hta tsun da ai. (Roma 13:1) Dai majaw, shinggyim asuya ni hta shadawn sharam sha ahkaw ahkang nga ai hpe anhte chye ai. Shinggyim masha ni a manghkang ni hpe hparan ya na matu, Karai Kasang hte shi a sumsing mungdan hpe sha anhte myit mada ai.

2. Anhte lapran nga ai hpe gara hku madun mai na kun?

Yesu zawn anhte mung, mung masa lam ni hta n lawm ai. Masha ni gaw, Yesu mauhpa amu galaw ai hpe mu ai shaloi, shi hpe hkawhkam aya tang na matu shakut ma ai. Raitim, shi n hkap la ai. (Yawhan 6:15) Hpa majaw kun? “Nye a mungdan gaw ndai mungkan ga na n rai li ai” ngu hpang hta shi tsun wa ai. (Yawhan 18:36) Yesu a sape ni hku nna anhte mung, lapran nga ai hpe lam amyu myu hku nna madun ai. Ga shadawn, anhte majan hta n lawm ai. (Mihka 4:3 hpe hti u.) Dawnghkawn zawn re ai amyu sha masat dingsat ni hpe anhte hkungga ai. Raitim, hkungga jaw ai lam n galaw ai. (1 Yawhan 5:21) Anhte gaw, mung masa pati ni, shanglawm shingjawng ai ni hpe madi shadaw ai lam n galaw ai zawn, ninghkap ai lam mung n galaw ai. Dai lam ni hte kaga lam ni hku nna, Karai a asuya re ai shi a Mungdan hpe sadi dung ai lam anhte madun ai.

Kahtap Hkaja

Lapran nga na matu yak shangun chye ai masa lam ni hte Yehowa a myit shapyaw ya lu ai dawdan lam ni gara hku jahkrat mai ai hpe hkaja yu ga.

Hpunau gaw matut lapran nga. Mung masa galaw ai ni gaw shawa hpawng hpe ga shaga nga ai shaloi shi myit maju n jung.

3. Jet ai Hkristan ni gaw lapran nga

Yesu hte shi hpang hkan ai ni gaw, anhte a matu kasi ningli madun wa ai. Roma 13:1, 5-7 hte 1 Petru 2:13, 14 hpe hti u. Dai hpang, VIDEO hpe hpaw nna, ndai ga san ni hpe bawngban u.

VIDEO: Jet Ai Hkristan Ni Gaw Lapran Nga—Daw 1 (4:28)

Shinggyim asuya ni hpe hpa majaw hkungga ging ai kun?
Shanhte hpe npu taw ai lam madun lu ai lam nkau mi gaw hpa ni rai kun?

Majan byin nga ai aten hta mungdan nkau mi gaw lapran nga ai ngu tsun tim, gasat hkat ai lahkawng maga hpe madi shadaw ya ai. Dai gaw lapran nga ai rai kun? Yawhan 17:16 hpe hti u. Dai hpang, VIDEO hpe hpaw nna, ndai ga san hpe bawngban u.

VIDEO: Jet Ai Hkristan Ni Gaw Lapran Nga—Daw 2 (3:11)

Lapran nga ai a lachyum gaw hpa rai kun?

Karai a tara hte nhtan shai ai lama ma hpe galaw na matu asuya ni hpyi shawn wa yang gaw gara hku rai kun? Kasa 5:28, 29 hpe hti u. Dai hpang, VIDEO hpe hpaw nna, ndai ga san ni hpe bawngban u.

VIDEO: Jet Ai Hkristan Ni Gaw Lapran Nga—Daw 3 (1:18)

Karai a tara hte shinggyim masha ni a tara nhtan shai wa yang, kade a tara hpe hkan sa ging ai kun?
Gara masa ni hta Hkristan ni gaw asuya ni a ga hpe n madat ai kun?

4. Myit mang lam hte galaw ai lam hta lapran nga u

1 Yawhan 5:21 hpe hti u. Dai hpang, VIDEO hpe hpaw nna, ndai ga san ni hpe bawngban u.

VIDEO: Teng Man Ai Hkristan Ni Nden Marai Hpa Majaw Ra—Lapran Nga Na Matu (2:49)

Video hta Ayenge gaw mung masa pati hta n lawm na matu, dawnghkawn hpe hkungga jaw ai zawn re ai mung masa hte seng ai poi ni hta n lawm na matu hpa majaw dawdan wa ai kun?
Hpaji rawng ai hku dawdan wa ai ngu nang shadu ai kun?

Gara masa lam ni mung lapran nga na matu yak shangun chye ai kun? VIDEO hpe hpaw, dai hpang ndai ga san ni hpe bawngban u.

VIDEO: Sin Langchyi Kaw Na Sharin La Lu Ai Lam Ni—Dumbru Dumbra Byin Nga Ai Mungkan Hta Matut Lapran Nga U (5:16)

Mungdan shada ginsup shingjawng ai poi ni hta gara hku nna lapran nga lu na kun?
Mung masa hte seng ai dawdan lam ni gaw anhte hpe hkra machyi wa ai nga yang pyi, gara hku na matut lapran nga lu na kun?
Shiga ni, kanawn manang ni gaw anhte a lapran nga ai lam hpe gara hku yak shangun chye ai kun?

Sumla: 1. Masin pawt nga ai masha hpawng gaw masat kumla ni hpe lang da nna ninghkap nga. 2. La langai gaw ginsup poi hta dawnghkawn sharawt nna n-gun jaw nga. 3. Jawngma langai gaw mungdan mahkawn hkawn nga. 4. Hpyen la langai gaw sanat lang da. 5. Mung masa galaw ai marai lahkawng gaw shada da ga tsun shing jawng nga. 6. Num langai gaw sindan pa bang ai shara hta sa bang nga. — Gara masa lam ni hta Hkristan ni gaw myit ai lam, galaw ai lam hta matut lapran nga ra ai kun?

Nkau Mi San Chye Ai: “Hpa majaw dawnghkawn hpe hkungga n jaw ai (sh) mungdan mahkawn n hkawn ai kun?”

Nang gara hku tsun na?

Kadun Dawk

Hkristan ni gaw shanhte a myit mang ai lam, tsun ai lam, galaw ai lam ni hta lapran nga na matu shakut ra ai.

Bai Maram

Shinggyim asuya ni hte seng nna anhte hta gara lit nga ai kun?
Mung masa lam hta anhte hpa majaw lapran nga ai kun?
Lapran nga ai hpe gara masa ni gaw yak shangun chye ai kun?

Hkaja ngut ai nhtoi:

Bandung

Lapran nga ai hpe yak shangun chye ai masa lam hte, dai hpe gara hku hparan lu na lam hpe tau hkrau myit da na.

Kaga:

Kaga bandung

Sawk Sagawn

Matut lapran nga na matu gara sak jaw ai lam ni galaw ra chye ai kun?

Yehowa Galoi Mung Madi Shadaw Ya (3:14)

Dinghku ni gaw lapran nga ai hpe yak shangun chye ai masa lam ni a matu, gara hku hkyen lajang da mai ai kun?

Shawa Hpawng Lamang Ni Hta Lapran Tsap U (4:25)

Mungdan hpe makawp maga ya ai gaw masha langai a matu hpa majaw arawng la hpa n rai kun?

“Karai Kasang Gaw Yawng Mayawng Hpe Dang Di Lu” (5:19)

Bungli hte seng nna dawdan ra ai shaloi, mungkan ga hte seng ai ni n re ai hpe gara hku madun mai ai lam hti yu u.

“Masha Yawng Gaw Tinang A Lit Hpe Gun Hpai Ra Ai” (Sin Langchyi, March 15, 2006)