Lam Shagu Hta Dingman U

Dingman ai masha ni hpe anhte yawng manang galaw mayu ai. Dai hte maren Yehowa mung, shi a manang ni hpe dingman shangun mayu ai. Raitim, n dingman ai ni law nga ai ndai mungkan hta, dai hku galaw na matu yak ai. Lam shagu hta dingman na nga yang, hpa akyu ni lu na kun?

1. Dingman na matu hpa majaw ahkyak ai kun?

Kaga ni a ntsa dingman ai lam madun ai gaw, Yehowa hpe tsawra nna hkungga ai lam madun ai re. Ndai lam hpe myit yu u: Yehowa gaw anhte myit ai, galaw ai lam yawng hpe chye ai. (Hebre 4:13) Anhte dingman na matu lata ai hpe shi sadi hkrup ai shaloi, dai hpe shi manu shadan ai. Shi a Mungga hta ndai hku tsun da ai: “Yehowa gaw myit magaw ai ni hpe matsat nga ai. Teng man ai ni chyawm gaw shi hte jinghku hku lu na ma ra ai.”​—Ga Shagawp 3:32.

2. Shani shagu na prat hkrun lam hta, dingman ai lam madun lu ai lam nkau mi gaw hpa rai kun?

Yehowa gaw, “langai hte langai . . . teng man ai ga tsun” na matu ra sharawng ai. (Zehkaria 8:​16, 17) Dai gaw hpa lachyum rai kun? Nta masha, bungli manang, hpunau nauna ni, asuya rung ni hte tsun shaga ai shaloi anhte n masu ai, shut ai shiga ni n jaw ai hpe tsun ai re. Dingman ai masha ni gaw, kaga ni a arai n lagu ai, maw sha ai baw n galaw ai. (Ga Shagawp 24:28 hte Ehpesu 4:28 hpe hti u.) Tinang madu ai arai ni a matu mung, hkansi jaw ai. (Roma 13:​5-7) Dai lam hte kaga lam ni hta “arawn alai kaja hkan mayu ga ai.”​—Hebre 13:18.

3. Dingman ai majaw lu la ai akyu ni gaw hpa rai kun?

Anhte dingman ai hpe kaga ni chye yang, anhte hpe hkungga na re. Nawku hpung hpe tinang a nta zawn, shimlum ai ngu hkamsha hkra karum ya lu ai. Anhte hta san seng ai myit nsam nga ai. Anhte dingman ai nga yang, “Karai Kasang a sharin shaga mung ga hpe . . . mawn sumli” ya lu na re.​—Titu 2:9.

Kahtap Hkaja

4. Dingman ai gaw Yehowa hpe myit pyaw shangun

Shakawn 44:21 hte Malahki 3:16 hpe hti nna, ndai ga san ni hpe bawngban u:

• Lama ma hpe makoi da lu ai ngu kam ai gaw, hpaji n rawng ai ngu nang hpa majaw shadu ai kun?

• Jaw ai ga tsun na matu yak ai aten hta pyi, jaw ai hku tsun ai nga yang Yehowa gara hku hkamsha na kun?

5. Aten shagu hta dingman ai hku galaw u

VIDEO: Hpa Gaw Kabu Gara Lam Jaw Lu Ai Kun?​—San Seng Ai Myit Nsam (2:32)

Hebre 13:18 hpe hti nna, lawu na lam ni hta gara hku dingman lu ai hpe bawngban u:

• Anhte a dinghku hta

• Bungli (sh) jawng hta

• Kaga masa ni hta

6. Dingman ai majaw anhte akyu lu

Dingman ai majaw, manghkang nkau mi nga chye ai. Raitim, prat tup a matu dai gaw kaja htum lam re. Shakawn 34:​12-16 hpe hti nna, ndai ga san hpe bawngban u:

• Dingman ai gaw, prat hpe hpa majaw grau kaja shangun ai kun?

1. Dingman ai gaw, dinghku a makyit sumri hpe grau ngang kang shangun

2. Dingman ai bungli masha ni gaw, bungli madu ni a kam ai hpe lu la

3. Dingman ai mung masha ni gaw, asuya ni a man hta mying kaja lu

Kadun Dawk

Yehowa gaw shi a jinghku ni hpe tsun ai, galaw ai lam yawng hta dingman shangun mayu ai.

Bai Maram

• Dingman lu ai lam nkau gaw hpa ni rai kun?

• Lama ma hpe makoi da lu ai ngu kam ai gaw, hpa majaw hpaji n rawng ai kun?

• Aten shagu nang hpa majaw dingman mayu ai kun?

Sawk Sagawn

Kanu kawa ni gaw, ma ni dingman na matu gara hku sharin ya lu ai kun?

Teng Man Ai Hku Tsun U (1:44)

Anhte ga sadi dung yang hpa akyu ni lu na kun?

Ga Sadi Grin Nna Shaman Chyeju Hkam La (9:09)

Anhte bang ai hkansi hpe gara shara kaw mi lang tim bang ra na kun? ngu ai hpe chye na matu hti yu u.

“Hkansi Bang Ra Na Kun?” (Sin Langchyi, September 1, 2011)

N dingman ai masha langai gaw, shi a prat hpe galai shai nna dingman ai hku asak hkrung na matu hpa gaw shadut ya wa ai kun?

“Yehowa Gaw Tsawra Myit Nga Nna Mara Raw Ya Ai Karai Re Ai Hpe Chye Wa” (Sin Langchyi, May 1, 2015)