DAW 42
Dinghku De Ai, N De Ai Hte Seng Nna Chyum Laika Hta Hpa Tsun Da Ai Kun?
Htung lailen nkau hta, masha langai gaw dinghku n de yang ngwi pyaw lam n nga ai ngu tsun ma ai. Dinghku de ai ni yawng gaw pyaw nga ai n re ai zawn, dinghku n de ai ni yawng mung yawn nga ai n re. Dinghku de ai prat, n de ai prat lahkawng yan gaw kumhpa re ai ngu Chyum Laika hta tsun da ai.
1. Dinghku n de ai a akyu nkau mi gaw hpa ni rai kun?
Chyum Laika hta ndai hku tsun da ai: “Shi a shayi sha hpe ya ai wa gaw, kaja ai hku galaw nga ai; n ya ai wa mung grau kaja ai hku galaw na re ai.” (1 Korinhtu 7:32, 33, 38 hpe hti u.) Dinghku n de ai wa gaw, gara lam ni hku nna grau kaja ai hku galaw lu ai kun? Dinghku n de ai Hkristan ni hta, ningrum ningtau hpe lanu lahku ra na lit n nga ai. Grau nna wanglu wanglang nga lu ai. Ga shadawn, nkau mi gaw kabu gara shiga hkaw tsun na matu, kaga mungdan de bu hkawm ai zawn re ai myit lawm hpa lam ni hpe galaw ai hku nna, hkaw tsun bungli hpe grau nna galaw lu ai. Grau nna gaw, Yehowa hte nihtep hkra galaw na matu aten grau jaw lu ai.
2. Tara shang hkungran ai a akyu nkau mi gaw hpa rai kun?
Dinghku de ai lam hta mung akyu lu la ai lam nga ai. “Marai langai sha hta, lahkawng gaw grau mai nga ai” ngu Chyum Laika hta tsun da ai. (Hpaji 4:9) Chyum Laika npawt tara ni hpe hkan sa ai Hkristan yan la ni a matu, ndai lam gaw grau teng ai. Tara shang hkungran ai yan la ni gaw shada da tsawra na matu, hkungga na matu, manu shadan na matu ga sadi jaw ai. Dai majaw, n hkungran ai sha rau nga sha ai yan la ni hta na, grau shimlum ai ngu hkamsha ai. Shanhte a kasha ni mung, shimlum lam nga ai ngu grau nna hkamsha na re.
3. Dinghku hpe Yehowa gara hku mu mada ai kun?
Yehowa gaw, shawng nnan dinghku de ya ai shaloi ndai hku tsun ai: “Lasha gaw tinang a kanu kawa hpe kau da nhtawm shi a madu jan hte manoi nga na.” (Ningpawt 2:24) Madu jan hte madu wa gaw shada da tsawra nna, asak hkrung nga dingsa rau run nga na matu Yehowa ra shawng ai. Marai langai num shaw la shaw ai mara galaw yang she, hka na ahkang shi jaw da ai. Dai zawn masa hta, hka na kun? matut rau nga na kun? ngu ai dawdan lam hpe, mara n nga ai wa dawdan na matu Yehowa ahkang jaw da ai.a (Mahte 19:9) Yehowa gaw, Hkristan ni hpe num law law, la law law la na ahkang n jaw da ai.—1 Timohti 3:2.
Kahtap Hkaja
Dinghku de ai raitim, n de ai raitim, ngwi pyaw lam gara hku lu la mai ai lam, Yehowa hpe gara hku myit shapyaw ya lu ai lam hpe hkaja yu ga.
4. Dinghku n nga ai prat a shaman chyeju hpe atsawm akyu jashawn u
Dinghku n nga ai prat hpe shaman chyeju hku nna Yesu mu mada ai. (Mahte 19:11, 12) Mahte 4:23 hpe hti nna, ndai ga san hpe bawngban u:
Yesu gaw, dinghku n nga ai prat hpe shi kawa a magam gun na matu, kaga ni hpe karum ya na matu gara hku akyu jashawn wa ai kun?
Dinghku n de ai Hkristan ni gaw, prat hpe Yesu zawn akyu jashawn nna ngwi pyaw lam tam mai ai. VIDEO hpe hpaw, dai hpang ndai ga san hpe bawngban u.
Dinghku n de ai Hkristan ni gaw, prat hpe akyu nga hkra gara hku akyu jashawn nga ai kun?
Nang chye ai kun?
Asak kade rai yang, dinghku de mai ai ngu Chyum Laika hta n tsun da ai. Raitim, hkum shan myit grai rawt nna, hpaji rawng ai dawdan lam jahkrat na matu yak ai aten re ai “ram prat lai” ai du hkra gaw, la na matu n-gun jaw da ai.—1 Korinhtu 7:36.
5. Ningrum ningtau hpe hpaji rawng ai hku lata u
Ningrum ningtau lata ai gaw, nang jahkrat ra na ahkyak ai dawdan lam ni kaw na langai re. Mahte 19:4-6, 9 hpe hti nna, ndai ga san hpe bawngban u:
Hkristan langai gaw dinghku de na matu hpa majaw alawan n dawdan ging ai kun?
Kaja ai ningrum ningtau byin shangun lu ai atsam ningja ni hpe chye na matu Chyum Laika gaw karum ya lu ai. Ahkyak htum gaw, Yehowa hpe tsawra ai wa hpe tam u.b 1 Korinhtu 7:39 hte 2 Korinhtu 6:14 hpe hti u. Dai hpang ndai ga san ni hpe bawngban u:
Hkristan shada da sha, hpa majaw hkungran ging ai kun?
Yehowa hpe n tsawra ai marai langai ngai hte hkungran ai nga yang, shi gara hku hkamsha na ngu nang shadu ai kun?
N bung ai dusat lahkawng kandang rau hpai yang, hkra machyi na re. Dai hte maren, Hkristan langai gaw makam masham n bung ai wa hte hkungran yang, manghkang law law nga
6. Dinghku hpe Yehowa mu mada ai zawn mu mada u
Moi Israela prat hta la nkau gaw, tingkyeng akyu a matu myit nna num ni hpe jahka kau ma ai. Malahki 2:13, 14, 16 hpe hti nna, ndai ga san hpe bawngban u:
N tara ai hku jahka kau ai hpe, Yehowa hpa majaw nju ndawng ai kun?
Num shaw la shaw ai lam hte hka bra ai lam gaw, mara n nga ai ningrum ningtau hte kasha ni hpe hkra machyi shangun
VIDEO hpe hpaw, dai hpang ndai ga san ni hpe bawngban u.
Nang gaw makam masham n bung ai wa hte dinghku de da yang, na a dinghku ngwi pyaw na matu hpa galaw mai ai kun?
7. Dinghku hta Yehowa a tsang madang ni hpe hkan sa u
Dinghku hte seng nna Yehowa jahkrat da ai tsang madang ni hpe hkan sa na matu shakut shaja ra ai.c Raitim, dai hku galaw ai ni hpe Yehowa shaman chyeju jaw ai. VIDEO hpe hpaw.
Hebre 13:4 hpe hti nna, ndai ga san ni hpe bawngban u:
Dinghku hte seng nna Yehowa a tsang madang ni gaw rap ra ai ngu shadu ai kun? Rai yang, nang hpa majaw dai hku htai ai?
Mungdan law law hta asuya ni hpyi shawn da ai hte maren, hkungran ai (sh) hka bra ai hpe tara shang galaw na matu, Hkristan ni hpe Yehowa hpyi shawn da ai. Titu 3:1 hpe hti nna, ndai ga san hpe bawngban u:
Nang gaw dinghku de da yang, na a hkungran ai lam gaw asuya ni hpyi shawn da ai hku rai kun?
Nkau Mi San Chye Ai: “Hpa majaw hkungran ra na. Rau nga yang n mai ai i?”
Nang gara hku htai na?
Kadun Dawk
Dinghku de ai, n de ai prat lahkawng yan gaw Yehowa kaw na kumhpa re. Yehowa myit ra ai hte maren rai yang, dinghku de tim, n de tim, ngwi pyaw lam hte myit dik lam hkamsha lu na re.
Bai Maram
Dinghku n de ai prat hpe kaja ai hku gara hku akyu jashawn lu na kun?
Hkristan shada da sha hkungran mai ai ngu Chyum Laika hta hpa majaw tsun da ai kun?
Hpa a majaw sha, hka mai ai ngu Chyum Laika hta tsun da ai kun?
Sawk Sagawn
“Karai Wa hpe dum ai hte sha” hkungran ai ngu ai gaw hpa lachyum rai kun?
“Laika Hti Ai Ni Hpang De Na Ga San” (Sin Langchyi, July 1, 2004)
Sumtsaw shada hkrum hkat ai lam, dinghku de ai lam hte seng nna kaja ai dawdan lam ni jahkrat lu hkra karum ya lu ai video kadun 2 hpe yu u.
Yehowa jaw ai shaman chyeju gaw, asum hkam wa ai lam yawng hta grau manu dan ai ngu ai hpe, hpunau langai hpa majaw hkamsha ai lam yu yu u.
Hka bra na kun? (sh) garan nga na kun? ngu ai hpe garai n dawdan shi yang gara lam ni hpe myit ging ai kun?
“Karai Kasang Matut Da Nu Ai Hpe” Hkungga Nga U (Sin Langchyi, December 2018)
a Num shaw la shaw ai majaw n re ai sha, garan nga ai lam hte seng nna chye na matu Jahtum Matsing 4 hpe yu u.
b Htung lailen nkau mi hta, kanu kawa ni gaw kasha ni a matu ningrum ningtau tam ya ma ai. Dai zawn masa hta tsawra myit nga ai kanu kawa ni gaw, kahkri, kanam ni a ja gumhpraw, madang ni hpe n re ai sha, Yehowa hpe tsawra ai kun? n tsawra ai kun? ngu ai hpe shawng myit ai.
c Nang gaw marai langai hte n hkungran da ai sha rau nga ai rai yang, shi hpe kau da na kun? hkungran na kun? ngu ai hpe nang nan dawdan ra ai.