DAW 40
Karai A Man Hta Gara Hku San Seng Lu Na Kun?
Kasha hpe jawng sa hkyen nga ai tsawra myit rawng ai kanu langai hpe shingran yu u. Hka shin ngut sai kun? Hpun palawng ni san seng ai kun? ngu ai hpe shi yu ya ai. Dai gaw ma hpe hkam kaja lam nga shangun nna, ma hpe kanu kawa ni lanu lahku ya ai lam, kaga ni hpe madun nga ai re. Dai hte maren, tsawra myit nga ai Kawa Yehowa mung, hkum hkrang hte akyang lailen hpe san seng shangun mayu ai. Anhte san seng yang, anhte nan mung akyu lu nna, shi hpe mung shagrau lu na re.
1. Anhte gara hku san seng lu na kun?
“Nanhte mung chyoi pra nga myit ga” ngu Yehowa anhte hpe tsun ai. (1 Petru 1:16) Chyoi pra ai ngu ai gaw, hkum hkrang, akyang lailen san seng ai hte matut mahkai nga ai. Ayan hka shin ai, hpun palawng, nta, mawdaw, sengke ni hpe san seng hkra da ai hku nna, anhte san seng mai ai. Nawku Htingnu jasan jaseng ai hta mung, anhte karum ya lu ai. San seng hkra galaw ai hku nna, Yehowa hpe anhte shagrau ga ai.—2 Korinhtu 6:3, 4.
2. San seng na matu, gara lailen ni hpe koi ging ai kun?
“Hkum hkrang hte wenyi hpe awu asin di kau ai matsat shabat hta na tinang hkum hpe jasan jaseng kau” mu ngu Chyum Laika hta n-gun jaw da ai. (2 Korinhtu 7:1) Dai gaw, anhte a hkum hkrang hte myit masin hpe hkra machyi shangun ai gara lam hpe raitim, koi ging ai ngu ai lachyum re. Anhte a myit mang lam mung, Yehowa ra sharawng ai hte maren rai ra ai. Dai majaw, n htap htuk ai myit mang ai lam ni hpe dang lu ai daram nyet kau ai. (Shakawn 104:34) San seng ai ga ni hpe tsun na matu mung shakut ai.—Kolose 3:8 hpe hti u.
Gara lam ni gaw, hkum hkrang hte akyang lailen hpe n san seng mat shangun chye ai kun? Lam nkau mi gaw, anhte a hkum hkrang hpe awu asin byin shangun ai. Dai majaw, malut, gangze (sh) koka lap maya ai, nanghpam tsi zawn re ai lam ni hpe koi ga ai. Dai ni hpe koi yang, anhte grau hkam kaja wa nna asak kumhpa hpe mung manu shadan ai lam madun lu na re. Tinang hkrai ngang kayut shamai ai, nse nsa sumla yu ai zawn re ai n san seng ai lailen ni hpe gasat ai hku nna mung, akyang lailen san seng hkra anhte shakut ai. (Shakawn 119:37; Ehpesu 5:5) Dai lailen ni hpe tawt lai na matu yak chye ai. Raitim, awng dang lu hkra Yehowa karum ya lu ai.—Esaia 41:13 hpe hti u.
Kahtap Hkaja
Hkum hkrang san seng ai gaw Yehowa hpe gara hku shagrau lu ai, n san seng ai lailen ni hpe gara hku tawt lai lu ai hpe hkaja yu ga.
3. San seng ai gaw Yehowa hpe shagrau
Moi Israela ni hpe jaw ai Yehowa a tara ni hpe myit sawn sumru ai hku nna, san seng ai hte seng ai shi a ningmu hpe chye lu ai. Pru Mat 19:10 hte 30:17-19 hpe hti nna, ndai ga san ni hpe bawngban u:
Ndai Chyum daw ni gaw, san seng ai hte seng ai Yehowa a ningmu hte seng nna hpa madun dan ai kun?
Matut san seng lu hkra, gara zawn kaja ai lailen ni gaw nang hpe karum ya lu ai kun?
San seng na matu aten jaw ra nna, shakut shaja ra ai. Anhte gara kaw mi nga ai raitim, sut masa gara hku mi raitim, san seng lu ai. VIDEO hpe hpaw, dai hpang ndai ga san hpe bawngban u.
Anhte a arai ni hpe san seng hkra galaw da ai gaw, hkaw tsun bungli hta gara hku akyu shabyin ya lu ai kun?
4. N kaja ai lailen hpe awng dang
N kaja ai akyang lailen hpe awng dang hkra Yehowa karum ya lu
Hkayawm, nanghpam tsi ni lang ai nga yang, dai hpe dawm kau na matu yak ai hpe nang chye na re. Hpa gaw karum ya lu ai kun? Dai gaw nang hpe gara hku hkra machyi ai hpe myit yu u. Mahte 22:37-39 hpe hti u. Dai hpang, malut hte nanghpam tsi lang ai gaw, lawu na lam ni hta gara hku hkra machyi ai hpe bawngban u:
Yehowa hte hku hkau lam
Nta masha ni hte kaga ni hpe
N kaja ai akyang lailen hpe awng dang na matu, masing jahkrat u.a VIDEO hpe hpaw.
Hpilipi 4:13 hpe hti nna, ndai ga san hpe bawngban u:
Akyu hpyi ai, Chyum Laika hti ai, zuphpawng lung ai lam ni hpe ayan galaw ai gaw, n kaja ai akyang lailen hpe awng dang hkra, marai langai hpe gara hku karum ya lu ai kun?
5. N san seng ai myit mang ai lam ni, lailen ni hpe gasat
Kolose 3:5 hpe hti nna, ndai ga san ni hpe bawngban u:
Nse nsa sumla yu ai, sek-stinb galaw ai, tinang hkrai ngang kayut shamai ai lam ni gaw, Yehowa a man hta n san seng ai ngu anhte gara hku chye lu ai kun?
Akyang lailen san seng na matu Yehowa anhte hpe hpyi shawn ai gaw, rap ra ai ngu nang shadu ai kun? Hpa majaw kun?
N san seng ai myit mang ai lam hpe gara hku gasat lu na hpe yu u. VIDEO hpe hpaw.
Akyang lailen san seng na matu, shakut shaja let galaw ra ai hpe chye na matu, Yesu gaw ga shadawn langai hte tsun dan wa ai. Mahte 5:29, 30 hpe hti nna, ndai ga san hpe bawngban u:
Hkum hkrang hkra machyi hkra galaw na matu Yesu hpaji jaw nga ai n re. Shakut shaja galaw ra ai ngu tsun mayu ai re. N san seng ai myit mang lam ni hpe koi lu na matu, marai langai gaw gara zawn shakut shaja ai lam ni hpe galaw lu ai kun?c
N kaja ai myit mang lam ni hpe awng dang lu hkra, nang gasat taw ai nga yang, na a shakut shaja ai lam hpe Yehowa manu shadan ai. Shakawn 103:13, 14 hpe hti nna, ndai ga san hpe bawngban u:
N kaja ai akyang lailen hpe gasat taw ra ai nga yang, matut gasat lu hkra ndai Chyum daw gaw gara hku n-gun jaw ya lu ai kun?
Asum hkum jaw
‘Ngai hkrat sum mat sai. Asum jaw kau sana’ ngu aloi sha myit chye ai. Ndai lam hpe myit yu u. Gat shingjawng ai wa gaw ahtu kataw ai majaw, shingjawng poi hta sum mat ai mung n re ai zawn, nnan kaw na mung bai hpang ra na n re. Dai hte maren, hkrat sum mat ai gaw, n kaja ai akyang lailen hpe n tawt lai lu sai ngu tsun mayu ai n re. Nang rawt jat hkra galaw da ai lam ni mung, majoi byin mat sai ngu ai lachyum mung n re. Hkrat sum ai ngu ai gaw, byin chye ai. Asum hkum jaw! N kaja ai akyang lailen hpe Yehowa a karum shingtau lam hte nang awng dang lu ai.
Nkau Mi Tsun Ai: “Ngai tsa ya, kani ya byin nga sai. N lu dawn sai.”
N kaja ai akyang lailen hpe Yehowa a karum shingtau lam hte tawt lai lu ai ngu ai hpe, gara Chyum daw hte nang tsun dan na kun?
Kadun Dawk
Anhte a hkum hkrang, myit masin, akyang lailen hpe matut san seng hkra galaw ai hku nna Yehowa hpe myit shapyaw ya lu ai.
Bai Maram
San seng na matu hpa majaw grai ahkyak ai kun?
Hkum hkrang san seng hkra gara hku galaw mai na kun?
Na a myit mang ai lam ni hte akyang lailen matut san seng hkra gara hku galaw lu na kun?
Sawk Sagawn
N lusu tim pyi san seng hkra gara lam ni hpe galaw lu ai kun?
Hkayawm dawn kau lu hkra karum ya na, tatut re ai lam ni hpe hti yu u.
Nse nsa sumla yu ai majaw hkra machyi ai lam ni hpe hti yu u.
“Nse Nsa Sumla Yu Ai Gaw Shoihpa Nga Ai Kun? N Nga Ai Kun?” (Sin Langchyi, August 1, 2013)
Nse nsa sumla yu ai akyang hpe, la langai gara hku tawt lai lu ai hpe hti yu u.
“Chyahkring Hkring Hkrat Sum Tim, Hpang Jahtum Hta Awng Dang” (Sin Langchyi No. 4 2016)
a Ndai daw a Sawk Sagawn ngu ai hta lawm ai “Hkayawm Gara Hku Dawn Lu Na Kun” ngu ai hta gara hku dawn lu na lam hpe sanglang da ya ai.
b Sek-stin ngu ai gaw, ngang hte seng ai laika ni, sumla ni video ni hpe electronic jak rai hku na sa ya ai hpe tsun ai re.
c Tinang hkrai ngang kayut shamai ai akyang lailen hpe koi lu na matu, Ramma Ni A Ga San—Mahtai Ga, Volume 1 (BU), ngu ai laika buk a daw 25 hta lawm ai “Tinang Hkrai Ngang Kayut Shamai Ai Akyang Lailen Hpe Ngai Gara Hku Awng Dang Lu Na Kun?” ngu ai sumhpa hpe hti yu u.