Kwa Akalatia

5 Na Klĩsto nĩwatũthaisye nĩ kana twĩthĩwe na ũthasyo ũsu. Kwoou, ũngamai mwĩ alũmu, na mũikaeke mwovwe ĩngĩ ĩsokinĩ ya ũkombo.

2 Sisyai! Nyie Vaulo nĩmũtavya kana ethĩwa nĩmũkwaĩkwa, Klĩsto eĩthĩwa ate na ũtethyo kwenyu. 3 O na ĩngĩ, nĩtavya kĩla mũndũ waĩkawa kana no nginya aatĩĩe Mĩao yonthe. 4 Inywʼĩ ala mũkwenda kũtalĩlwa ũlũngalu kwĩsĩla mĩao, mwĩ avathane na Klĩsto; o na nĩmumĩte ũseonĩ wake mwingĩ. 5 Ĩndĩ kwĩsĩla veva, ithyĩ a vaitũ nĩtweteele na mea ũlũngalu ũla tũkakwata nũndũ wa mũĩkĩĩo. 6 Nũndũ kwa ala mekalaa me ngwatanĩo vamwe na Klĩsto Yesũ, kwaĩkwa kana kũlea kwaĩkwa ti ũndũ wa vata, kĩla kya vata nĩ mũĩkĩĩo ũla ũtethasya wĩa kwa nzĩa ya wendo.

7 Mwasembete nesa. Nũũ wamũsiĩĩie mwaeka kũatĩĩa ũla wʼo? 8 Kũthingʼĩĩwʼa kwa mũthemba ũsu kũyumĩte kwa Ũla ũmwĩtaa. 9 Ĩlawa ĩnini nĩyĩkaatasya ngũmbwa yonthe ya mũtu. 10 Nĩ na mũĩkĩĩo kana inywʼĩ ala mwĩ ngwatanĩo vamwe na Mwĩaĩi mũikethĩwa na woni wĩ kĩvathũkanyʼo; ĩndĩ ũla ũkũtuma mũkwatwa nĩ thĩna akakwata ũsilĩlo ũla ũmwaĩlĩte, o na ethĩwa nũũ. 11 Ĩndĩ nyie a vakwa, ana-a-asa, ethĩwa nĩtavanyʼa ĩũlũ wa kwaĩkwa, nĩkĩ o na yu ngũthĩnwʼa? Nũndũ ethĩwa ũu nĩ wʼo ngwĩka, mũtĩ wa mathĩna * ndwaĩle ĩngĩ kwĩthĩwa kĩndũ kya kũlulutĩkya. 12 No nende aũme ala meũtata kũmũthingithya metile mamutha moo ene ma ũsyai. *

13 Mweetiwe mwĩthĩwe na ũthasyo, ana-a-asa; ate o mũikatũmĩe ũthasyo ũsu ta kĩtumi kya kwĩka mawendi ma mwĩĩ, ĩndĩ kwondũ wa wendo thũkũmanai inywʼĩ kwa inywʼĩ. 14 Nũndũ Mĩao yonthe nĩyĩanĩĩtwʼe * nthĩnĩ wa mwĩao ũmwe, nawʼo nĩ: “No nginya ũmwende mũtũi waku o ũndũ wĩyendete.” 15 Ĩndĩ ethĩwa nĩmũkũendeea kũũmana na kũĩsana, sisyai mũikese kũminana.

16 Ĩndĩ nĩasya, Endaai mũtongoewʼe nĩ veva na mũikeka wendi wa mwĩĩ nongi. 17 Nĩkwĩthĩwa mwĩĩ nũndũ wa mawendi mawʼo, nũleanaa na veva, nawʼo veva nũleanaa na mwĩĩ; isu syelĩ nileanaa, na ũu ũituma mũteka maũndũ ala mũkwenda kwĩka. 18 O na ĩngĩ, ethĩwa mũtongoewʼe nĩ veva, mũi ungu wa mĩao.

19 Yu mawĩa ma mwĩĩ nĩmonekete ũtheinĩ, namo nĩ ũlaalai, * ũvuku, kwĩka maũndũ mavuku na ngũlũ, * 20 kũthaitha mĩvwʼanano, kũneenanyʼa na maveva, ũmaitha, ĩteta, kĩwĩu, mothilĩku, ngananĩo, mũaanĩko, mũtilĩkangano, 21 kwĩwʼĩa angĩ woo, ũnywi, * mboka itaĩle, na maũndũ angĩ ta asu. Nĩmũkanyʼa kwĩ tene ĩũlũ wa maũndũ asu, o tondũ namũkanisye, kana ala mekaa maũndũ asu maikatiĩwa Ũsumbĩ wa Ngai.

22 Ĩndĩ, ũsyao wa veva nĩ wendo, ũtanu, mũuo, wũmĩĩsyo, kwĩka angĩ nesa, ũseo, mũĩkĩĩo, 23 ũuu, na kwĩsiĩĩa. Vaiĩ mwĩao ũleanĩte na maũndũ asu. 24 O na ĩngĩ, ala ma Klĩsto Yesũ nĩmaathĩĩie mwĩĩ woo mũtĩnĩ vamwe na mĩmeo na mawendi mawʼo.

25 Ethĩwa twĩkalaa kwosana na veva, o ta ũu ekai tũendae nesa tũtongoewʼe nĩ veva. 26 Tũikethĩwe tũyĩkathĩĩa, kũtuma vethĩwa na masindano katĩ waitũ, na kwĩwʼanĩa kĩwĩu.