DAW 41
Ngang Hte Seng Ai Lam Chyum Laika Hta Hpa Tsun Da Ai Kun?
Masha law law gaw, ngang hte seng nna tsun na matu kaya ma ai. Raitim, Chyum Laika hta ngang hte seng nna tsun ai shaloi, dan dan leng leng si mani ai hku tsun da ai. Tsun da ai lam ni gaw anhte hpe akyu jaw ai. Lachyum mung nga ai. Yehowa gaw anhte a Hpan Madu re ai majaw re. Anhte a matu kaja htum hpe shi chye ai. Anhte a galaw ai lam ni gaw, shi a myit hpe gara hku shapyaw ya lu ai lam hte htani htana ngwi pyaw lam lu na matu hpa gaw anhte hpe karum ya ai ngu ai lam hpe shi tsun da ai.
1. Ngang hte seng nna Yehowa a mu mada lam gaw hpa rai kun?
Yehowa gaw shinggyim masha ni a matu, ngang hpe kumhpa hku nna jaw da ai. Hkungran da ai num hte la ngwi pyaw lam lu la na matu lajang da ya ai. Dai kumhpa gaw, yan la ni hpe ma shaprat lu shangun ai sha n-ga, shada da tsawra myit madun lu shangun nna, myit dik lam lu shangun ai. Dai majaw, Karai a Mungga hta ndai hku tsun da ai: “Na a ram prat na madu jan hte rau pyaw nga u.” (Ga Shagawp 5:18, 19) Hkungran da ai Hkristan yan la ni hpe, shada da sadi dung na matu Yehowa hpyi shawn da ai. Dai majaw, shanhte gaw num shaw la shaw ai amu galaw na n re.—Hebre 13:4 hpe hti u.
2. Hpye ai amu ngu ai gaw hpa rai kun?
“Hpye ai amu galaw ai ni mung, . . . Karai Kasang a mungdan a sali wunli hpe hkam la lu na n rai” ngu Chyum Laika hta tsun da ai. (1 Korinhtu 6:9, 10) Grik ga hku Chyum Laika ka ai ni gaw, hpye ai amu hpe tsun ai shaloi, poniya (porneia) ngu ai ga si hpe lang ma ai. Dai ga si hta (1) n hkungran da ai marai lahkawng hkum shan kanawn ai,a (2) hkrang bung shada nga sha ai, (3) dusat hte hpye ai amu galaw ai lam ni lawm ai. “Hpye ai amu hpe koi gam” na nga yang, anhte nan akyu lu la nna, Yehowa hpe mung myit shapyaw ya lu na re.—1 Htesaloni 4:3.
Kahtap Hkaja
Hpye ai amu hpe gara hku koi lu na lam hte akyang lailen matut san seng yang, gara hku akyu lu la na lam ni hpe hkaja yu ga.
3. Hpye ai amu kaw na hprawng u
Sadi dung ai Yosep gaw, akyang lailen san seng na matu shakut shaja ra wa ai. Ningpawt 39:1-12 hpe hti nna, ndai ga san ni hpe bawngban u:
Hprawng na matu Yosep hpe hpa gaw shadut ya wa ai kun?—Daw kaji 9 hpe yu u.
Yosep gaw jaw ai dawdan lam jahkrat wa ai ngu nang shadu ai kun? Hpa majaw kun?
Dai ni aten na ramma ni mung, hpye ai amu kaw na hprawng lu na matu Yosep hpe gara hku kasi la lu na kun? VIDEO hpe hpaw.
Anhte yawng hpye ai amu hpe koi na matu, Yehowa ra sharawng ai. 1 Korinhtu 6:18 hpe hti nna, ndai ga san ni hpe bawngban u:
Gara masa ni gaw marai langai hpe hpye ai amu galaw hkrup hkra shadut ya chye ai kun?
Hpye ai amu kaw na gara hku hprawng lu na kun?
4. Gunglau ai lam hpe ninghkap u
Hpye ai amu galaw hkrup hkra gunglau ai hpe ninghkap na matu gara lam gaw yak shangun chye ai kun? VIDEO hpe hpaw, dai hpang ndai ga san hpe bawngban u.
Video hta lawm ai hpunau gaw, shi a myit mang ai lam ni hte lailen ni gaw, madu jan hpe sadi run mat shangun lu ai hpe chye ai shaloi, hpa galaw wa ai kun?
Sadi dung ai Hkristan ni pyi, myit mang ai lam matut san seng hkra kalang lang shakut ra chye ai. Akyang lailen hten shangun chye ai lam ni hpe gara hku koi lu na kun? Hpilipi 4:8 hpe hti nna, ndai ga san ni hpe bawngban u:
Gara lam ni hpe anhte myit ging ai kun?
Chyum Laika hti ai hte Yehowa a magam hta amu law nga ai gaw, mara galaw na matu gunglau hkrum ai shaloi ninghkap lu hkra gara hku karum ya lu ai kun?
5. Yehowa a tsang madang ni gaw anhte hpe akyu jaw
Anhte a matu kaja htum gaw hpa re ai hpe Yehowa chye ai. Akyang lailen matut san seng na matu hte dai hku galaw yang gara hku akyu lu na ngu ai lam hpe shi tsun da ai. Ga Shagawp 7:7-27 hpe hti u. Shing nrai, VIDEO hpe hpaw. Dai hpang ndai ga san ni hpe bawngban u.
Shabrang langai gaw gunglau hkrum na masa de gara hku hkawm sa mat ai kun?—Ga Shagawp 7:8, 9 hpe yu u.
Ga Shagawp 7:23, 26 hku nga yang, hpye ai amu gaw grai sawng ai lam ni hpe byin shangun ai. Akyang lailen san seng yang gara manghkang ni hpe koi lu na kun?
Akyang lailen san seng ai gaw htani htana ngwi pyaw na matu gara hku karum ya lu ai kun?
Hkrang bung shada nga sha ai hte seng nna Chyum Laika hta tsun da ai lam gaw, tsawra myit n rawng ai ngu masha nkau mi sawn la ma ai. Raitim, Yehowa gaw tsawra myit nga ai Karai Kasang rai nna, masha yawng hpe htani htana ngwi pyaw shangun mayu ai. Dai hpe lu la na matu, shi a tsang madang ni hte maren asak hkrung ra ai. 1 Korinhtu 6:9-11 hpe hti nna, ndai ga san hpe bawngban u:
Karai a ningmu hta hkrang bung shada nga sha mayu ai myit langai sha n htap htuk ai lam rai kun?
Karai a ra sharawng ai lam lu na matu, anhte yawng galai shai ra ai. Dai hku galaw ai gaw akyu lu ai kun? Shakawn 19:8, 11 hpe hti nna, ndai ga san ni hpe bawngban u:
Akyang lailen hte seng ai Yehowa a tsang madang ni gaw, rap ra ai ngu nang shadu ai kun? Rai yang, hpa majaw dai hku shadu ai?
Yehowa gaw akyang lailen hte seng ai shi a tsang madang ni hpe hkan sa lu hkra, masha law law hpe karum ya wa ai. Nang hpe mung karum ya lu
Nkau Mi Tsun Ai: “Shada da tsawra yang, shan hkum shan kanawn mai ai.”
Nang gara hku htai na?
Kadun Dawk
Ngang gaw Yehowa jaw ai kumhpa rai nna, madu jan hte madu wa ngwi pyaw lam lu na matu re.
Bai Maram
Hpye ai amu hta hpa ni lawm ai kun?
Hpye ai amu hpe koi lu hkra hpa gaw karum ya lu na kun?
Yehowa a tsang madang ni hpe hkan sa yang gara hku akyu lu la na kun?
Sawk Sagawn
Yan la ni hkungran ai, n hkungran ai hte seng ai lam gaw, Karai Kasang a matu hpa majaw ahkyak ai hpe hkaja yu u.
“N Hkungran Ai Sha Rau Nga Sha Ai Hte Seng Nna Chyum Laika Hta Gara Hku Tsun Ai Kun?” (Web sumhpa)
Hkrang bung shada nga sha ai gaw shut ai ngu Chyum Laika hta tsun da tim, hkrang bung shada nga sha ai ni hpe, nju ndawng ging ai ngu n tsun da ai hpe hkaja yu u.
“Hkrang Bung Shada Nga Sha Ai Gaw Shut Ai Kun?” (Web sumhpa)
Hpye ai amu hte seng nna Karai Kasang a tara ni gaw, anhte hpe gara hku makawp maga ya ai hpe hkaja yu u.
“N-gup Hte Hpye Ai Amu Galaw Ai Hpe Gara Hku Mu Mada Ging Ai Kun?” (Web sumhpa)
“Ngai Hpe Shanhte Hkungga Ai Hku Kanawn Mazum Ma Ai” ngu ai sumhpa hta, hkrang bung shada nga sha ai wa gaw, prat hpe Karai ra sharawng ai hte maren galai shai lu wa ai lam hpe hti yu u.
“Chyum Laika Gaw Prat Hpe Galai Shai Ya” (Sin Langchyi, April 1, 2011)
a Ndai hkum pat da ai lam ni hta, hkum shan kanawn ai, n-gup hte hpye ai amu galaw ai, maidang hku hte hpye ai amu galaw ai, tinang hte n hkungran da ai wa a gindai hpe hkum shan myit hte jum ai zawn re ai lam ni lawm ai.