Kwosana na Lũka
5 Ĩvinda yĩmwe ĩkomano nĩyamũvivinyĩte yĩthukĩĩsye ndeto ya Ngai, nake aũngamĩte ũtee wa ĩia ya Kenesaleti. * 2 Na oona masiwa * elĩ maũngamĩtwʼe ũtee wa ũkanga, ĩndĩ atei ma makũyũ maĩ manauma masiwanĩ asu na mathambasya itei syoo. 3 Nĩwalikile ĩsiwanĩ yĩmwe yĩla yaĩ ya Simoni, na amũkũlya ayĩtwae vaasanga na nthĩ nyũmũ. Na ĩndĩ ekala nthĩ na ambĩĩa kũmanyĩsya ĩkomano e ĩsiwanĩ yĩu. 4 Yĩla waminie kũneena, amwĩa Simoni: “Yĩtwae vala valiku, na mũyĩkya itei * syenyu nĩ kana mũkwatye.” 5 Ĩndĩ Simoni amũsũngĩa, amwĩa: “Mũmanyĩsya, tũthũkũmie ũtukũ wʼonthe na tũinakwatya kĩndũ, ĩndĩ nũndũ wa ndeto syaku nĩngũtheesya kĩtei.” 6 Yĩla meekie ũu, nĩmakwatisye * makũyũ maingĩ mũno. O na itei syoo nĩsyambĩĩe kũtwʼĩkanga. 7 Kwoou mamokĩlĩlya moko atei ala angĩ maĩ ngwatanĩo vamwe namo me ĩsiwanĩ yĩla yĩngĩ nĩ kana moke mamatetheesye, na mooka mausũsya masiwa asu elĩ, nginya mambĩĩa kũvota kĩwʼũnĩ. 8 Simoni Vetelo oona ũu avalũka maunĩ ma Yesũ, akyasya: “Uma vaa nĩĩ, Mwĩaĩi, nũndũ nĩ mwene naĩ.” 9 Nĩkwĩthĩwa Simoni na ala waĩ namo nĩmasengʼie mũno nũndũ wa makũyũ ala makwatisye, 10 na ũu nowʼo kweethĩiwe kwa Yakovo na Yoana, ana ma Sevetii, ala mathũkũmaa ĩmwe na Simoni. Ĩndĩ Yesũ amwĩa Simoni: “Eka kwĩthĩwa na wia. Kuma yu ũkakwatasya andũ me thayũ.” 11 Kwoou matũnga masiwa nthĩ nyũmũ, na matia syĩndũ syonthe na mamũatĩĩa.
12 Na ĩvinda yĩngĩ Yesũ e ndũanĩ ĩmwe, sisya! vaĩ mũndũ wausũĩte mangũ mwĩĩ wʼonthe! Yĩla woonie Yesũ, avalũka na ũthyũ na amwĩsũva, akyasya: “Mwĩaĩi, ethĩwa nũkwenda, nũtonya kũnthesya.” * 13 Nake atambũũkya kwʼoko kwake amũkiita, na amwĩa: “Nĩngwenda! Ĩthĩwa mũtheu.” Na vau kwa vau avoa mangũ vyũ. 14 Na eeaĩa mũndũ ũsu ndakatavye mũndũ o na ũmwe, akĩmwĩa atĩĩ: “Ĩndĩ enda ũkeyonanyʼe kwa mũthembi, na ũyumya nthembo kwondũ wa kũthewʼa kwaku, o tondũ Mose waisye, nĩ kana ũu wĩthĩwe ũkũsĩ kwoo.” 15 Na ũvoo ĩũlũ wake waendeea kũnyaĩĩka, na andũ aingĩ nĩmoombanaa nĩ kana mamwĩthukĩĩsye na maivowʼa mowau moo. 16 Ĩndĩ, mavinda maingĩ nĩwaendaa kũndũ kũte andũ nĩ kana akavoye.
17 Na mũthenya ũmwe Yesũ aendeee kũmanyĩsya, vaĩ Avalisi na amanyĩsya ma Mĩao mekalĩte vau, namo maumĩte motũinĩ onthe ma Kalilii na Yutia, o na Yelusaleme; na vinya wa Yeova waĩ vamwe nake nĩ kana avosye. 18 Na sisya! vaĩ andũ makuĩte mũndũ waĩ mwonzu mamutha e ũkomonĩ, na nĩmatatie kũmũlikya nthĩnĩ mamwie mbee wa Yesũ. 19 Kwoou yĩla maleile kwona vandũ matonya kũmũlikĩlya nũndũ wa ĩkomano, malĩsa nyũmbanĩ ĩũlũ na mamũtheelelya kĩalanĩ e ũkomonĩ, na mamwia katĩ wa andũ ala maĩ mbee wa Yesũ. 20 Yĩla woonie mũĩkĩĩo woo, asya: “Mũnyanyawa, naĩ syaku nĩsyaekewa.” 21 Na ĩndĩ aandĩki na Avalisi mambĩĩa kũsũanĩa, makyasya: “Ũũ nũũ ũkũneena ndeto sya kũuma Ngai? Nũũ ũtonya kũekea naĩ ate o Ngai?” 22 Ĩndĩ Yesũ amanya mosũanĩo moo amasũngĩa, amea: “Mwĩsũanĩa kyaũ ngoonĩ syenyu? 23 Nĩ ũndũ wĩva wĩ laisi, nĩ kwasya, ‘Naĩ syaku nĩsyaekewa,’ kana nĩ kwasya, ‘Ũkĩla ũthi’? 24 Ĩndĩ nĩ kana mũmanye kana Mwana wa mũndũ e na ũkũmũ ĩũlũ wa nthĩ wa kũekea naĩ—” amwĩa mũndũ ũsu waĩ mwonzu mamutha atĩĩ: “Nĩkwĩa, Ũkĩla, wose ũkomo waku, na ũyĩnũka.” 25 Eewʼa ũu aũngama mbee woo, oosa ũkomo wake, na enũka, aimũkumya Ngai. 26 Na onthe masengʼa mũno, na mambĩĩa kũmũkumya Ngai, na meethĩwa na kĩkĩo kingĩ, na masya: “Ũmũnthĩ nĩtwoona maũndũ ma ũsengyʼo!”
27 Na ĩtina wa ũu, aumaala na oona mumĩthya wa koti wĩtawa Livai ailyĩ nthĩ ovisinĩ wa koti, na amwĩa: “Ĩthĩwa mũatĩĩi wakwa.” 28 Na atia syĩndũ syonthe, na ookĩla ambĩĩa kũmũatĩĩa. 29 Na Livai avangĩthya mboka nene kwondũ wake nyũmbanĩ kwake, na kwaĩ ĩkomano ĩnene ya aumĩthya ma koti na angĩ ala maĩsaa * namo. 30 Yĩla Avalisi na aandĩki moo moonie ũu, mambĩĩa kũnyungunyĩĩsya amanyĩwʼa make, makyasya: “Nĩkĩ mũĩsaa na kũnywʼa na aumĩthya ma koti na eki ma naĩ?” 31 Nake Yesũ amasũngĩa, amea: “Ala mate awau mayĩthĩawa na vata wa mũiiti, ĩndĩ no ala awau. 32 Ndyaaũka kũmeta ala alũngalu, ĩndĩ nookie kũmeta eki ma naĩ nĩ kana melile.”
33 Namo mamwĩa: “Amanyĩwʼa ma Yoana nĩmatĩĩaa kũya mavinda maingĩ na nĩmavoyaa na kĩthingʼĩĩsyo, na amanyĩwʼa ma Avalisi o namo mekaa oou, ĩndĩ maku nĩmaĩsaa na kũnywʼa.” 34 Nake Yesũ amakũlya atĩĩ: “Inywʼĩ no mũtume anyanyae ma mũtwaani matĩĩa kũya yĩla mũtwaani wĩ vamwe namo? 35 Ĩndĩ mĩthenya nĩyũkĩte yĩla kwa wʼo mũtwaani ũkavetwa vala maĩ; na mĩthenyanĩ ĩsu makatĩĩa kũya.”
36 O na nĩwamanengie ngelekanyʼo, amea: “Vaiĩ mũndũ ũtilaa kĩlaka kya ngũa nzaũ ya ĩũlũ na aikĩtumĩĩa ngũanĩ ngũũ. Eeka ũu, kĩlaka kĩu kyeũ kĩkaa kwĩkusya kuma ngũanĩ ĩsu, na kĩilea kwosana na ngũa ĩsu ngũũ. 37 O na ĩngĩ, vaiĩ mũndũ wĩkĩaa mbinyu nzaũ ithumanĩ ngũũ sya mbinyu. Nũndũ eeka ũu mbinyu ĩsu nzaũ nĩtembũaa ithuma isu sya mbinyu na ĩyĩtĩka, nasyo ithuma isu sya mbinyu iyanangĩka. 38 Ĩndĩ mbinyu nzaũ yaĩle kwĩkĩwa ithumanĩ nzaũ sya mbinyu. 39 Vaiĩ mũndũ ĩtina wa kũnywʼa mbinyu ngũũ wendaa ĩla nzaũ, nũndũ aasya, ‘Ĩla ngũũ nĩyo nzeo.’”