Valũa wa Kelĩ kwa Timotheo

4 Nĩngũkwĩaĩa kwa ũito mbee wa Ngai na Klĩsto Yesũ, ũla ũkasilĩla ala me thayũ na ala akwʼũ, kwĩsĩla kumĩla kwake na kwĩsĩla Ũsumbĩ wake: 2 Tavanyʼa ĩla ndeto; ĩka ũu na mĩtũkĩ mavindanĩ ala maĩle na ala momũ; onyʼa andũ mavĩtyo, kanyʼa, taa. Ĩka ũu wĩ na wũmĩĩsyo wʼonthe na wĩ na ũtũĩka wa kũmanyĩsya. 3 Nĩkwĩthĩwa ve ĩvinda matakomĩĩsya momanyĩsyo ala maseo, * ĩndĩ kwosana na mawendi moo, makeeyũmbanĩsya amanyĩsya nĩ kana matũ moo matanĩthwʼe. * 4 Makaeka kwĩthukĩĩsya ũla wʼo na mayĩthukĩĩsya ngewa sya ũvũngũ. 5 Ĩndĩ we, sũvĩa kĩlĩko kyaku maũndũnĩ onthe, ũmĩĩsya mawũmũ, tethya wĩa wa mũtavanyʼa, ĩanĩsya ũthũkũmi waku.

6 Nũndũ nyie nĩngũtulũlwa ta nthembo ya mbinyu, na ĩvinda ya kũthawʼa kwakwa yĩ vakuvĩ. 7 Nĩnũkitĩte kaũ ũla mũseo, nĩnĩsembete mathaũnĩ ma kũsemba ngamina, nĩnĩlũmĩtye ũla mũĩkĩĩo. 8 Kuma yu na kũendeea, nĩniĩwe ngovia ya ũlũngalu, ĩla Mwĩaĩi, ũla nĩwe mũsili mũlũngalu, ũkanenga ta ĩtuvi mũthenya ũsu, na tinyie nĩ nyioka, ĩndĩ o na onthe ala meteelaa na mea kumĩla kwake.

9 Tata ũndũ ũtonya wũke kũla nĩĩ mĩtũkĩ. 10 Nĩkwĩthĩwa Ndema nĩwandiie nũndũ nĩwendie maũndũ ma ĩvinda yĩĩ, * na nĩwaendie Thesalonika, nake Keliseke athi Kalatia, na Tito athi Ndalamatia. 11 Luka nowe nĩ nake vaa. Ũka na Maliko, nũndũ akandetheesya mũno ũthũkũminĩ. 12 Ĩndĩ nĩnĩmũtũmie Tikiko athi Eveso. 13 Ũyũka ndetee ĩla kanzũ natiie Teloa yĩ na Kalivo, na ala mavuku ma kũkũnzwa, na mũno mũno ala ma kĩthuma.

14 Alekisanda ũla mũtui wa syĩndũ sya ũthuku * ambĩkie maũndũ mathũku mũno. Yeova akamũĩva kwosana na meko make. 15 O naku waĩle kwĩsũvĩana nake, nũndũ nĩwavĩngie ndeto sitũ mũno.

16 Ĩvinda yakwa ya mbee ya kwĩtetea vaiĩ mũndũ waaũngama vamwe nakwa, ĩndĩ onthe nĩmandiie. Ngai ndakamatalĩle ĩvĩtyo yĩu. 17 Ĩndĩ Mwĩaĩi nĩwaũngamie vakuvĩ nakwa na ambĩkĩa vinya nĩ kana kwĩsĩla nyie, wĩa wa kũtavanyʼa ũtethwʼe vyũ na mbaĩ syonthe iwĩwʼe; na nĩnavonokiwʼe kuma kanywʼanĩ wa mũnyambũ. 18 Mwĩaĩi akambonokya kuma kĩla wĩanĩ mũthũku na akandangĩĩa kwondũ wa Ũsumbĩ wake wa ĩtu. Nguma nĩ syake tene na tene. Ameni.

19 Ngethesye Vilisika na Akwila, na nyũmba ya Onesivolo.

20 Elasito atiiwe Kolintho, ĩndĩ Telovimo nĩmũtiie Mileto e mũwau. 21 Tata ũndũ ũtonya ũvike ĩvinda ya mbevo yĩtanamba kũvika.

Nĩwakethwʼa nĩ Euvulo vamwe na Vuteni, Leno, Kilautia, na ana-a-asa onthe.

22 Mwĩaĩi nĩethĩwe na veva ũla wonanasya. Ũseo wake mwingĩ nĩwĩthĩwe vamwe naku.