Ĩvuku ya Mbee ya Mavinda

5 Aa nĩmo ana ma Leũveni, mwana ũla mũkũũ wa Isilaeli. Nĩwe waĩ mwana ũla mũkũũ, ĩndĩ nũndũ nĩwavukisye kĩtanda kya ĩthe wake, kĩanda kyake kya mwana ũla mũkũũ nĩkyanengiwe ana ma Yosevu mwana wa Isilaeli, na kwoou lekotinĩ ya masyĩtwa ma andũ ma mĩsyĩ yoo ndaatalwa ta we mwana ũla mũkũũ. 2 O na kau Yuta aĩ mũnene kwĩ ana-a-ĩthe na mũtongoi aumie kwake, kĩanda kya mwana ũla mũkũũ kyaĩ kya Yosevu. 3 Ana ma Leũveni mwana ũla mũkũũ wa Isilaeli maĩ Anoki, Valu, Esiloni, na Kalimi. 4 Ana ma Yoeli maĩ Semaia mwana wake, Ngoki mwana wake, Simei mwana wake, 5 Mika mwana wake, Leaia mwana wake, Mbaali mwana wake, 6 na Mbeela mwana wake, ũla Mũsumbĩ Tilikathi-vilineseli wa Asuli watwaie ũtavwanĩ; aĩ mũnene wa Aleũveni. 7 Ana-a-ĩthe kwosana na lekoti sya mĩsyĩ yoo maĩ Yeieli, ũla waĩ mũtongoi woo, Nzekalia, 8 na Mbela mwana wa Asasi mwana wa Sema mwana wa Yoeli, ũla wekalaa kĩsionĩ kĩla kyumĩte Aloeli nginya Nevo na Mbaali-meoni. 9 Na kĩsio kĩla matwĩe ngalĩko ya wumĩlonĩ wa sua kyavikĩte vala weũ wambĩĩe Ũsĩnĩ wa Euvalati, nĩkwĩthĩwa indo syoo syaĩ inaingĩva mũno nthĩ ya Ngileati. 10 Mĩthenyanĩ ya Saũlo nĩmokitie na Aakali, na mamasinda, kwoou matũa maeemanĩ moo kĩsionĩ kyonthe kĩla kĩ ngalĩko ya wumĩlonĩ wa sua ya Ngileati.

11 Yu nzyawa sya Ngati syekalaa vakuvĩ namo nthĩ ya Mbasani nginya Saleka. 12 Me Mbasani, Yoeli nĩwe waĩ mũtongoi woo, akaatĩĩwa nĩ Savamu, o na Yanai na Savati maĩ o vo. 13 Na ana-a-ĩthe ma nyũmba sya aa-ĩthe moo maĩ Mikaeli, Mesulamu, Sieva, Yolai, Yakani, Nzia, na Eveli, onthe maĩ mũonza. 14 Asu nĩmo maĩ ana ma Aviaili mwana wa Uuli mwana wa Yaloa mwana wa Ngileati mwana wa Mikaeli mwana wa Yesisai mwana wa Yato mwana wa Mbusi. 15 Ai mwana wa Avitieli mwana wa Nguni nĩwe waĩ mũũngamĩi wa nyũmba ya aa-ĩthe moo. 16 Mekalaa Ngileati, Mbasani, na tũtũla twayo,* na isesinĩ syonthe sya Saloni nginya kũla ithelele. 17 Onthe nĩmatalanilwʼe lekotinĩ sya mĩsyĩ yoo mĩthenyanĩ ya Mũsumbĩ Yothamu wa Yuta na mĩthenyanĩ ya Mũsumbĩ Yelovoamu* wa Isilaeli.

18 Ita sya Aleũveni, Angati, na nusu ya mbaĩ ya Manase syaĩ na ngũmbaũ sya kaũ 44,760 ila syakuaa ngao na mbyũ na syaĩ na mbũta,* na syaĩ manyĩsye kaũ. 19 Nĩmokitie na Aakali, Yetuli, Navisi, na Notavu. 20 Na nĩmatetheeiwʼe kũmokita, nginya Aakali na onthe ala maĩ vamwe namo manenganwe kwʼokonĩ kwoo, nũndũ nĩmamwĩkaĩlile Ngai amatetheesye kaũnĩ, nake eethukĩĩsya kwĩsũvana kwoo nũndũ nĩmamũĩkĩĩie. 21 Na nĩmoosie indo syoo: ngamĩle 50,000, malondu 250,000, na mangʼoi 2,000; o vamwe na andũ* 100,000. 22 Andũ aingĩ nĩmakwie, nũndũ Ngai ũla wa w’o nĩwe wokitie kaũ ũsu. Na nĩmatũie vala mekalaa nginya yĩla mataviwe.

23 Nzyawa sya nusu ya mbaĩ ya Manase syekalaa nthĩ ĩla yumĩte Mbasani nginya Mbaali-elimoni na Senili na Kĩĩma kya Elimoni. Syaĩ mbingĩ mũno. 24 Aa nĩmo maĩ aũngamĩi ma nyũmba sya aa-ĩthe: Evieli, Isi, Elieli, Asilielu, Yelemia, Otavia, na Yatieli; maĩ ngũmbaũ sya kaũ, aũme me nguma, na aũngamĩi ma nyũmba sya aa-ĩthe. 25 Ĩndĩ mayaaĩthĩwa me aĩkĩĩku kwa Ngai wa aa-ũmae moo na nĩmeekie ũmalwaya na ngai sya ngo sya andũ sya nthĩ ĩsu, ila Ngai waminĩte ikauma mbee woo. 26 Kwoou Ngai wa Isilaeli nĩwathangaaisye veva wa Mũsumbĩ Vulu wa Asuli (ũla no we Mũsumbĩ Tilikathi-vilineseli wa Asuli) na kĩu kyatuma atava Aleũveni, Angati, na nusu ya mbaĩ ya Manase na amatwaa Aalaa, Avoli, Aala, na ũsĩnĩ wa Ngosani, na no vo maĩ nginya ũmũnthĩ.