Ĩvuku ya Mbee ya Mavinda
28 Na ĩndĩ Ndaviti nĩwoombanĩisye anene aa onthe ma Isilaeli kũu Yelusalemu: anene ma mbaĩ, anene ma ikundi ila syathũkũmaa mũsumbĩ, anene ma makili na anene ma maana, anene ala maũngamĩe malĩ yonthe na indo sya mũsumbĩ na ala maũngamĩe ana make, o vamwe na andũ ala maĩ na ũkũmũ nyũmbanĩ ya mũsumbĩ na kĩla mũndũũme waĩ na vinya na ũtonyi. 2 Na ĩndĩ Ndaviti aũngama na asya atĩĩ:
“Mbĩthukĩĩsyei, ana-a-ĩthe makwa na andũ makwa. Waĩ wendi wa ngoo yakwa nake nyũmba yĩthĩwe ũthũmũo kwondũ wa ĩsandũkũ ya ũtianĩo wa Yeova na ĩyĩthĩwa ta kavĩla ka nyaaĩ ka Ngai wakwa, na nĩnũmbanĩtye syĩndũ sya kwaka. 3 Ĩndĩ Ngai ũla wa w’o ambĩie, ‘Ndwĩaka nyũmba kwondũ wa ĩsyĩtwa yakwa, nĩkwĩthĩwa wĩ mũndũũme wa makaũ, na nĩwĩtĩkĩtye nthakame.’ 4 Ĩndĩ o na ũu wĩ o vo, Yeova Ngai wa Isilaeli nĩwanyuvie kuma nyũmbanĩ yonthe ya ĩthe wakwa nĩthĩwe mũsumbĩ ĩũlũ wa Isilaeli tene na tene, nĩkwĩthĩwa nĩwanyuvie Yuta ethĩwe mũtongoi, na kuma nyũmbanĩ ya Yuta, anyuva nyũmba ya ĩthe wakwa, na ananĩ ma ĩthe wakwa, ninyie weetĩkĩlile nĩthĩwe mũsumbĩ ĩũlũ wa Isilaeli yonthe. 5 Na ananĩ makwa onthe, nũndũ Yeova nũnengete ana aingĩ, nĩwanyuvie mwanawa Solomoni ekalĩle kĩvĩla kya ũsumbĩ kya Yeova asumbĩke Isilaeli.
6 “Ambĩie, ‘Mwana waku Solomoni nĩwe ũkaka nyũmba yakwa na iwanza syakwa, nĩkwĩthĩwa nĩnĩmũnyuvĩte ethĩwe mwana wakwa na ngatwʼĩka ĩthe wake. 7 Ngalũlũmĩĩlya ũsumbĩ wake tene na tene ethĩwa akaatĩĩaa mĩao yakwa vyũ o vamwe na motwʼĩo makwa, o tondũ ũendeee kwĩka yu.’ 8 Kwoou nĩneena ũũ mbee wa metho ma Aisilaeli onthe, ũmbano wa Yeova, na matũnĩ ma Ngai witũ: Atĩĩai nesa na mũimantha mĩao yonthe ya Yeova Ngai wenyu, nĩ kana mũtonye kũmesya nthĩ nzeo na mũimĩtiĩa ana menyu yĩthĩwe ũtiĩwa wa ĩvinda yonthe.
9 “Naku Solomoni mwanawa, manya Ngai wa ĩthe waku na ũimũthũkũma na ngoo ĩlũmanĩtye vyũ nake* na thayũ* mũtanu,* nũndũ Yeova nũthianaa ngoo syonthe, na nũmanyaa ieleelo syonthe sya mosũanĩo. Wamũmantha, akaeka ũmwone, ĩndĩ wamũtia, akakũlea tene na tene. 10 Sisya, yu, Yeova nũkũnyuvĩte wake nyũmba yĩthĩwe vandũ vatheu. Ĩthĩwa na ũkũmbaũ na ũithi wĩanĩ.”
11 Na ĩndĩ Ndaviti anenga mwanae Solomoni mũsolo wa valanda na nyũmba syavo, tũlumu twavo twa kwia syĩndũ, tũsũmba twavo twa ĩũlũ, tũsũmba twavo twa nthĩnĩ, na nyũmba ya ngunĩko ya wĩwʼanĩthyo.* 12 Nĩwamũnengie mũsolo wa kĩla kĩndũ waveveewe kĩkonetye iwanza sya nyũmba ya Yeova, tũlumu twʼonthe twa kũĩĩa tũla tũmĩthyũlũlũkĩte, vala vaiawa ũthwii wa nyũmba ya Ngai ũla wa w’o, na vala vaiawa ũthwii wa syĩndũ ila itheetwʼe;* 13 o na ĩngĩ, ĩũlũ wa ikundi sya athembi na sya Alivai, ĩũlũ wa mawĩa onthe ma ũthũkũmi wa nyũmba ya Yeova, na ĩũlũ wa mĩio yonthe ya ũthũkũmi wa nyũmba ya Yeova; 14 o na ĩũlũ wa ũito wa thaavu, thaavu wa mĩio yonthe ya ũthũkũmi wĩ kĩvathũkanyʼo, ũito wa mĩio yonthe ya vetha, na ĩũlũ wa mĩio yonthe ya ũthũkũmi wĩ kĩvathũkanyʼo; 15 o na ĩngĩ, ũito wa syĩndũ sya kwilĩĩla taa sya thaavu na taa syasyo sya thaavu, ũito wa syĩndũ syĩ kĩvathũkanyʼo sya kwilĩĩla taa na taa syasyo, ũito wa syĩndũ sya kwilĩĩla taa sya vetha, ĩũlũ wa kĩla kĩndũ kya kwilĩĩla taa na taa syakyo kwosana na wĩa wakyo; 16 o na ũito wa thaavu wa mesa sya ĩla mĩkate ĩvangawa tũkundi ĩilĩanĩlwʼe,* ĩũlũ wa kĩla mesa, o vamwe na vetha kwondũ wa mesa sya vetha, 17 ĩũlũ wa ũma, mbakũli, ngyaki sya thaavu mũtheu, na ũito wa tũvakũli twa thaavu, ĩũlũ wa kĩla kavakũli, na ũito wa tũvakũli twa vetha, ĩũlũ wa kĩla kavakũli. 18 O na ĩngĩ, nĩwanenganie ũito wa thaavu mũtheu kwondũ wa kĩthembeo kya ũvumba na kwondũ wa ũla mũvwʼano wa ĩkasya, nawʼo nĩ, ala akelũvi ma thaavu matambũũkĩtye nthwau syoo na makavwʼĩka ĩsandũkũ ya ũtianĩo wa Yeova. 19 Ndaviti aisye atĩĩ: “Kw’oko kwa Yeova kwaĩ ĩũlũ wakwa, na nĩwanengie ũtonyi wa kũelewa maũndũ nĩ kana nĩandĩke kĩla kĩndũ ĩũlũ wa mũsolo ũsu.”
20 Na ĩndĩ Ndaviti eea mwanae Solomoni atĩĩ: “Ĩthĩwa na ũkũmbaũ na vinya na ũithi wĩanĩ. Ndũkakĩe kana ũteleme, nĩkwĩthĩwa Yeova Ngai, Ngai wakwa, e vamwe naku. Ndakaema kũũtetheesya kana aũtie, ĩndĩ akeethĩwa vamwe naku nginya wĩa wʼonthe wa ũthũkũmi wa nyũmba ya Yeova ũthele. 21 Na ii nĩsyo ikundi sya athembi na sya Alivai kwondũ wa ũthũkũmi wʼonthe wa nyũmba ya Ngai ũla wa w’o. Wĩ na athũkũmi me na wendi, na me na ũtũĩka ũthũkũminĩ wa kĩla mũthemba, o vamwe na anene na andũ onthe ala makeanĩasya maũndũ onthe ala weyĩaa.”