Valũa wa Mbee wa Vetelo
1 Nyie Vetelo, mũtũmwa wa Yesũ Klĩsto, kwa ekali ma kavinda ala manyaĩĩkĩte Vondo, Kalatia, Kavatosia, Asia, na Vithinia, kwa ala manyuvĩtwe 2 kwosana na ũndũ Ngai, ũla nĩwe Asa, wamanyĩte kuma tene, o vamwe na kũthewʼa kwĩsĩla veva mũtheu, nĩ kana methĩwe me ewi na me aminzangĩsye nthakame ya Yesũ Klĩsto:
Ũseo mwingĩ na mũuo nĩsyongeleke kwenyu.
3 Nataĩwe Ngai, Ĩthe wa Mwĩaĩi waitũ Yesũ Klĩsto, nũndũ kwosana na tei wake mwingĩ nĩwatumie tũsyawa ĩngĩ nĩ kana twĩthĩwe na wĩkwatyo mũlũmu kwĩsĩla ũthayũũkyo wa Yesũ Klĩsto, 4 na tũyĩthĩwa na ũtiĩwa ũtatonya kwanangĩka na ũte mũvuku na ũtathelaa. Nawʼo wiĩtwe ĩtunĩ kwondũ wenyu, 5 inywʼĩ ala mũendeee kũsũvĩwa nĩ vinya wa Ngai kwĩsĩla mũĩkĩĩo kwondũ wa ũtangĩĩo ũla ũkavuanwʼa ĩvindanĩ ya mũthya. 6 Na nũndũ wa ũu nĩmũũtana mũno, o na kau no kwa kavinda kanini, nĩkwĩthĩwa nĩmũkwatĩtwe nĩ motato ma mĩthemba yĩ kĩvathũkanyʼo, na ũsu nĩ ũndũ waĩle, 7 nĩ kana mũĩkĩĩo wenyu ũla ũtatĩtwe kwa nzĩa ĩsu, nawʼo nĩ wa vata mũno kwĩ thaavu ũla wanangĩkaa o na kau nũtatĩtwe * na mwaki, wĩthĩwe ne kĩtumi kya kũkathwa na kũkumwʼa na kũtaĩwa ĩvindanĩ ya kũvuanwʼa kwa Yesũ Klĩsto. 8 O na kau mũyaamwona, nĩmũmwendete. O na kau mũimwene yu, nĩmũmũĩkĩĩĩte na mwĩ na ũtanu mwingĩ mũno ũtatonya kũelewʼa, 9 nũndũ nĩmwĩsĩ kana mũĩkĩĩo wenyu ũkatuma mũkwata ũtangĩĩo. *
10 Na kwondũ wa ũtangĩĩo ũsu, athani ala mathanie ĩũlũ wa ũseo mwingĩ ũla mũkakwata nĩmeekie ũkunĩkĩli na kĩthito na mamantha nesa. 11 Na nĩmaendeeie kũmantha mamanye nĩ ĩndĩĩ kana nĩ ĩvinda yĩva veva ũla waĩ nthĩnĩ woo wawetaa ĩũlũ wa maũndũ ala makonetye Klĩsto, nũndũ veva ũsu nĩwakũsĩĩie kuma tene mathĩna ala maĩ makwate Klĩsto na ũndũ ĩtina waĩ anenevwʼe. 12 Nĩmavuanĩiwʼe kana mayathũkũmaa kwondũ woo ĩndĩ mathũkũmaa kwondũ wenyu, na meekaa ũu nũndũ wa maũndũ ala yu mũtavĩtwʼe nĩ ala mamũtavisye ũvoo mũseo o vamwe na veva mũtheu ũla watũmiwe kuma ĩtunĩ. Maũndũ asu nĩmo alaĩka mendaa kũkunĩkĩla.
13 Kwoou ũmbanyʼai ilĩko syenyu kwondũ wa wĩa; sũvĩai ilĩko syenyu vyũ, na mũyĩkwatya ũseo mwingĩ ũla mũkakwata ĩvindanĩ ya kũvuanwʼa kwa Yesũ Klĩsto. 14 Ta syana mbĩwi, ekai kwĩka maũndũ kwosana na mawendi ala mwaĩ namo yĩla mũtaĩ na ũmanyi, 15 ĩndĩ o ta Ngai Mũtheu ũla wamwĩtie, ĩthĩwai atheu mwĩkalĩlenĩ wenyu wʼonthe, 16 nũndũ nĩkũandĩkĩtwe: “No nginya mwĩthĩwe atheu, nũndũ nyie nĩ mũtheu.”
17 Na ethĩwa mũmwĩkaĩlaa Asa, ũla ũsilĩlaa kĩla ũmwe kwosana na wĩa wake mwene ate na kyende, ĩkalaai mwĩ na wia ĩvindanĩ yĩĩ mwĩ aeni ĩũlũ wa nthĩ. 18 Nũndũ nĩmwĩsĩ kana mũyaathawʼa na syĩndũ ila syanangĩkaa, ta vetha kana thaavu, mume mwĩkalĩlenĩ wenyu wa mana ũla mwatiĩwe nĩ aa-ũmae menyu. * 19 Ĩndĩ mwathaiwʼe na nthakame ya vata mũno, ta ĩla ya kalondu kate ĩlanga na kate ũndũ ũtaĩle, nayo nĩ nthakame ya Klĩsto. 20 Nĩ wʼo kana nĩweesĩkĩe mbee wa mwambĩlĩlyo wa nthĩ, ĩndĩ aumĩlilwʼe mũminũkĩlyonĩ wa ĩvinda kwondũ wenyu. 21 Na kwĩsĩla kwake nĩmũmũĩkĩĩĩte Ngai, ũla wamũthayũũkisye na amũkumya, nĩ kana mũĩkĩĩo na wĩkwatyo wenyu wĩthĩwe nthĩnĩ wa Ngai.
22 Na yu nũndũ nĩmwĩtheetye ene kwa kwĩthĩwa mwĩ ewi kwa ũla wʼo na ũu ũkatuma mwĩthĩwa na wendo wa ana-a-asa, endanai mũno kuma ngoonĩ. 23 Nĩkwĩthĩwa nĩmũsyaĩtwe ĩngĩ, na ti kwĩsĩla mbeũ ĩla yanangĩkaa, ĩndĩ kwĩsĩla mbeũ ĩla ĩtanangĩkaa, kwĩsĩla ndeto ya Ngai ũla wĩ thayũ na wĩkalaa tene na tene. 24 Nũndũ “mĩĩ yonthe * no ta nyeki, na ũseo wayo no ta wa ĩlaa ya mũũndanĩ; nyeki nĩyũmaa na ĩlaa nĩyĩvalũkaa, 25 ĩndĩ ndeto ya Yeova yĩkalaa tene na tene.” Na “ndeto” ĩsu nĩ ũvoo mũseo ũla mwataviwʼe.