Valũa wa Mbee kwa Akolintho

9 Nyie ndi mũthasye? Nyie ndi mũtũmwa? Nyie ndyaaona Yesũ Mwĩaĩi waitũ? Inywʼĩ mũi wĩa wakwa nthĩnĩ wa Mwĩaĩi? 2 O na ethĩwa ndi mũtũmwa kwa ala angĩ, kwa wʼo ki nyie nĩ mũtũmwa kwenyu! Nũndũ mwĩ ũsiĩlo wa kũĩkĩĩthya kana nyie nĩ mũtũmwa nthĩnĩ wa Mwĩaĩi.

3 Ũũ nĩwʼo ngwĩtetea kwa ala manzilĩlaa: 4 Twĩ na ũthasyo * wa kũya na kũnywʼa, kana tũi nawʼo? 5 Twĩ na ũthasyo wa kĩla ũmwe witũ kũendanasya na mũka wake mwĩtĩkĩli, o ta atũmwa ala angĩ na ana-a-asa ma Mwĩaĩi na Keva, * kana tũi nawʼo? 6 Kana no Valanava nakwa tũte na ũthasyo wa kũeka kũtethya wĩa nĩ kana tũkwate kya kwĩtethya nakyo? 7 Nĩ mũsikalĩ wĩva wĩyĩũngamĩaa ngalama syake sya wĩanĩ? Nũũ ũvandaa mĩsavivũ mũũndanĩ wake na ũyĩthĩa ndaya matunda mayo? Kana nũũ ũĩthasya na ndesa kũnywʼa ĩia ya indo isu?

8 Nĩneena maũndũ aa kwosana na ũndũ andũ monaa maũndũ? Kana Mĩao ndĩneenete ĩũlũ wa maũndũ aa? 9 Nũndũ nĩkũandĩkĩtwe ũũ Mĩaonĩ ya Mose: “Ndũkove nzaũ kanywʼa ĩvinda yĩla ĩendeee kũvũa ngetha.” We Ngai ethĩawa aithĩnĩkĩa nzaũ? 10 Kana ndeto isu ndaineenie kwondũ witũ? Ndeto isu syaandĩkiwe kwondũ witũ, nũndũ mũndũ ũla ũĩmaa na ũla ũvũaa kĩla kyakethwa mekaa ũu me na wĩkwatyo kana makakwata kĩndũ.

11 Ethĩwa nĩtwavandie syĩndũ sya kĩ-veva katĩ wenyu, nĩ ũndũ mũnene kwitũ kũketha syĩndũ sya kĩ-mwĩĩ sya kwĩtethya nasyo kuma kwenyu? 12 Ethĩwa andũ angĩ me na ũthasyo wa kwĩtya syĩndũ isu, yo ti ithyĩ twĩ na ũthasyo mwingĩ wa kwĩka ũu? Ĩndĩ o na ũu wĩ o vo, tũyaatũmĩa ũthasyo * ũsu, ĩndĩ tũendeee kũmĩĩsya maũndũ onthe nĩ kana tũikese kũsiĩĩa ũvoo mũseo ĩũlũ wa Klĩsto kwa nzĩa o na yĩva. 13 No mwĩsĩ kana aũme ala matethasya wĩa mũtheu maĩsaa syĩndũ ila syĩ ĩkalũnĩ, na ala matethasya wĩa kĩla ĩvinda kĩthembeonĩ nĩmakwataa kĩlungu kyoo kuma kĩthembeonĩ? 14 O ta ũu, Mwĩaĩi nĩwaumisye mwĩao kwondũ wa ala matavanasya ũvoo mũseo makwatae syĩndũ sya kwĩtethya kumana na ũvoo mũseo.

15 Ĩndĩ ndyaatũmĩa o na ũmwe katĩ wa maũndũ asu. Ndinaandĩka ũu nĩ kana nĩkwe maũndũ asu, nũndũ kavaa nyie ngakwʼa kũte kwĩka ũu. Vai mũndũ ũtonya kũveta kĩtumi kyakwa kya kwĩkathĩĩa! 16 Ethĩwa nĩngũtavanyʼa ũvoo mũseo, kĩu ti kĩtumi kya kwĩkathĩĩa, nũndũ ũu nĩwʼo naĩle kwĩka. Kwa wʼo kyeva nĩ kwakwa ethĩwa ndiũtavanyʼa ũvoo mũseo! 17 Ethĩwa ngatethya wĩa ũũ na ngenda, ve ĩtuvi; ĩndĩ o na ethĩwa ngaũtethya ndekwenda, nĩ o na ũthũkũmi nĩnengetwe. 18 Kwoou, ĩtuvi yakwa nĩ yĩva? Nĩ yĩla ngũtavanyʼa ũvoo mũseo nĩke ũu vate ndĩvi, nĩ kana ndikese kũtũmĩa naĩ ũkũmũ * ũla nĩ nawʼo nthĩnĩ wa ũvoo mũseo.

19 Nũndũ o na kau nĩ mũthasye kumana na andũ onthe, nĩnĩtwʼĩkĩthĩtye ngombo kwa onthe, nĩ kana nĩkwate andũ aingĩ ũndũ vatonyeka. 20 Kwa Ayuti natwʼĩkie ta Mũyuti nĩ kana nĩkwate Ayuti; kwa ala me ungu wa mĩao nakwa neethĩiwe ta nĩ ungu wa mĩao, o na kau nyie mwene ndi ungu wa mĩao, nĩ kana nĩkwate ala me ungu wa mĩao. 21 Kwa ala mate na mĩao natwʼĩkie ta nde na mĩao, o na kau ti atĩ ndi na mĩao ya Ngai ĩndĩ nĩ ungu wa mĩao ya Klĩsto, nĩ kana nĩkwate ala mate na mĩao. 22 Kwa ala onzu natwʼĩkie ta nĩ mwonzu, nĩ kana nĩkwate ala onzu. Nĩtwʼĩkĩte maũndũ onthe kwa andũ ma mĩthemba yonthe, nĩ kana kwa nzĩa syonthe nĩtonye kũtangĩĩa amwe. 23 Ĩndĩ nĩkaa maũndũ onthe kwondũ wa ũvoo mũseo, nĩ kana nĩũtavye angĩ.

24 No mwĩsĩ kana nthĩnĩ wa mathaũ ma kũsemba asembi onthe nĩmasembaa, ĩndĩ no ũmwe ũkwataa mũthĩnzĩo? Sembai kwa nzĩa mũtonya kũsinda mũthĩnzĩo. 25 Athaũki onthe ala me masindanonĩ nĩmesiĩĩaa maũndũnĩ onthe. Vate nzika, mekaa ũu nĩ kana makwate ngovia ĩtonya kwanangĩka, ĩndĩ ithyĩ twĩkaa ũu nĩ kana tũkwate ngovia ĩtanangĩkaa. 26 Kwoou, ndisembaa nde na kĩeleelo; na ũndũ nĩkasya ngundi syakwa nĩsyĩkasya nĩ kana ndikakũne nzeve; 27 ĩndĩ nĩkũnaa mwĩĩ wakwa na kũũtongoesya ta ngombo, nĩ kana ĩtina wa kũtavya angĩ ũvoo mũseo nyie mwene ndikese kwĩthĩwa na ũndũ ũtonya kũtuma nĩlewa. *