Kwosana na Lũka

4 Na Yesũ ausũĩtwe nĩ veva mũtheu, auma Yolotani, na veva ũsu wamũtongoesya weũnĩ 2 mĩthenya 40, aitatwa nĩ Ndevili. Na mĩthenyanĩ ĩsu ndaaya kĩndũ, na yĩla yathelile eewʼa nzaa mũno. 3 Na ĩndĩ Ndevili amwĩa: “Ethĩwa wĩ mwana wa Ngai, ĩaĩe ĩvia yĩĩ yĩtwʼĩke mũkate.” 4 Ĩndĩ Yesũ amũsũngĩa: “Nĩkũandĩkĩtwe, ‘Mũndũ ndekalaa thayũ nũndũ wa mũkate wʼoka.’”

5 Kwoou amwambatya ĩũlũ na amwonyʼa mosumbĩ onthe ma nthĩ kwa kavenyʼa. 6 Na ĩndĩ Ndevili amwĩa: “Nĩngũũnenga ũkũmũ ĩũlũ wa mosumbĩ aa onthe na ũnene wamo, nũndũ nĩnamanengiwe, nakwa nĩnengae o ũla ngwenda. 7 Kwoou, ethĩwa nũũnthaitha, * onthe meĩthĩwa me maku.” 8 Nake Yesũ amũsũngĩa, amwĩa: “Nĩkũandĩkĩtwe, ‘No Yeova Ngai waku waĩle kũmũthaitha, na nowe e weka waĩle kũmũthũkũma ũthũkũmi mũtheu.’”

9 Nĩvo ĩndĩ waendie nake Yelusaleme na amũtwaa vandũ vala vatũlu vyũ ĩkalũnĩ, na amwĩa: “Ethĩwa wĩ mwana wa Ngai, ĩyĩkye nthĩ kuma vaa, 10 nũndũ nĩkũandĩkĩtwe: ‘Akameaĩa alaĩka make ĩũlũ waku maũsũvĩe,’ 11 na, ‘Makakũkua mokonĩ moo, nĩ kana kũũ kwaku kũikatulwʼe nĩ ĩvia.’” 12 Nake Yesũ amũsũngĩa: “Nĩkũneenetwe, ‘Ndwaĩle nongi kũmũtata Yeova Ngai waku.’” 13 Kwoou Ndevili amina kũmũtata, amũtia nginya ĩvinda yĩngĩ yaĩlĩte.

14 Na Yesũ asyoka Kalilii atongoewʼe nĩ veva. Na maũndũ maseo ala maneenawa ĩũlũ wake manyaĩĩka isionĩ syonthe ila syaĩ vakuvĩ. 15 O na ĩngĩ, nĩwambĩĩe kũmanyĩsya masinakokenĩ, na nĩwanengetwe ndaĩa nĩ andũ onthe.

16 Na ĩndĩ athi Nasaleti, vala waeewe, na kwosana na ũndũ weekaa mũthenya wa Savato, alika ĩsinakokenĩ na aũngama asome. 17 Na anengwa ĩvuku ya kũkũnzwa ya mwathani Isaia, na ayĩvingũa na oona vala vaandĩkĩtwe: 18 “Veva wa Yeova wĩ ĩũlũ wakwa, nũndũ nĩwambĩtĩkĩisye mauta ndavye ngya ũvoo mũseo. Nĩwandũmie kũtavanyʼa ũthasyo kwa ala atave na kũvowʼa kwa ala ilalinda, na kũmathasya ala avinyĩĩe, 19 na kũtavanyʼa ĩũlũ wa mwaka wa Yeova ũla wĩtĩkĩlĩtwe.” 20 Amina kũsoma akũnza yĩla ĩvuku ya kũkũnzwa, ayĩnenga mũsũvĩi, na ekala nthĩ; na onthe ala maĩ ĩsinakokenĩ mamũketeea mũno. 21 Na ĩndĩ ambĩĩa kũmatavya atĩĩ: “Ũmũnthĩ ĩandĩko yĩu mweewʼa nĩyeanĩa.”

22 Na onthe mambĩĩa kumya ũkũsĩ mũseo ĩũlũ wake na kũsengʼa nũndũ wa ndeto sya mumo ila syaumaa kanywʼanĩ wake, namo maasya: “Ũũ nĩ mwana wa Yosevu, kana ti wʼo?” 23 Nake amea: “Vate nzika mũkandavya ndeto ii: ‘Mũiiti ĩvosye. Ĩka vaa kĩsionĩ kyenyu maũndũ ala twĩwʼĩte maneekiwe Kavelinaumi.’” 24 Kwoou asya: “Nĩ wʼo nĩngũmwĩa, vaiĩ mwathani wĩtĩkĩlawa kĩsionĩ kya kwoo. 25 Kwa ngelekanyʼo, nĩmũtavya wʼo: Kwaĩ ndiwa mbingĩ Isilaeli ĩvinda ya Eliya yĩla ĩtu yavingiwe myaka itatũ na myei thanthatũ, na kweethĩwa yũa ĩnene nthĩ ĩsu yonthe. 26 Ĩndĩ Eliya ndaatũmwa o na kwa ũmwe wa aka asu, ĩndĩ atũmiwe kwa ndiwa ya Nzalevathi, nthĩ ya Sitoni. 27 O na ĩngĩ, kwaĩ andũ aingĩ mawaĩte mangũ nthĩ ya Isilaeli ĩvinda ya mwathani Elisa; ĩndĩ vaiĩ ũmwe woo waathewʼa, * ate o Naamani Mũsilia.” 28 Na onthe ala meethukĩĩsye maũndũ asu ĩsinakokenĩ mathata mũno, 29 na mookĩla na mamumaalya na mĩtũkĩ nza wa ndũa, na mamũtwaa mũthyanĩ wa kĩĩma kĩla ndũa ĩsu yaakĩtwe nĩ kana mamwĩkye akakime nthĩ. 30 Ĩndĩ esĩla katĩ woo na athi.

31 Nĩvo ĩndĩ watheeie athi Kavelinaumi, ndũa ya Kalilii. Nake nĩwamanyĩasya mũthenya wa Savato, 32 na andũ masengʼa nũndũ wa nzĩa yake ya kũmanyĩsya, nĩkwĩthĩwa aneenaa na ũkũmũ. 33 Na ĩsinakokenĩ vaĩ mũndũ waĩ na veva, kana ndaimoni mbuku, nake akaya na wasya mũnene, akyasya: 34 “Ii! Ithyĩ twĩ na ũndũ mwaũ naku, Yesũ Mũnasaleti? Wooka kũtwananga? Nĩngwĩsĩ nesa nue ũũ, we nue Ũla Mũtheu wa Ngai.” 35 Ĩndĩ Yesũ amĩkanyʼa, akyasya: “Vindya na ũyuma mũndũnĩ ũũ.” Kwoou ĩtina wa kũmũvalũkya mũndũ ũsu katĩ woo, ndaimoni ĩsu yauma nthĩnĩ wake na ndyaamũũmĩsya. 36 Nĩvo onthe masengʼie na mambĩĩa kũneenanyʼa ene kwa ene, makyasya: “Ũneeni ũũ nĩ wa mũthemba mwaũ? Nũndũ nũkwĩaĩa maveva mavuku e na ũkũmũ na vinya, namo mayuma!” 37 Kwoou ũvoo ĩũlũ wake waendeea kũnyaĩĩka isionĩ syonthe ila syaĩ vakuvĩ.

38 Ĩtina wa kuma ĩsinakokenĩ, nĩwaendie mũsyĩ kwa Simoni. Na inyia wa mũka wa Simoni aĩ na ndetema mbingĩ, na mamũkũlya amũvosye. 39 Kwoou aũngama vakuvĩ nake na akanyʼa ndetema ĩsu, na yavoa. Na vau kwa vau ookĩla na ambĩĩa kũmathũkũma.

40 Ĩndĩ syũa yĩithũa, onthe ala maĩ na andũ mawaĩte mowau me kĩvathũkanyʼo mamũetee andũ asu. Nake ailĩĩla kĩla ũmwe moko, na amavosya. 41 Ndaimoni o nasyo syauma andũnĩ aingĩ iikaya na wasya mũnene: “We nue Mwana wa Ngai.” Ĩndĩ aikanyʼa na ndaasyĩtĩkĩlya ineene, nũndũ nĩsyeesĩ we nĩwe Klĩsto.

42 Ĩndĩ kwakya tene auma vau na athi vandũ vate andũ. Ĩndĩ ĩkomano yambĩĩa kũmũmantha na kĩthito na yathi vala waĩ, na yatata kũmũsiĩĩa ndakayĩtie. 43 Ĩndĩ ayĩa: “No nginya nĩtavanyʼe ũvoo mũseo wa Ũsumbĩ wa Ngai ndũanĩ ila ingĩ o nasyo, nũndũ natũmiwe kwondũ wa ũu.” 44 Kwoou aendeea kũtavanyʼa masinakokenĩ ma Yutia.