Meko ma Atũmwa
26 Na Akiliva amwĩa Vaulo atĩĩ: “Wĩ na mwanya wa kwĩtetea.” Nake Vaulo ookĩlya kw’oko na eetetea, akyasya:
2 “Nĩ na ũtanu kwĩtetea mbee waku ũmũnthĩ, Mũsumbĩ Akiliva, ĩũlũ wa maũndũ onthe ala nĩsikatĩwe nĩ Ayuti, 3 na mũno mũno nĩkwĩthĩwa nĩwĩsĩ nesa syĩthĩo syonthe sya Ayuti, o vamwe na ngananĩo katĩ woo. Kwoou, nĩngũkwĩsũva ũmbĩthukĩĩsye na wũmĩĩsyo.
4 “Mwĩkalĩle wakwa kuma nĩ mũnini, ũndũ nekalaa nĩ katĩ wa andũ maitũ * na nĩ Yelusaleme, nĩwĩsĩkĩe nesa nĩ Ayuti onthe 5 ala vau mbeenĩ mambĩsĩ nesa, ethĩwa nĩmekwenda no makũsĩĩe kana naĩ Mũvalisi na nekalaa kwosana na maũndũ onthe ala makonetye kĩkundi kitũ kya ndĩni kĩla kĩatĩĩaa vyũ maũndũ ma ũthaithi witũ. 6 Ĩndĩ yu nĩsilĩlwa nũndũ wa kwĩthĩwa na wĩkwatyo wa kana watho ũla Ngai wathie aa-ũmae maitũ ũkeanĩa; 7 watho ũsu now’o mbaĩ sitũ 12 syĩkwatĩtye kwona ũianĩa kwa kũmũthũkũma na kĩthito ũthũkũmi mũtheu ũtukũ na mũthenya. Na wĩkwatyo ũsu, we Mũsumbĩ, nĩw’o nzikatĩwe nĩ Ayuti.
8 “Nĩkĩ mũkwona ta ũndũ ũtatonya kũĩkĩĩka kana Ngai nũthayũũkasya akw’ũ? 9 Nyie a vakwa naĩ na mũĩkĩĩo kana nĩnaĩle kwĩka maũndũ maingĩ nĩ kana nĩleane na ĩsyĩtwa ya Yesũ Mũnasaleti. 10 Ũu now’o neekaa Yelusaleme, na nĩnavingĩaa yela aingĩ katĩ wa ala atheu, nũndũ nĩnanengetwe ũkũmũ nĩ anene ma athembi, na yĩla matw’ĩĩwa kũawa, nĩnakũnaa kula ya kwĩtĩkĩlana na ũndũ ũsu. 11 Nĩnamathĩnasya mavinda maingĩ masinakokenĩ onthe, ngyenda makaĩe mũĩkĩĩo woo; na nũndũ nĩnamathatĩe mũno, o na nĩnaendaa kũmathĩny’a ndũanĩ ila syĩ nza wa Yelusaleme.
12 “Na ĩvinda yĩmwe nĩendete Ndamasiku, nĩnengetwe ũkũmũ na ũtũmani kuma kwa anene ma athembi, 13 kwĩ saa sita sya mũthenya, we Mũsumbĩ, nĩnoonie kyeni kĩtisu kũte kya syũa kyakena kuma ĩtunĩ, na kyamulĩka ngalĩko syonthe vala naĩ na ala naendanĩtye namo. 14 Na yĩla ithyonthe twavalũkile nthĩ, nĩneewie wasya ũimbĩa ũũ na kĩthyomo kya Kĩevelania: ‘Saulo, Saulo, nĩkĩ ũũnthĩny’a? Kũendeea kũtheela mĩsenge * kwĩtuma maũndũ methĩwa me momũ kwaku.’ 15 Nakwa nakũlya: ‘Nue ũũ, Mwĩaĩi?’ Nake Mwĩaĩi anzũngĩa: ‘Ninyie Yesũ, ũla ũũthĩny’a. 16 Ĩndĩ ũkĩla ũũngame, nũndũ nakumĩlĩĩla nĩ kana ngũnyuve wĩthĩwe mũthũkũmi na ngũsĩ ya maũndũ mangonetye ala woona na ala nĩkwony’a. 17 Na ngaũvonokya kumana na andũ aa na andũ ma mbaĩ ingĩ ala ngũũtũma kwoo 18 ũkasalukye metho moo, ũmaumye kĩvindunĩ na kũmaete kyeninĩ na kũmaumya ũkũmũnĩ wa Satani moke kwa Ngai, nĩ kana matonye kũekewa naĩ na maikwata ũtiĩwa katĩ wa ala matheetw’e nũndũ wa kũndĩkĩĩa nyie.’
19 “Kwoou, we Mũsumbĩ Akiliva, nyie ndyaalea kwĩka kwosana na ũndũ noonie woninĩ ũsu wa ĩtunĩ, 20 ĩndĩ nĩnambie kũtavya ala me Ndamasiku, na ĩtina wa vau natavya ala me Yelusaleme na nthĩ ya Yutia yonthe, o vamwe na andũ ma mbaĩ ingĩ kana nĩmaĩle kwĩlila na maimũsyokea Ngai kwa kwĩka maũndũ ala mekwosana na wĩlilo. 21 Kĩu nĩkyo kĩtumi Ayuti mangwatie nĩ ĩkalũnĩ na menda kũmbũaa. 22 Ĩndĩ nũndũ nĩnonete ũtethyo ũla wumaa kwa Ngai, nĩnĩendeee nginya ũmũnthĩ kũmaumĩsya ũkũsĩ anini na anene, ndeũweta ũndũ ũngĩ o na ũmwe eka maũndũ ala Mavuku ma Athani na Mose maĩtye makeekĩka— 23 kana Klĩsto aĩ athĩne na nũndũ aĩ ethĩwe wa mbee kũthayũũkw’a, aitangaasa kyeni kwa andũ aa o na kwa andũ ma mbaĩ ingĩ.”
24 Na Vaulo aendeee kũneena maũndũ asu ayĩtetea, Vesito aneena na wasya mũnene, akyasya: “We Vaulo wĩ na ndũũka! Kũsoma mũno nĩkũtumĩte ũkwatwa nĩ ndũũka!” 25 Ĩndĩ Vaulo asya: “Nyie ndi na ndũũka, Mũtaĩwa Vesito, ĩndĩ nĩneena ndeto sya w’o na sya mũndũ wĩ na kĩlĩko kĩseo. 26 Nĩkwĩthĩwa mũsumbĩ ũla ngũneena nake nĩ na ũthasyo nĩwĩsĩ ĩũlũ wa maũndũ aa; na ndi na nzika kana vaiĩ ũndũ o na ũmwe ũtesĩ katĩ wa maũndũ aa, nũndũ vaiĩ ũmwe wamo waaĩkwa kĩmbithĩnĩ. 27 We Mũsumbĩ Akiliva nũĩkĩaa Mavuku ma Athani? Nĩnĩsĩ nũmaĩkĩaa.” 28 Ĩndĩ Akiliva amwĩa Vaulo: “Kwa ĩvinda ĩkuvĩ no ũngalyũle ngatw’ĩka Mũklĩsto.” 29 Nake Vaulo amwĩa: “Nĩvoya Ngai nĩ kana o na ethĩwa nĩ kwa ĩvinda ĩkuvĩ kana yĩasa, o na eka we, andũ onthe ala mambĩthukĩĩsye ũmũnthĩ methĩwe mailye takwa, ĩndĩ mate ove na nyololo takwa.”
30 Na ĩndĩ mũsumbĩ ookĩla, o vamwe na ngavana na Velinike na aũme ala mekalĩte namo. 31 Ĩndĩ maendete, mambĩĩa kũneenany’a ene kwa ene, makyasya: “Mũndũ ũũ ndekwĩka ũndũ ũtonya kũtuma oawa kana ovwa.” 32 Na ĩndĩ Akiliva amwĩa Vesito: “Mũndũ ũũ ethĩwa athaw’a ta kethĩwa ndaneeasya eenda ĩkoani yake yĩkethukĩĩw’e nĩ Kaisali.”