Tsa Chyaru Hpe Hkristan Ni Gara Hku Mu Mada Ging Ai Kun?

Mungkan ting na masha ni hta, tsa chyaru hte seng ai ningmu amyu myu nga ma ai. Nkau mi gaw, manang ni hte kalang lang lu ai hpe ra sharawng ma ai. Nkau mi gaw, n lu na matu dawdan da ai. Nkau mi gaw, nang ai du hkra lu ma ai. Tsa chyaru hte seng nna Chyum Laika hta gara hku tsun da ai kun?

1. Tsa chyaru lu ai gaw shut ai kun?

Tsa chyaru lu ai hpe Chyum Laika hta n hkum pat da ai. Chyum Laika hta Karai Kasang anhte hpe jaw da ai kumhpa law law hte seng nna tsun ai shaloi, “tsabyi jahku masha a myit hpe shapyaw ya nga ai” ngu tsun da ai lam mung lawm ai. (Shakawn 104:​14, 15) Chyum Laika hta lawm ai sadi dung ai num, la nkau mung, tsa chyaru hpe lang wa ai.​—1 Timohti 5:23.

2. Lu na matu lata ai ni hpe Chyum Laika hta gara hku hpaji jaw da ai kun?

Lu lai ai, nang ai hpe gaw Yehowa hkum pat da ai. (Galati 5:21) Shi a Mungga hta “tsabyi jahku lu lai ai ni hte, . . . hkum kanawn” ngu tsun da ai. (Ga Shagawp 23:20) Dai majaw, lu na matu lata ai, tinang hkrai lu ai raitim pyi, tsun ai, galaw ai lam ni hpe n lu hkang ai, asan sha n lu myit ai (sh) hkam kaja lam hpe hkra machyi shangun ai nga yang n lu ging ai. Anhte gaw lu ai hpe n hkang lu ai nga yang, tsep kawp n lu ging ai.

3. Tsa chyaru hte seng nna kaga ni a dawdan lam hpe hkungga ai lam gara hku madun mai ai kun?

Tsa chyaru lu na, n lu na hte seng nna tinang nan dawdan ra ai. Tsa chyaru ramdaw lu ai ni hpe mara n shagun ging ai zawn, n lu na matu dawdan da ai ni hpe mung n shadut ging ai. (Roma 14:10) Anhte lu ai majaw, kaga ni hkra machyi na nga yang, n lu na matu lata ai. (Roma 14:21 hpe hti u.) Anhte gaw, “tinang akyu n re ai sha, kaga wa a akyu sha tam” ga ai.​—1 Korinhtu 10:​23, 24 hpe hti u.

Kahtap Hkaja

4. Lu na, n lu na hpe dawdan u

Tsa chyaru lu ai hpe Yesu gara hku mu mada ai kun? Mahtai hpe chye na matu, shawng nnan shi galaw wa ai mauhpa amu hpe yu yu ga. Yawhan 2:​1-11 hpe hti nna, ndai ga san ni hpe bawngban u:

• Ndai mauhpa lam hta, tsa chyaru hte dai hpe lu ai ni hte seng nna Yesu a ningmu hpe chye lu ai kun?

• Tsa chyaru lu ai hpe Yesu n hkum pat ai nga yang, kaga ni lu ai hpe Hkristan ni gara hku mu mada ging ai kun?

Raitim, Hkristan langai gaw lu na ahkang nga ai majaw sha lu ai nga yang, ayan na gaw hpaji rawng na n re. Ga Shagawp 22:3 hpe hti u. Dai hpang, lawu na masa lam ni hta, lu na kun? n lu na kun? ngu ai hpe myit yu u:

• Mawdaw gau hkyen ai shaloi (sh) jak rai lama ma hte bungli galaw hkyen ai shaloi

• Ma hkum hte re ai shaloi

• N lu na matu sarawun tsun ai shaloi

• Kade daram lu na hpe n hkang lu ai shaloi

• Tara upadi hta tsa lu na hpe ahkang n jaw ai shaloi

• Lai wa sai aten hta, tsa chyaru hte seng nna manghkang nga ai majaw, n lu na matu dawdan da ai marai langai ngai hte rau nga ai shaloi

Hkungran poi (sh) kanawn mazum poi ni hta tsa chyaru daw ging ai kun? Dai hpe chye lu na matu, VIDEO hpe hpaw.

VIDEO: Tsa Chyaru Daw Ging Ai Kun? (2:41)

Roma 13:13 hte 1 Korinhtu 10:​31, 33 hpe hti u. Hti ngut ai hpang ndai ga san hpe bawngban u:

• Ndai npawt tara hpe hkan sa ai gaw, Yehowa myit ra ai hte maren dawdan lu hkra nang hpe gara hku karum ya ai kun?

5. Kade daram lu na hpe dawdan u

Tsa chyaru hpe lu na nga yang, ndai hpe dum u: Yehowa gaw tsa chyaru lu ai hpe n hkum pat da tim, lu lai ai hpe gaw hkum pat da ai. Hpa majaw kun? Hosea 4:​11, 18 hpe hti nna, ndai ga san hpe bawngban u:

• Lu lai yang hpa byin chye ai kun?

Lu lai ai hpe gara hku koi lu na kun? Anhte shagrit shanem ra ai. Kade daram sha dang ai hpe hkap la ra ai. Ga Shagawp 11:2 hpe hti nna, ndai ga san hpe bawngban u:

• Kade daram lu na hpe masat da ai gaw hpa majaw kaja ai kun?

6. Tsa chyaru lu lai ai hpe hkang lu

VIDEO: ‘Prat Masa Nnan Hpe Ngai Lu Wa’ (6:32)

• Ndai video hta tsa chyaru lu ai shaloi Dimihtri gara hku byin wa ai kun?

• Kalang ta tawn kau lu ai kun?

• Tsa ya byin ai prat hpe shi gara hku galai shai lu wa ai kun?

1 Korinhtu 6:​10, 11 hpe hti nna, ndai ga san ni hpe bawngban u:

• Lu lai ai gaw kade daram shoihpa nga ai kun?

• Tsa chyaru lu lai ai hpe hkang lu ai lam, hpa gaw madun dan ai kun?

Mahte 5:30 hpe hti nna, ndai ga san hpe bawngban u:

• Lata hpe kahtam di kau u ngu ai ga shadawn gaw, Yehowa a myit shapyaw ya na matu sak jaw ra ai lam ni nga ai ngu ai lachyum re. Tsa chyaru lu lai ai hpe hkang na matu yak ai nga yang, hpa galaw mai ai kun?a

1 Korinhtu 15:33 hpe hti nna, ndai ga san hpe bawngban u:

• Lu lai ai manang ni hte kanawn na nga yang nang hpe gara hku hkra machyi na kun?

Kadun Dawk

Anhte ngwi pyaw lu na matu, tsa chyaru hpe Yehowa lajang da ya ai. Raitim, lu lai ai, nang ai hpe gaw shi hkum pat da ai.

Bai Maram

• Tsa chyaru hte seng nna Chyum Laika hta gara hku tsun da ai kun?

• Lu lai yang gara shoihpa ni nga chye ai kun?

• Lu ai hte seng nna kaga ni a dawdan lam hpe hkungga ai lam gara hku madun mai ai kun?

Sawk Sagawn

Ramma ni gaw tsa chyaru hte seng nna kaja ai dawdan lam ni hpe gara hku jahkrat lu na kun?

N Lu Shi Yang Shawng Myit Yu U (2:31)

Tsa chyaru hte seng ai manghkang ni hpe tawt lai lu hkra karum ya lu ai lam ni hpe hti yu u.

“Tsa Chyaru Hte Seng Nna Jaw Ai Ningmu Nga Ai Lam” (Sin Langchyi, January 1, 2010)

Tsa gawm sharawt nna akyu hpyi ai hta Hkristan ni lawm ging ai kun?

“Laika Hti Ai Ni Hpang De Na Ga San” (Sin Langchyi, February 15, 2007)

“Ngai Gaw Tsa Ya Re” ngu ai sumhpa hta la langai gaw lu lai ai hpe gara hku jahkring kau lu ai hpe hti yu u.

“Chyum Laika Gaw Prat Hpe Galai Shai Ya” (Sin Langchyi, May 1, 2012)