Kwosana na Maliko
4 Na ĩngĩ, ambĩĩa kũmanyĩsya e ũtee wa ũkanga na ĩkomano ĩnene mũno yoombana vakuvĩ nake. Kwoou alika ĩsiwanĩ, * ekala nthĩ, na athi vaasanga na ũtee wa ũkanga, ĩndĩ ĩkomano yonthe yaĩ vakuvĩ na kĩwʼũ, ũtee wa ũkanga. 2 Na ambĩĩa kũmamanyĩsya maũndũ maingĩ aitũmĩa ngelekanyʼo, na aendeee kũmamanyĩsya, amea: 3 “Ĩthukĩĩsyei. Sisyai! Mũvandi nĩwaendie kũvanda mbeũ. 4 Na aendeee kũvanda, mbeũ imwe syavalũka ũtee wa nzĩa, na nyũnyi syooka syaiya. 5 Na ingĩ syavalũka vandũ ve mavia na vate mũthanga mwingĩ, na syamea mĩtũkĩ nũndũ mũthanga ndwaĩ mũliku. 6 Ĩndĩ yĩla syũa yaaie, nĩsyavĩe na syavova nũndũ iyaĩ na mĩi. 7 Ingĩ nasyo syavalũka katĩ wa mĩtĩ yĩ mĩwʼa, na mĩwʼa yainyita, na syalea kũsyaa kĩndũ. 8 Ĩndĩ ingĩ nasyo syavalũka mũthanganĩ mũseo, na syeana na kwongeleka, na syambĩĩa kũsyaa, na syasyaa kũndũ 30, 60, na kũndũ 100.” 9 Na ongela kwasya atĩĩ: “Ũla wĩ na matũ ma kwĩwʼa, nĩewʼe.”
10 Na yĩla waĩ weka, ala mamũthyũlũlũkĩte me na ala Ĩkũmi na Elĩ mambĩĩa kũmũkũlya ĩũlũ wa ngelekanyʼo isu. 11 Nake amea: “Inywʼĩ nĩmũnengetwe kũmanya syĩmbithĩ ntheu sya Ũsumbĩ wa Ngai, ĩndĩ ala me nza, maũndũ asu onthe kwoo no ngelekanyʼo, 12 nĩ kana wĩthĩe, o na kau nĩmeũsisya, mesisya na maikwona, o na kau nĩmekwĩwʼa, meĩwʼa na maiũkwatya kĩndũ; o na mayĩsa kũalyũka nĩ kana maekewe.” 13 Na ĩndĩ amea: “Inywʼĩ mũyĩsĩ ngelekanyʼo ĩno, kwoou mũtonya kũelewa ata ngelekanyʼo ila ingĩ syonthe?
14 “Mũvandi avandaa ndeto. 15 Aa nĩmo ĩndĩ ila mbeũ syĩ ũtee wa nzĩa vala ndeto ĩvandĩtwe; ĩndĩ ĩtina wa kũmĩwʼa oou, Satani ayũka na ayosa ĩla ndeto ĩvandĩtwe nthĩnĩ woo. 16 O ta ũu, aa nĩmo ila ivandĩtwe vandũ ve mavia; meewʼa ĩla ndeto oou, maimĩtĩkĩla na ũtanu. 17 Ĩndĩ nũndũ mai na mĩi nthĩnĩ woo, maendeeaa kwa kavinda kakuvĩ; na mathĩna kana monyamao maumĩla oou nũndũ wa ĩla ndeto, mailulutĩka. 18 Na ve ingĩ ivandĩtwe katĩ wa mĩtĩ yĩ mĩwʼa. Isu syĩonanyʼa ala mewʼĩte ndeto, 19 ĩndĩ mawĩmakĩo ma nthĩ ĩno, na vinya wa ũkengani wa ũthwii na mawendi ma syĩndũ ila ingĩ syonthe, mailika nthĩnĩ woo na mainyita ĩla ndeto na ĩilea kũsyaa. 20 Na mũthya, ila ivandĩtwe mũthanganĩ mũseo syĩonanyʼa ala mewʼaa ndeto na maimyosa nesa na maisyaa ũsyao—kũndũ 30, 60, na kũndũ 100.”
21 O na ĩngĩ nĩwameie atĩĩ: “Taa nũetawe nĩ kana ũkunĩkĩlwʼe kĩkavũ * kana wiwe ungu wa kĩtanda? Wʼo ndũetawe nĩ kana wilĩĩlwe kĩndũnĩ kya kwilĩĩla taa? 22 Nũndũ vaiĩ ũndũ mũvithe ũtakavuanwʼa; na vaiĩ kĩndũ kĩvwʼĩke nesa kĩtakaumĩlwʼa ũtheinĩ. 23 Mũndũ o na wĩva ũla wĩ na matũ ma kwĩwʼa, nĩewʼe.”
24 Na aendeea kũmea atĩĩ: “Ĩthukĩĩsyei nesa maũndũ ala mũkwĩwʼa. Kĩthimi kĩla mũthimaa nakyo nokyo mũkathimĩwa nakyo, ĩĩ, o na mũkongeleelwa. 25 Nũndũ mũndũ o na wĩva ũla wĩ na kĩndũ akongeleelwa, ĩndĩ mũndũ o na wĩva ũla ũte na kĩndũ, o na kĩla wĩ nakyo akavenwa.”
26 Na aendeea kũneena namo, akĩmea: “Kwa nzĩa ĩsu Ũsumbĩ wa Ngai ũilye ta yĩla mũndũ wavanda mbeũ mũthanganĩ. 27 Nũkomaa ũtukũ na aiamũka mũthenya, na mbeũ ĩimea na kũasava—na we mwene ndethĩawa esĩ nĩ kwa nzĩa yĩva. 28 Na mũthanga nĩwumĩlasya ũsyao o kavola kwa kavola, mbee nĩ ĩtũ, na ĩndĩ kĩia, na mũthya mbeke mbusũu kĩianĩ. 29 Na lĩu weewʼa, nĩwosaa kavyũ ke ngoto, nũndũ ĩvinda ya ngetha nĩ ĩviku.”
30 Na aendeea kwasya atĩĩ: “Ũsumbĩ wa Ngai tũtonya kũũvwʼananyʼa na kyaũ, kana tũtonya kũtũmĩa ngelekanyʼo yĩva kũũelesya? 31 Ũilye ta mbeũ ya kalatali, ĩla ĩvinda ya kũvandwa mũthanganĩ yĩthĩawa yĩ nini vyũ katĩ wa mbeũ syonthe ĩũlũ wa nthĩ. 32 Ĩndĩ yavandwa, nĩyĩanaa na kũneneva kwĩ mboka syonthe sya mũũndanĩ na ĩitwʼĩka mũtĩ wĩ na mbonge nene, ũkethĩa nyũnyi sya yayaya nitonya kũkwata wĩkalo muunyĩnĩ wawʼo.”
33 Nĩwatũmĩie ngelekanyʼo mbingĩ sya mũthemba ũsu kũmatavya ĩla ndeto, kwosana na ũndũ maĩ matonya kwĩthukĩĩsya. 34 Kwa wʼo, ndaneenaa namo atatũmĩĩte ngelekanyʼo, ĩndĩ nĩwamaeleasya amanyĩwʼa make maũndũ onthe yĩla wĩ namo me oka.
35 Na mũthenya o ũsu, yĩla kwavikie wĩoo, amea atĩĩ: “Ekai tũinge mũingo ũya ũngĩ wa ũkanga.” 36 Kwoou ĩtina wa kũmbũũkya ĩkomano, mamũtwaa ĩsiwanĩ, ailye o ũndũ wailye, na vaĩ masiwa angĩ maendanisye vamwe na yĩu. 37 Na kĩuutani kyaĩ na vinya kyookĩlanyʼa, na itulumo syaendeea kũkima yĩla ĩsiwa, na kũlikya kĩwʼũ nthĩnĩ, nginya weethĩa yĩkilyĩ kusũa. 38 Ĩndĩ Yesũ aĩ ngalĩko ya ĩtina akomeee kamũto. * Kwoou mamũamũkya, makyasya: “Mũmanyĩsya, we ndũũmanya kana tũkilyĩ kũthela?” 39 Eewʼa ũu ookĩla na akanyʼa kĩseve, na awĩa ũkanga: “Usya! Kilya!” na kĩseve kyausya, na kweethĩwa na ũuu mũnene. 40 Kwoou amea: “Nĩkĩ mwĩ na wia wingĩvĩte ũu? Inywʼĩ mũi na mũĩkĩĩo o na ũmwe?” 41 Ĩndĩ makwatwa nĩ wia mwingĩ mũno, na maneenanyʼa ene kwa ene, makyasya: “We ũũ kwa wʼo nũũ? O na kĩseve na ũkanga nikũmwĩwʼa.”