Laika Hti Ai Ni Hpang De Na Ga San
Shakawn Kungdawn 145:2 hta, Dawi gaw Karai Kasang a amying hpe “htani htana” shakawn na ngu tsun da ai. Dai gaw shi galoi n si na ngu shadu ai majaw tsun ai kun?
N re. Dawi ka ai ga gaw jaw ai. Tatut re ai.
Dai daw kaji hte dai hte bung ai daw kaji ni hta, Dawi gara hku ka ai hpe sadi yu u: “Nye a Madu Karai Kasang e, Ngai nang hpe myit yawng hte shakawn nga nna, Tut nawng e, na a amying hpe shagrau na nngai.” “Na a amying nsang hpe, htani htana Prat dingsa, ngai shakawn nga na nngai.”—Shk 86:12; 145:1, 2.
Galoi mung n si sai ngu Dawi sawn la nna, n mai byin ai hpe ka nga ai n re. Shinggyim masha gaw, yubak a majaw si dam hkrum na ngu Yehowa masat da ai hpe shi chye ai. Shi nan mung yubak masha re ai hpe yin la ai. (Nin 3:3, 17-19; Shk 51:4, 5) Abraham, Isak, Yaku zawn re ai Karai a myiman lu ai masha ni pyi, si mat ai hpe shi chye ai. Shi nan mung, lani mi hta si ra na hpe chye ai. (Shk 37:25; 39:4) Shakawn 145:2 hta lawm ai ga ni gaw, Karai Kasang hpe htani htana, lam mi hku tsun na nga yang, asak hkrung nga dingsa, shakawn mayu ai shi a myit jasat hte dawdan da ai lam hpe tsun mayu ai re.—2 Sa 7:12.
Shakawn 18, 51 hte 52 ni a ntsa na ga yan ni hpe yu yang, Dawi gaw kalang lang, shi a mabyin ni hpe ka chye ai. Shakawn 23 hta, Yehowa hpe lam matsun jaw ai, ban sa lam jaw ai, makawp maga ya ai sagu rem hku nna hkrang shapraw da ai. Dawi gaw dai zawn sagu rem ai wa re. Karai Kasang hpe “hkrung nga ai nhtoi n lang hte hta” shi nawku mayu ai.—Shk 23:6.
Chyum Laika ka na matu Dawi hpe chyoi pra ai wenyi hte Yehowa lam matsun ya ai hpe mung dum u. Hpang she hpring tsup wa na myihtoi ga ni hpe mung shi ka wa ai. Ga shadawn, Shakawn Kungdawn 110 hta, shi a madu gaw sumsing lamu hta “[Karai Kasang] a hkra maga” hta dung nna, ahkang aya kaba lu na aten a lam Dawi ka wa ai. Hpa galaw na matu kun? Karai a hpyen ni hpe dang kau na matu, mungkan ntsa hta nga ai “masha amyu ni hpe daw dan” na matu re. Dawi gaw, Meshia re ai Yesu a kaji kawoi re. Meshia gaw, sumsing lamu kaw na uphkang nna, htani htana hkinjawng rai na re. (Shk 110:1-6) Shakawn Kungdawn 110 hta mu lu ai myihtoi ga gaw, shi a lam ka da ai rai nna, htawm hpang hta hpring tsup wa na lam Yesu shagrin ya ai.—Mat 22:41-45.
Dawi gaw shi asak hkrung nga ai aten, shi bai hkrung rawt wa nna Yehowa hpe htani htana shakawn lu na htawm hpang aten 2 yan hte seng ai lam hpe ka na matu shatsam hkrum wa ai. Shakawn Kungdawn 37:10, 11, 29 gaw, moi Israela aten hte mung, Karai Kasang shi a ga sadi ni hpe jahpring shatsup ya na htawm hpang aten hte mung seng ai lam chye na lu ai.—Ndai laika buk hta lawm ai “Nang Ngai Hte Rau Hparadisu E Nga Na” ngu ai sumhpa a laika pang 8 hpe yu u.
Shakawn Kungdawn 145:2 hte dai hte bung ai daw kaji ni gaw, moi Israela mung hta si ai aten du hkra Yehowa hpe shakawn mayu ai Dawi a myit jasat hpe madun dan ai. Dai zawn sha, Yehowa bai jahkrung sharawt ya na htawm hpang hta mung, gaja wa shakawn lu sana ngu ai hpe madun dan ai.