Ĩvuku ya Mbee ya Mavinda
15 Na aendeea kwĩyakĩa nyũmba Ndũanĩ ya Ndaviti, na aseũvya vandũ kwondũ wa Ĩsandũkũ ya Ngai ũla wa w’o na ayambĩa ĩeema vau. 2 Ĩvindanĩ yĩu nĩwʼo Ndaviti waisye atĩĩ: “Vai mũndũ ũngĩ waĩle kũkua Ĩsandũkũ ya Ngai ũla wa w’o eka o Alivai, nũndũ Yeova nũmanyuvĩte makuae Ĩsandũkũ ya Yeova na maimũthũkũmaa ĩvinda yonthe.” 3 Nĩvo ĩndĩ Ndaviti woombanĩisye Aisilaeli onthe Yelusalemu nĩ kana mambatye Ĩsandũkũ ya Yeova vala waĩ anayĩseũvĩsya.
4 Ndaviti nĩwoombanisye nzyawa ii sya Alũni vamwe na Alivai aa: 5 kuma kwa Akoathi, mũnene Ulieli na ana-a-ĩthe 120; 6 kuma kwa Amelali, mũnene Asaia na ana-a-ĩthe 220; 7 kuma kwa Angelisomu, mũnene Yoeli na ana-a-ĩthe 130; 8 kuma nzyawanĩ sya Elisavani, mũnene Semaia na ana-a-ĩthe 200; 9 kuma nzyawanĩ sya Eviloni, mũnene Elieli na ana-a-ĩthe 80; 10 kuma nzyawanĩ sya Usieli, mũnene Aminatavu na ana-a-ĩthe 112. 11 O na ĩngĩ, Ndaviti nĩweetie mũthembi Nzatoki na Aviathali vamwe na Ulieli, Asaia, Yoeli, Semaia, Elieli, na Aminatavu, ala maĩ Alivai, 12 na amea atĩĩ: “Ninywʼĩ aũngamĩi ma nyũmba sya aa-ĩthe ma Alivai. Ĩthesyei, inywʼĩ na ana-a-ĩthe menyu, na mũyambatya Ĩsandũkũ ya Yeova Ngai wa Isilaeli vandũnĩ vala nĩyĩseũvĩsye. 13 Nũndũ ĩvindanĩ ya mbee mũyaayĩkua, ũthatu wa Yeova Ngai witũ nĩwatwakanĩie, nĩkwĩthĩwa tũyaamantha mũtalatala ũla waĩlĩte.” 14 Kwoou athembi na Alivai meethesya nĩ kana mambatye Ĩsandũkũ ya Yeova Ngai wa Isilaeli.
15 Na ĩndĩ Alivai makua Ĩsandũkũ ya Ngai ũla wa w’o na mĩtĩ mayilĩĩle ituonĩ syoo, o tondũ Mose weeaie aatĩĩe kĩla Yeova wamũtavĩtye. 16 Nĩvo ĩndĩ Ndaviti weeie anene ma Alivai manyuve ana-a-ĩthe ala aini nĩ kana maine na wasya mũnene me atanu, me na mĩio ĩĩ ya wathi: mĩio ya kũinga yĩ na ndii, mĩio ya wathi yĩ na ndii 12,* na masaya.
17 Kwoou Alivai nĩmanyuvie Emani mwana wa Yoeli, na kuma kwa ana-a-ĩthe, Asavu mwana wa Mbelekia, na kuma kwa ana-a-ĩthe Amelali, Ethani mwana wa Kusaia. 18 Maĩ na ana-a-ĩthe aa ma kĩkundi kya kelĩ: Nzekalia, Mbeni, Yaasieli, Semilamothi, Yeielu, Uni, Eliavu, Mbenaia, Maaseia, Matithia, Eliveleu na Mikineia na asũvĩi ma mĩvĩa Oveti-etomu na Yeieli. 19 Aini Emani, Asavu, na Ethani maaĩlĩte kũkũnanganyʼa masaya ma ũthuku; 20 na Nzekalia, Asielu, Semilamothi, Yeielu, Uni, Eliavu, Maaseia, na Mbenaia maingaa mĩio ya kũinga yĩ na ndii ĩkumya wasya wa Alamothi;* 21 na Matithia, Eliveleu, Mikineia, Oveti-etomu, Yeieli, na Asasia makũnaa mĩio ya wathi yĩ na ndii 12* ĩkumya wasya wa Seminithi,* nĩ kana matongoesye wini. 22 Kenania mũnene wa Alivai nĩwe waũngamĩe ũkui, nũndũ aĩ ndũĩka wĩanĩ ũsu, 23 namo Mbelekia na Elikana masũvĩaa Ĩsandũkũ. 24 Mũthembi Sevania, Yosavati, Nethaneli, Amasai, Nzekalia, Mbenaia, na Elieseli mavuvaa masoo na wasya mũnene mbee wa Ĩsandũkũ ya Ngai ũla wa w’o, na o namo Oveti-etomu na Yeia masũvĩaa Ĩsandũkũ.
25 Na ĩndĩ Ndaviti na atumĩa ma Isilaeli na anene ma makili mathi makambatye ĩsandũkũ ya ũtianĩo wa Yeova kuma nyũmbanĩ ya Oveti-etomu me atanu. 26 Yĩla Ngai ũla wa w’o watetheeisye Alivai ala makuĩte ĩsandũkũ ya ũtianĩo wa Yeova, nĩmathembie tũsalũ mũonza na ndũũme mũonza. 27 Ndaviti eekĩĩte ĩkoti yĩte moko ya kĩtambaa kĩseo, o ta Alivai onthe ala makuĩte Ĩsandũkũ yĩu, aini, na Kenania ũla waĩ mũnene wa ũkui na aini; o na ĩngĩ, Ndaviti eekĩĩte evoti ya katane. 28 Aisilaeli onthe mambatĩtye ĩsandũkũ ya ũtianĩo wa Yeova mokĩlĩtye mawasya ma ũtanu, mavuvĩte ũvya, mavuvĩte masoo, makũnanganĩtye masaya, maingĩte mĩio ya kũinga yĩ na ndii na wasya mũnene na makũnĩte mĩio ya wathi yĩ na ndii 12* na wasya mũnene.
29 Ĩndĩ yĩla ĩsandũkũ ya ũtianĩo wa Yeova yavikiwʼe Ndũanĩ ya Ndaviti, Mikali mwĩĩtu wa Saũlo nĩwakunĩkĩile nthĩ ndĩlĩsyanĩ na oona Mũsumbĩ Ndaviti atũlĩlangĩte na aitanĩa ũndũ ũla waendeee; na ambĩĩa kũmũvũthĩĩsya ngoonĩ yake.