Valũa wa Kelĩ kwa Athesalonika
2 Ĩndĩ, ana-a-asa, ĩũlũ wa kwĩthĩwa vo kwa Mwĩaĩi waitũ Yesũ Klĩsto na ĩũlũ wa kũmbanwʼa kwitũ vala ũĩ, twĩmũkũlya 2 mũikathingithwʼe na mĩtũkĩ kuma kĩsũanĩonĩ kyenyu, o na mũikatelemwʼe nĩ ndeto mbeveee kana ndeto ineenetwe kana valũa ũkwoneka ta wumĩte kũla tũĩ, mũyĩwa kana mũthenya wa Yeova nĩ mũviku.
3 Mũndũ o na wĩva ndakamwasye kwa nzĩa o na yĩva, nũndũ mũthenya ũsu ndũkoka ũkaĩi wa mũĩkĩĩo ũtambĩte kũka na ũla mũtũli wa mĩao akavuanwʼa, ũla nĩwe mwana wa wanangĩko. 4 Nĩ mũvĩnganĩsya na nĩwĩnenevasya kũvĩtũka ila syĩtawa ngai kana syĩndũ ila ithaithawa, na nũndũ wa ũu nĩwĩkalaa nthĩ ĩkalũnĩ ya Ngai na kwĩyonanyʼa ũtheinĩ kana we nĩ ngai. 5 Inywʼĩ no mũũlilikana kana yĩla naĩ vamwe nenyu nĩnamũtavasya maũndũ asu?
6 Na yu inywʼĩ nĩmwĩsĩ ũla wĩthĩĩtwe aisiĩĩa mũtũli ũsu wa mĩao, nĩ kana evuanwʼa ĩvinda yake yĩla yaĩlĩte yavika. 7 Nĩ wʼo kana kĩmbithĩ kĩu kya ũtũli wa mĩao nĩkĩendeee kũtethya wĩa, na kĩendeea nginya yĩla ũla ũendeee kwĩthĩwa e kĩsiĩĩi wĩvetwa. 8 Nĩvo ĩndĩ ũla mũtũli wa mĩao wĩvuanwʼa, ũla Mwĩaĩi Yesũ ũkamũveta kwĩsĩla veva wa kanywʼa wake na kũmwananga ĩvinda yĩla kwĩthĩwa vo kwake kũkonanwʼa. 9 Ĩndĩ kwĩthĩwa vo kwa ũla mũtũli wa mĩao kumanĩte na ũthũkũmi wa Satani o vamwe na syama syonthe na mawonanyʼo ma ũvũngũ na maũndũ ma ũsengyʼo 10 na ũkengani wʼonthe kwa ala mekwanangwa, na yĩu nĩyo ĩtuvi yoo nĩkwĩthĩwa mayaaĩtĩkĩla na kwenda ũla wʼo nĩ kana matangĩĩwe. 11 Nĩkyo kĩtumi Ngai ũekaa makengwe na ũmanyĩsyo wa ũvũngũ nĩ kana maĩkĩĩe ndeto sya ũvũngũ, 12 nĩ kana onthe masilĩlwe nũndũ mayaaũĩkĩĩa ũla wʼo ĩndĩ matanĩie maũndũ mate malũngalu.
13 Ĩndĩ, mavinda onthe twĩwʼaa twaĩlĩte kũmũtũngĩa Ngai mũvea nũndũ wenyu, ana-a-asa endwa ma Yeova, nĩkwĩthĩwa kuma mwambĩlĩlyonĩ Ngai nĩwamũnyuvie mwĩkwata ũtangĩĩo kwa kũmũthesya na veva wake na kwĩsĩla mũĩkĩĩo wenyu nthĩnĩ wa ũla wʼo. 14 Nake nĩwamwĩtie kwĩsĩla ũvoo mũseo ũla tũtavanasya, nĩ kana mũkwate ũtheu mũtisu wa Mwĩaĩi waitũ Yesũ Klĩsto. 15 Kwoou, ana-a-asa, ũngamai mwĩ alũmu na mũilũmya vyũ syĩthĩo ila mwamanyĩiwʼe, mwĩthĩwe mwamanyĩiwʼe kwĩsĩla ũneeni kana valũa kuma kwitũ. 16 O na ĩngĩ, ekai Mwĩaĩi waitũ Yesũ Klĩsto mwene na Ngai Ĩthe waitũ, ũla watwendie na atũnenga ũkiakisyo wa tene na tene, o vamwe na wĩkwatyo wa wʼo kwĩsĩla ũseo mwingĩ, 17 akiakisye ngoo syenyu na aituma mwĩthĩwa mwĩ alũmu kwondũ wa meko onthe maseo o vamwe na kĩla ũneeni mũseo.