Ũvuanyʼo kwa Yoana

22 Na ambony’a ũsĩ wa kĩw’ũ kya thayũ, mũtheu ta kĩoo, wumĩte kĩla kĩvĩlanĩ kya ũsumbĩ kya Ngai na kya kala Kalondu 2 ũkesĩla katĩ wa ĩla nzĩa nene. Na ndee syelĩ sya ũsĩ ũsu syaĩ na mĩtĩ ya thayũ ĩla yasyaaa matunda mavinda 12, na yasyaaa kĩla mwei. Na matũ mayo maĩ ma kũvosya mbaĩ.

3 Na vaikethĩwa kĩumo nongi. Ĩndĩ kĩvĩla kya ũsumbĩ kya Ngai na kya kala Kalondu kĩkeethĩwa ndũanĩ ĩsu, na ngombo syake ikamũthũkũma ũthũkũmi mũtheu; 4 na makoona ũthyũ wake na ĩsyĩtwa yake yĩkeethĩwa itulyanĩ syoo. 5 Na ũtukũ ndũkethĩwa vo nongi, o na vaikethĩwa vata wa taa kana kyeni kya syũa, nũndũ Yeova Ngai nĩwe ũkamamulĩkĩla, na makasumbĩka me asumbĩ tene na tene.

6 Na ambĩa: “Ndeto ii nĩ sya kũĩkĩĩka na nĩ sya w’o; ĩĩ, Yeova, Ngai ũla waveveeie athani, nĩwatũma mũlaĩka wake nĩ kana ony’e ngombo syake maũndũ ala matatĩa kwĩkĩka o mĩtũkĩ. 7 Sisya! Nĩnũkĩte mĩtũkĩ. Nĩ mũtanu mũndũ ũla ũkwataa ndeto sya wathani wa ĩvuku yĩĩ ya kũkũnzwa.”

8 Nyie Yoana, ninyie neewie na noona maũndũ asu. Yĩla namonie na namew’a, nĩnavalũkile maaũnĩ ma mũlaĩka ũsu wambonasya maũndũ asu nĩ kana nĩmũthaithe. 9 Ĩndĩ ambĩa: “Ĩsũvĩe! Ndũkeke ũu! Nyie nĩ ngombo o taku na ana-a-asa maku athani na ala makwataa ndeto sya ĩvuku yĩĩ ya kũkũnzwa. Mũthaithe Ngai.”

10 Na ambĩa: “Ndũkekĩe ũsiĩlo ndeto sya wathani wa ĩvuku yĩĩ ya kũkũnzwa, nũndũ ĩvinda yĩla yĩnyuvĩtwe yĩ vakuvĩ. 11 Eka ũla ũte mũlũngalu aendeee kwĩthĩwa ate mũlũngalu, na ũla mũvuku aendeee kwĩthĩwa e mũvuku; ĩndĩ eka ũla mũlũngalu aendeee kwĩthĩwa e mũlũngalu, na ũla mũtheu aendeee kwĩthĩwa e mũtheu.

12 “‘Sisya! Nĩnũkĩte mĩtũkĩ, na ĩtuvi yĩla nĩnenganae nĩ nayo, na ngaĩva kĩla ũmwe kwosana na wĩa wake. 13 Ninyie Aliva na Omeka, * wa mbee na wa mũthya, mwambĩlĩlyo na mũminũkĩlyo. 14 Nĩ atanu ala mathambĩtye kanzũ syoo, nĩ kana methĩwe na ũkũmũ wa kũthi ĩla mĩtĩnĩ ya thayũ, na nĩ kana makwate mwanya wa kũlika ĩla ndũanĩ mesĩle mĩvĩanĩ yayo. 15 Nza ve ngitĩ, * na ala mekaa maũndũ makonetye kũneenany’a na maveva, na ilaalai, * na oaani, na athaithi ma mĩvw’anano, na kĩla mũndũ wendete ũvũngũ na ũkenganaa.’

16 “‘Nyie Yesũ, natũma mũlaĩka wakwa nĩ kana aumye ũkũsĩ kũla ũĩ ĩũlũ wa maũndũ aa ma kũtetheesya ikundi. Ninyie mwĩi na ũsyao wa Ndaviti na ndata ya kwakya ĩtisĩte.’”

17 Na veva na mũtwawa maendeeaa kwasya, “Ũka!” na ũla wĩw’aa asye, “Ũka!” na mũndũ o na wĩva ũla wĩ na waũni nĩ oke; na eka mũndũ o na wĩva ũla ũkwenda ose kĩw’ũ kya thayũ mana.

18 “Nĩumya ũkũsĩ kwa mũndũ o na wĩva ũla wĩw’aa ndeto sya wathani wa ĩvuku yĩĩ ya kũkũnzwa: Ethĩwa mũndũ o na wĩva akongela ũndũ maũndũnĩ asu, Ngai akamwongeleela mothĩny’o ala maandĩkĩtwe ĩvukunĩ yĩĩ ya kũkũnzwa; 19 na ethĩwa mũndũ o na wĩva akaola kĩndũ o na kĩva ndetonĩ sya wathani ũũ wa ĩvuku yĩĩ ya kũkũnzwa, Ngai akaveta kĩanda kyake kuma maũndũnĩ ala maandĩkĩtwe ĩvukunĩ yĩĩ ya kũkũnzwa, na ndakamwĩtĩkĩlya kũya matunda ma ĩla mĩtĩ ya thayũ na ndakamwĩtĩkĩlya kũlika ĩla ndũanĩ ntheu.

20 “Ũla umasya ũkũsĩ wa maũndũ aa easya, ‘Ĩĩ, nĩnũkĩte mĩtũkĩ.’”

“Ameni! Ũka, Mwĩaĩi Yesũ.”

21 Ũseo mwingĩ wa Mwĩaĩi Yesũ nĩwĩthĩwe na atheu onthe.