Kwosana na Yoana
5 Ĩtina wa ũu kwaĩ mboka ya Ayuti, na Yesũ ambata Yelusaleme. 2 Na kũu Yelusaleme, vakuvĩ na Mbingĩlo ya Malondu, vaĩ ndia yeetawa kwa Kĩevelania Vethesita na vaĩ ituĩ itano. 3 Na andũ aingĩ awau, ilalinda, andũ au mamutha, na ala me na moko na maaũ monzu nĩmakomete vau. 4* —— 5 Ĩndĩ vau vaĩ mũndũ ũmwe ũla waĩ mũwau vandũ va myaka 38. 6 Yĩla Yesũ woonie mũndũ ũsu akomete vau, na nĩweesĩ kana aĩ mũwau kwa ĩvinda yĩasa, amũkũlya: “Nũkwenda kũvoa?” 7 Na mũndũ ũsu waĩ mũwau amũsũngĩa amwĩa: “Mwĩaĩi, ndi na mũndũ ũtonya kũndikya ndianĩ yĩla kĩwʼũ kyakwaithangwʼa, ĩndĩ ngilasya nĩendete mũndũ ũngĩ ailika mbee wakwa.” 8 Yesũ amwĩa: “Ũkĩla! Osa mũkeka * waku na ũithi.” 9 Na mũndũ ũsu avoa vau kwa vau na oosa mũkeka wake na ambĩĩa kũthi.
Mũthenya ũsu waĩ wa Savato. 10 Kwoou Ayuti mambĩĩa kũmwĩa mũndũ ũsu waĩ anavowʼa: “Nĩ mũthenya wa Savato, na ti ũndũ wosanĩte na Mĩao kũkua mũkeka * ũsu.” 11 Ĩndĩ amasũngĩa, amea: “Mũndũ ũla wambosya nĩwe wambĩa, ‘Osa mũkeka * waku na ũithi.’” 12 Namo mamũkũlya: “Nũũ ũsu wakwĩa, ‘Osa mũkeka waku na ũithi’?” 13 Ĩndĩ mũndũ ũsu waĩ anavowʼa ndeesĩ nũũ, nũndũ Yesũ aĩ analika ĩkomanonĩ yĩla yaĩ vau.
14 Ĩtina wa ũu Yesũ eethĩa mũndũ ũsu ĩkalũnĩ na amwĩa: “Sisya, nĩwavoa. Ndũkeke naĩ ĩngĩ, nĩ kana ndũkakwatwe nĩ ũndũ mũthũku kwĩ ũsu.” 15 Mũndũ ũsu nĩwaendie na amea Ayuti kana nĩ Yesũ wamũvosya. 16 Na nũndũ wa kĩtumi kĩu Ayuti nĩmamũthĩnasya Yesũ nũndũ eekaa maũndũ asu mũthenya wa Savato. 17 Ĩndĩ amasũngĩa, amea: “Asa wakwa nĩwĩthĩĩtwe aitethya wĩa nginya o na yu, o nakwa nĩendeee na kũtethya wĩa.” 18 Kĩu nĩkyo kyatumie Ayuti mambĩĩa kũmantha vyũ ũndũ meũmũaa, nũndũ o vamwe na kũtũla mwĩao wa Savato, nĩweetaa Ngai Ĩthe wake, na kwa kwĩka ũu ayĩyĩananyʼa na Ngai.
19 Kwoou Yesũ amasũngĩa, amea: “Nĩmũtavya wʼo ki kana Mwana ndatonya kwĩka ũndũ o na ũmwe kumana na ũtwi wake mwene, ĩndĩ ekaa kĩla woona Asa ayĩka. Nũndũ maũndũ o na meva ala Asa wĩkaa, o nake Mwana ekaa oou. 20 Nũndũ Asa nũmwendete Mwana na nũmwonasya maũndũ onthe ala we mwene wĩkaa, na akamwonyʼa Mwana mawĩa manene kwĩ aa, nĩ kana mũsengʼe. 21 Nũndũ o tondũ Asa ũthayũũkasya ala akwʼũ na kũmanenga thayũ, nowʼo o nake Mwana ũmũnengae thayũ mũndũ o na wĩva ũla we ũkwenda. 22 Nũndũ Asa ndasilĩlaa mũndũ o na ũmwe, ĩndĩ nũmũnengete Mwana kĩanda kya kũsilĩla, 23 nĩ kana onthe mamũnenge Mwana ndaĩa o ũndũ mamũnengete Ĩthe ndaĩa. Mũndũ o na wĩva ũla ũtamũnengete Mwana ndaĩa ndamũnengete ndaĩa Ĩthe ũla wamũtũmie. 24 Nĩmũtavya wʼo ki kana, mũndũ o na wĩva ũla wĩwʼaa ndeto syakwa na aimũĩkĩĩa Ũla wandũmie e na thayũ wa tene na tene, na ndasilĩlawa ĩndĩ nũvĩtĩte kuma kĩkwʼũnĩ akalika thayũnĩ.
25 “Nĩmũtavya wʼo ki kana, saa nĩwũkĩte, na wĩ vo yu, yĩla ala akwʼũ makewʼa wasya wa Mwana wa Ngai, na ala mamwĩthukĩĩisye makeethĩwa thayũ. 26 Nũndũ o tondũ Asa wĩ na thayũ nthĩnĩ wake, nowʼo ũmũnengete Mwana ũtonyi wa kwĩthĩwa na thayũ nthĩnĩ wake. 27 Na nũmũnengete ũkũmũ wa kũsilĩla, nũndũ we nĩ Mwana wa mũndũ. 28 Mũikasengʼe nũndũ wa ũndũ ũsu, nĩkwĩthĩwa saa nĩwũkĩte yĩla ala onthe me mbũanĩ * makewʼa wasya wake 29 namo makauma, ala meekie maũndũ maseo kwa ũthayũũkyo wa thayũ, na ala meekie maũndũ mathũku kwa ũthayũũkyo wa ũsilĩlo. 30 Nditonya kwĩka ũndũ o na ũmwe kumana na ũtwi wakwa mwene. O ũndũ neewʼa, nĩwʼo nĩsilaa, na ũsili wakwa nĩ mũlũngalu, nũndũ nĩmanthaa kwĩka kwenda kwa ũla wandũmie, ĩndĩ ti kwenda kwakwa mwene.
31 “Ethĩwa ninyie nĩ nyioka ngwĩyumĩsya ũkũsĩ, ũkũsĩ wakwa ti wa wʼo. 32 Ve ũngĩ umasya ũkũsĩ ĩũlũ wakwa, na nĩnĩsĩ ũkũsĩ ũla umasya ĩũlũ wakwa nĩ wa wʼo. 33 Nĩmwatũmie andũ kũla kwĩ Yoana, nake aumya ũkũsĩ ĩũlũ wa ũla wʼo. 34 O na ũu wĩ o vo, ndikwĩtĩkĩla ũkũsĩ wa mũndũ, ĩndĩ nĩneena maũndũ aa nĩ kana mwĩthĩwe mũtonya kũtangĩĩwa. 35 Mũndũ ũsu aĩ taa wakene na wĩ na kyeni, na kwa ĩvinda ĩkuvĩ nĩmwendaa kũtanĩa mũno kyeni kyake. 36 Ĩndĩ nyie nĩ na ũkũsĩ mũnene kũte ũla wa Yoana, nũndũ mawĩa ala Asa wakwa wanengie nĩtethye, namo nĩ mawĩa aa nĩendeee kũtethya, nĩmeũkũsĩĩa kana Asa nĩwandũmie. 37 Na Asa ũla wandũmie nĩwumĩtye ũkũsĩ we mwene ĩũlũ wakwa. Inywʼĩ mũyaaĩwʼa wasya wake o na ĩndĩĩ kana mũkona wũmbo wake, 38 na ndeto yake ndĩkalaa nthĩnĩ wenyu, nũndũ mũiĩkĩĩaa ũla we mwene watũmie.
39 “Inywʼĩ mũsomaa Maandĩko na kĩthito nũndũ mũsũanĩaa kana nĩmo makatuma mũkwata thayũ wa tene na tene; na Maandĩko o asu nomo maumasya ũkũsĩ ĩũlũ wakwa. 40 Na mũikwenda kũka kwakwa nĩ kana mwĩthĩwe mũtonya kũkwata thayũ. 41 Nyie ndyĩtĩkĩlaa nguma sya andũ, 42 ĩndĩ nĩnĩsĩ nesa kana mũi na wendo wa Ngai nthĩnĩ wenyu. 43 Nũkĩte ĩsyĩtwanĩ ya Asa wakwa, ĩndĩ mũiũmbĩtĩkĩla. Ta kethĩwa mũndũ ũngĩ nĩwookie ĩsyĩtwanĩ yake mwene, no mũmwĩtĩkĩle. 44 Mũtonya kũĩkĩĩa ata ethĩwa mwĩtĩkĩlaa nguma ila mũnenganae inywʼĩ kwa inywʼĩ na mũimanthaa nguma ila syumaa kwa Ngai, ũla nowe e weka? 45 Mũikasũanĩe ta ngũmũsikata kwa Asa; ve ũmwe ũla ũmũsikataa, nake nĩ Mose, ũla mwĩkwatĩtye. 46 Kwa wʼo, ta kethĩwa nĩmwamũĩkĩĩie Mose, no mũndĩkĩĩe, nũndũ nĩwaandĩkie ĩũlũ wakwa. 47 Ĩndĩ ethĩwa mũikũĩkĩĩa maũndũ ala waandĩkie, mũkaĩkĩĩa ata maũndũ ala ngũneena?”