Kũtũngĩlĩĩlwa kwa Mĩao
33 Yu ũũ nĩwʼo ũathimo ũla Mose mũndũ wa Ngai ũla wa w’o watavisye Aisilaeli atanamba kũkw’a. 2 Aisye atĩĩ:
“Yeova, ookie kuma Sinaĩ,
Na amatisĩa kuma Seili.
Atisie ũtheunĩ wake mũtisu kuma iĩmanĩ sya Valani,
Na aĩ na atheu ngili mbingĩ mũno,*
Kw’okonĩ kwake kwa aũme aĩ na ngũmbaũ sya kaũ.
3 Nĩwendete andũ make;
Atheu moo onthe me kwʼokonĩ kwaku.
Mekalĩte maaũnĩ maku;
Nĩmambĩĩie kwĩthukĩĩsya ndeto syaku.
4 (Mose nĩwatwĩaĩe, atũnenga mwĩao,
Wĩthĩwe wa ũmbano wa Yakovo.)
5 Na nĩwatwʼĩkie mũsumbĩ Yesuluni,*
Yĩla aũngamĩi ma andũ moombanie vamwe,
Me na mbaĩ syonthe sya Isilaeli.
6 Eka Leũveni ekale thayũ na ndakakwʼe,
Na aũme make maikethĩwe avũthũ.”
7 Na atavisye Yuta ũathimo ũũ:
“Ĩw’a, ame Yeova, wasya wa Yuta,
Na ũimũtũnga andũnĩ make.
Moko make nĩmateteete* kĩla kyake,
Na mũtetheesye okitane na amaitha make.”
8 Aisye ũũ ĩũlũ wa Livai:
“Thumimu yaku* na Ulimu yaku nĩ sya mũndũ ũla ũlũmanasya naku,
Ũla wamũtatĩie Masa.
Nĩwambĩĩie kũkĩlanyʼa vinya nake kĩw’ũnĩ kya Meliva,
9 Mũndũ ũla watavisye ĩthe na inyia, ‘Ndyaamanenga ndaĩa.’
O na ndaaona ana-a-ĩthe ta kĩndũ,
Na nĩwavũthĩĩisye ana make mwene.
Nũndũ nĩmakwatie ndeto yaku,
Na malũmya ũtianĩo waku.
10 Eka mamanyĩsye Yakovo motw’ĩo maku
Na Isilaeli Mĩao yaku.
Eka makumĩsye ũvumba wĩ na mũuke wa kwendeesya*
Na nthembo nima kĩthembeonĩ kyaku.
11 Athima, ame Yeova, vinya wake,
Na ũyonanyʼa kana nĩwendeeawʼa nĩ wĩa wa moko make.
Tumbanga maaũ ma* ala mamũkĩlĩĩlaa,
Nĩ kana ala mamũmenete maikamũkĩlĩĩle ĩngĩ.”
12 Aisye ũũ ĩũlũ wa Mbenyamini:
“Ekai ũla wendetwe nĩ Yeova ekale e mũsũvĩĩku ũtee wake;
Amũsũvĩĩte mũthenya wʼonthe,
Akekalaa katĩkatĩ wa ituo syake.”
13 Aisye ũũ ĩũlũ wa Yosevu:
“Nthĩ yake nĩ ĩathimwe nĩ Yeova
Na syĩndũ ila nzeo sya ĩtunĩ,
Na ĩmwe na kĩwʼũ kuma mbulutinĩ* ila syĩ ĩtheo,
14 Vamwe na syĩndũ ila nzeo ietawe nĩ sua
Na ũsyao ũla mũseo kĩla mwei,
15 Vamwe na syĩndũ ila nzeo vyũ kuma iĩmanĩ sya tene*
Na syĩndũ ila nzeo sya tũlĩma tũla twĩkalaa ĩvinda yĩasa,
16 Vamwe na syĩndũ ila nzeo sya nthĩ na kĩla kĩmyusũĩte,
Na vamwe na kwĩtĩkĩlwa nĩ ũla wĩkalaa kĩkuthunĩ kĩ mĩw’a.
Ekai syũke ĩũlũ wa mũtwe wa Yosevu,
Lolotyanĩ wa ũla ũvathĩtwe kuma ana-a-ĩthenĩ make.
17 Ũseo wake ũilye ta wa nzaũ ĩla ĩsyaĩtwe mbee,
Na mbya syake ta mbya sya nzaũ ya kĩthekanĩ.
Akaluuta* ngo sya andũ nasyo
Syonthe vamwe nginya mĩthyanĩ ya nthĩ.
Mo nĩ makũmi ma makili ma Evilaimu,
Na nĩ makili ma Manase.”
18 Aisye ũũ ĩũlũ wa Nzevuluni:
“Tana, we Nzevuluni, yĩla ũkumaala,
Na we, Isakali, wĩ maeemanĩ maku.
19 Makeeta ngo sya andũ kĩĩmanĩ.
Me vau makathemba nthembo sya ũlũngalu.
20 Aisye ũũ ĩũlũ wa Ngati:
“Nĩmũathime ũla ũkũthanthasya mĩvaka ya Ngati.
Akomaa vau ta mũnyambũ,
Eyũmbanĩtye kũtembũanga kw’oko, ĩĩ, lolotya.
21 Akeenyuvĩa kĩlungu kya mbee,
Nũndũ vau kĩanda kya mũnengani wa mĩao nĩ vo kiĩtwe.
Atongoi ma andũ makoombana vamwe.
Akeanĩsya ũlũngalu wa Yeova,
Na motw’ĩo make vamwe na Aisilaeli.”
22 Aisye ũũ ĩũlũ wa Ndani:
“Ndani nĩ mũnyambũ wa mũika.
Akatũlĩla kuma Mbasani.”
23 Aisye ũũ ĩũlũ wa Navitali:
“Navitali nĩwĩanĩwe nĩ kwĩtĩkĩlwa nĩ Yeova
Na ausĩe ũathimo wake.
Mesya ngalĩko ya ũthũĩlonĩ wa sua na ngalĩko ya ĩtheo.”
24 Aisye ũũ ĩũlũ wa Aseli:
“Aseli nũathimĩtwe na ana.
Nĩ onwʼe ũseo nĩ ana-a-ĩthe,
Na aindae* maaũ make mautanĩ.
26 Vai ũngĩ ta Ngai ũla wa w’o wa Yesuluni,
Ũla wĩsĩlaa ĩtunĩ nĩ kana aũtetheesye
Na ũla wĩsĩlaa matunĩ e ũnenenĩ wake.
27 Ngai nĩ wĩvitho kuma mavindanĩ ma tene,
Moko make ma tene na tene me ungu waku.
Akalũngya mũmaitha aume mbee waku,
Na akasya, ‘Mamine!’
28 Isilaeli akekalaa e mũsũvĩĩku,
Na mbuluti ya* Yakovo ĩkekalaa yĩ yoka
Nthĩ ya lĩu wa mbaa ngetha na mbinyu nzaũ,
Ũla yayaya yake yĩkalovotangaa ĩmwe.
29 Wĩ mũtanu, we Isilaeli!
Nũũ ũilye taku,
Andũ matanĩaa ũtangĩĩo wa Yeova,
Ngao yaku ya kũũsũvĩa
Na ũvyũ waku mũnene?
Amaitha maku makeengʼutha mbee waku,
Na ũkakinyanga mĩongo yoo.”*