Kwa Alomi

8 Kwoou ala me ngwatanĩo vamwe na Klĩsto Yesũ maitalĩlawa mavĩtyo. 2 Nũndũ mwĩao wa veva ũla ũnenganae thayũ kwĩsĩla Klĩsto Yesũ nũmũthaĩtye kuma mwĩaonĩ wa naĩ na kĩkwʼũ. 3 Ũndũ ũla Mĩao ĩtaĩ ĩtonya kwĩka nĩkwĩthĩwa yaĩ myonzu nũndũ wa mwĩĩ, Ngai nĩwawĩkie kwa kũtũma Mwana wake e na mũvwʼano wa mwĩĩ wĩ na naĩ nĩ kana amine naĩ, na kwoou amĩsilĩla nthĩnĩ wa mwĩĩ, 4 nĩ kana motwʼĩo malũngalu ma ĩla Mĩao matonye kwĩanĩwʼa nthĩnĩ witũ ala tũendaa kwosana na veva na ti kwosana na mwĩĩ. 5 Nũndũ ala mekalaa kwosana na mwĩĩ masũanĩaa maũndũ ma mwĩĩ, ĩndĩ ala mekalaa kwosana na veva masũanĩaa maũndũ ma veva. 6 Nĩkwĩthĩwa kũendeea kũsũanĩa maũndũ ma mwĩĩ kũetae kĩkwʼũ, ĩndĩ kũendeea kũsũanĩa maũndũ ma veva kũetae thayũ na mũuo; 7 nũndũ kũendeea kũsũanĩa maũndũ ma mwĩĩ kũetae ũmaitha na Ngai, nĩkwĩthĩwa mwĩĩ ndwĩnyivĩasya mĩao ya Ngai, o na ndũtonya kwĩka ũu. 8 Kwoou ala mekalaa kwosana na mwĩĩ maitonya kũmwendeesya Ngai.

9 Ĩndĩ mwĩkalaa kwosana na veva na ti kwosana na mwĩĩ ethĩwa kwa wʼo veva wa Ngai wĩkalaa nthĩnĩ wenyu. Ĩndĩ ethĩwa mũndũ o na wĩva nde na veva wa Klĩsto, mũndũ ũsu ti wake. 10 Ĩndĩ ethĩwa Klĩsto e ngwatanĩo vamwe nenyu, mwĩĩ nĩ mũkwʼũ nũndũ wa naĩ, ĩndĩ veva wĩ thayũ nũndũ wa ũlũngalu. 11 Kwoou ethĩwa veva wa ũla wamũthayũũkisye Yesũ wĩkalaa nthĩnĩ wenyu, ũsu wamũthayũũkisye Klĩsto Yesũ akatuma mĩĩ yenyu ĩla ĩtonya kũkwʼa yĩthĩwa thayũ kwĩsĩla veva ũsu wake ũla wĩkalaa nthĩnĩ wenyu.

12 Kwoou ana-a-asa, ve ũndũ mũna ũla no nginya twĩke, nawʼo ti kwĩkala kwosana na mwĩĩ; 13 nũndũ mwekala kwosana na mwĩĩ, vate nzika mũkakwʼa; ĩndĩ mwoaa mawĩa ma mwĩĩ kwĩsĩla veva mũkekala thayũ. 14 Nĩkwĩthĩwa onthe ala matongoeawʼa nĩ veva wa Ngai kwa wʼo nĩ ana ma Ngai. 15 Nĩkwĩthĩwa mũyaakwata veva wa ũkombo ũla ũtonya kũete wia ĩngĩ, ĩndĩ mwakwatie veva wa kũtuwa ana, na kwĩsĩla veva ũsu nĩtwĩtanaa na wasya mũnene: “Abba, * Asa!” 16 Veva wʼo mwene nĩwumasya ũkũsĩ vamwe na veva witũ kana twĩ syana sya Ngai. 17 Ethĩwa ĩndĩ twĩ syana, twĩ atiĩwa—ĩĩ, atiĩwa ma Ngai, ĩndĩ atiĩwa vamwe na Klĩsto—ethĩwa tũkathĩna vamwe nake nĩ kana twĩthĩwe tũtonya kũkumwʼa vamwe nake.

18 Nũndũ nĩona kana mathĩna ma ĩvinda yĩĩ ti kĩndũ namaelekanyʼa na ũtheu mũtisu ũla wĩvuanwʼa kwĩsĩla kwitũ. 19 Nĩkwĩthĩwa syũmbe nĩsyeteele na mea maingĩ kũvuanwʼa kwa ana ma Ngai. 20 Nũndũ syũmbe nĩsyatwʼĩkĩthiwʼe vathei, ti kwa ngenda yasyo, ĩndĩ kwĩsĩla ũla weekie ũu, nĩkwĩthĩwa ve wĩkwatyo 21 kana syũmbe syonthe ikathawʼa syume ũkombonĩ wa wanangĩko na iikwata ũthasyo wa ũtheu mũtisu wa kwĩthĩwa syana sya Ngai. 22 Nũndũ nĩtwĩsĩ kana syũmbe syonthe nilumaa vamwe na kwĩthĩwa na woo vamwe kũvika o na yu. 23 Na ti ũu wʼoka, ĩndĩ o naitũ ala twĩ na ũsyao wa mbee, nawʼo nĩ veva, ĩĩ, o naitũ nĩtũlumaa nthĩnĩ witũ o tũendeee kweteela na mea kũtuwa ana, kwa kũthawʼa kuma mĩĩnĩ yitũ kwĩsĩla wovosyo. 24 Nĩkwĩthĩwa nĩtwatangĩĩiwe wĩkwatyonĩ ũsu; ĩndĩ wĩkwatyo ũla wonekaa ti wĩkwatyo, nũndũ yĩla mũndũ woona kĩndũ, we nũendeeaa kũkyeteela e na wĩkwatyo? 25 Ĩndĩ ethĩwa twĩkwatasya kĩla tũtene, tũendeeaa kũkyeteela na mea na wũmĩĩsyo.

26 O ta ũu, veva nawʼo nũtũtetheeasya wonzunĩ witũ; nũndũ thĩna nĩ kana tũyĩsĩ maũndũ ala twaĩle kũvoya yĩla twĩ na vata wa kũvoya, ĩndĩ veva wʼo mbene nĩwĩsũvanaa kwondũ witũ yĩla tũũluma tũteũweta * kĩndũ. 27 Ĩndĩ ũla ũsiasya ngoo nĩwĩsĩ ũndũ ũ veva ũkwasya, nũndũ veva ũsu wĩsũvanaa kwosana na kwenda kwa Ngai kwondũ wa ala atheu.

28 Nĩtwĩsĩ kana Ngai nũtumaa mawĩa make onthe methĩwa na ngwatanĩo nĩ kana kwĩthĩwe moseo kwa ala mamwendete, ala meetiwe kwosana na kĩeleelo kyake; 29 nũndũ ala weetĩkĩlile mbee nĩwavangie kuma tene kana makeethĩwa mavwʼanene na Mwana wake, nĩ kana ethĩwe mũsyawa wa mbee katĩ wa ana-a-asa aingĩ. 30 O na ĩngĩ, asu wamavangĩie ũu kuma tene nomo weetie; namo ala weetie nomo wamatalile kwĩthĩwa alũngalu. Na mũthya, ala wamatalile kwĩthĩwa alũngalu nomo wamakumisye.

31 Yu ĩndĩ twĩasya ata ĩũlũ wa maũndũ asu? Ethĩwa Ngai e ngalĩ ĩla yitũ, nũũ ũtonya kũtwĩka ũndũ? 32 Na nũndũ o na Ngai ndaasiĩĩa Mwana wake ĩndĩ nĩwamũnenganie kwondũ witũ ithyonthe, we na Mwana wake matonya ata kũlea kũtũnenga kwa ũtanu syĩndũ ila ingĩ syonthe? 33 Nũũ ũla wĩsikata ala manyuvĩtwe nĩ Ngai? Ngai nĩwe ũmatalĩlaa kwĩthĩwa alũngalu. 34 Nũũ wĩmatwʼĩĩa mavĩtyo? Klĩsto Yesũ nĩwe wakwie, ĩĩ, o na eka ũu, nĩwe wathayũũkiwʼe, na e kwʼokonĩ kwa aũme kwa Ngai, na nĩwĩsũvanaa kwondũ witũ.

35 Nĩ kyaũ kĩtonya kũtũvathana na wendo wa Klĩsto? Nĩ thĩna, kana woo, kana monyamao, kana nzaa, kana ndwʼĩkĩwa, kana mũisyo, kana ũvyũ? 36 O tondũ kũandĩkĩtwe: “Kwondũ waku tũaawa mũthenya wʼonthe; tũtalawa ta malondu ma kũthĩnzwa.” 37 Ĩndĩ, maũndũnĩ asu onthe nĩtũsindaa vyũ kwĩsĩla ũla watwendie. 38 Nũndũ nĩnĩsĩ nesa kana o na kĩkwʼũ, kana thayũ, kana alaĩka, kana silikalĩ, kana maũndũ ala me kwʼo yu, kana ala makoka, kana mokũmũ, 39 kana ũtũlu, kana ũliku, kana syĩndũ ila syoombiwe, vaiĩ kĩndũ kĩtonya kũtũvathana na wendo wa Ngai ũla wĩ nthĩnĩ wa Klĩsto Yesũ, Mwĩaĩi waitũ.