Meko ma Atũmwa
19 Na kweethĩwa ĩvindanĩ yĩla Avolo waĩ Kolintho, Vaulo nĩwesĩile isionĩ ila syĩ kũasa na ũkanga na atheea nginya Eveso. Na kũu nĩweethĩie amanyĩwʼa amwe, 2 na amakũlya: “Nĩmwakwatie veva mũtheu yĩla mwatwʼĩkie etĩkĩli?” Namo mamũsũngĩa: “Aiee, o na tũyaaĩwʼa kana kwĩ veva mũtheu.” 3 Kwoou amakũlya: “Na yu mwavatisiwe ũvatiso wĩva?” Namo mamũsũngĩa: “Ũvatiso wa Yoana.” 4 Nake Vaulo amea: “Yoana avatisaa ũvatiso wa kwonanyʼa wĩlilo, ayĩa andũ maĩkĩĩe ũla wookĩte ĩtina wake, nake nĩ Yesũ.” 5 Yĩla meewie ũu, mavatiswa ĩsyĩtwanĩ ya Mwĩaĩi Yesũ. 6 Na yĩla Vaulo wamailĩĩile moko, veva mũtheu wamatheea, na mambĩĩa kũneena na ithyomo ngeni na kwathana. 7 Aũme onthe maĩ ta 12.
8 Na kwa ĩvinda ya myei ĩtatũ nĩwaendaa ĩsinakokenĩ na kũneena na ũkũmbaũ, ayumya maũvoo na kũsũanĩa na andũ na kũtata kũmaĩkĩĩthya ĩũlũ wa Ũsumbĩ wa Ngai. 9 Ĩndĩ yĩla amwe maleile vyũ kũĩkĩĩa * na mambĩĩa kũneena naĩ ĩũlũ wa Ĩla Nzĩa mbee wa ĩkomano, nĩweevetie vala maĩ na avatha amanyĩwʼa kuma vala maĩ, na nĩwaumasya maũvoo nyũmbanĩ nene ya sukulu wa Tilano. 10 Ũndũ ũsu waendeeie kwa ĩvinda ya myaka ĩlĩ, nginya andũ onthe ala mekalaa kĩsionĩ kya Asia meewʼa ndeto ya Mwĩaĩi, Ayuti na Akiliki.
11 Na Ngai aendeea kwĩka syama nene kwĩsĩla moko ma Vaulo, 12 o na weethĩa itambaa na ngũa ila syakiitaa mwĩĩ wa Vaulo nĩsyatwaĩawa ala awau na maivoa na maveva mavuku mayuma. 13 Ĩndĩ Ayuti amwe ala maendaa kũũ na kũũ mayumya ndaimoni, o namo nĩmatatie kũtũmĩa ĩsyĩtwa ya Mwĩaĩi Yesũ nĩ kana maumye maveva mavuku; na maasya: “Kwĩsĩla Yesũ ũla ũtavanawʼa nĩ Vaulo, nĩngũkwĩaĩa kwa ũito ume.” 14 Na kwaĩ ana mũonza ma mũnene wa athembi Mũyuti weetawa Sikiva ala meekaa ũu. 15 Ĩndĩ mũthenya ũmwe veva mũvuku wamasũngĩie, wamea: “Nyie nĩnĩsĩ Yesũ na ngamanya Vaulo, ĩndĩ inywʼĩ mwĩ aaũ?” 16 Ĩtina wa ũu, mũndũũme ũla waĩ na veva ũsu mũvuku nĩwamathaanyũkĩie, amakĩlya vinya ũmwe ĩtina wa ũla ũngĩ na amasinda onthe, nginya onthe masemba maumaala nyũmba me athei na me aũmĩsye. 17 Ũndũ ũsu nĩwamanyĩkie nĩ onthe, Ayuti na Akiliki ala mekalaa Eveso; na wia wamakwata onthe, na ĩsyĩtwa ya Mwĩaĩi Yesũ yaendeea kũtaĩwa. 18 Na aingĩ ala matwʼĩkie etĩkĩli nĩmookaa na kumbũla na kũweta ũtheinĩ meko moo. 19 Na aingĩ ala meekaa syama sya ũwe nĩmaetie mavuku moo vamwe na mamavĩvĩsya mbee wa kĩla mũndũ. Na meeka ĩsavu ya thooa wamo na meethĩa nĩ ilungu 50,000 sya vetha. 20 Kwoou kwa nzĩa nene, ndeto ya Yeova nĩyaendeeie kwĩana na kwĩthĩwa na vinya.
21 Ĩtina wa maũndũ asu kwĩkĩka, Vaulo nĩwatwie vevanĩ wake kana ĩtina wa kwĩsĩla Masetonia na Akaia, akathi nginya Yelusaleme. Aisye atĩĩ: “Ĩtina wa kwĩsĩla kũu, no nginya nĩthi Lomi o nakwʼo.” 22 Kwoou nĩwatũmie elĩ katĩ wa ala mamũthũkũmaa mathi Masetonia, ala nĩ Timotheo na Elasito, ĩndĩ we mwene ekala ĩvinda yĩana ũna kĩsionĩ kya Asia.
23 Ĩvindanĩ o yĩu nĩkwookĩlile kĩthokoo kĩnene ĩũlũ wa Ĩla Nzĩa. 24 Ũu weekĩkie nũndũ mũndũũme ũmwe weetawa Ndemetelio, mũtui wa vetha ũla waseũvasya tũkalũ twa Alitemi, nĩwaeteae ala maseũvasya syĩndũ ũthwii mwingĩ. 25 Nĩwamombanisye ala wathũkũmaa namo na andũ angĩ ala mathũkũmaa wĩa ũsu, na amea: “Aũme, inywʼĩ nĩmwĩsĩ nesa kana viasala ũũ nĩwʼo ũtumaa tũendeea nesa. 26 Na yu nĩmũkwona na kwĩwʼa ũndũ Vaulo ũtumĩte andũ ma Eveso na vakuvĩ kĩsio kyonthe kya Asia maĩkĩĩa, na ũndũ ũmaalyũlĩte makethĩwa na woni ũngĩ, akyasya kana ngai ila iseũvĩtwʼe na moko ti ngai sya wʼo. 27 O na ĩngĩ, mũisyo ũla wĩ vo nĩ kana, eka kũtwʼĩka viasala witũ nũkwanangĩwa ndaĩa, o nayo ĩkalũ ya ngai nene nga Alitemi yĩkoonekaa tate kĩndũ, na ngai ĩsu ĩthaithawa kĩsionĩ kyonthe kya Asia na nthĩ yonthe ĩyanangĩwa ndaĩa yayo.” 28 Yĩla andũ meewie ũu nĩmathatie mũno, na mambĩĩa kũneena na wasya mũnene, makyasya: “Alitemi wa Aeveso nĩ mũnene!”
29 Kwoou ndũa yausũa kĩthokoo na onthe masemba nyũmbanĩ ya mathaũ, makusũlanĩtye Kaio na Alisitaliko, andũ ma kuma Masetonia ala maendanasya na Vaulo. 30 Vaulo o nake nĩwendaa kũlika vala vaĩ andũ, ĩndĩ amanyĩwʼa mayaamwĩtĩkĩlya. 31 O na anene amwe ma mboka na mathaũ, ala maĩ anyanyae make, nĩmatũmanie kũla ũĩ maimwĩsũva ndakatate kũlika nyũmbanĩ ĩsu ya mathaũ. 32 Na andũ amwe maineena kĩĩ ala angĩ maneenaa kĩya; nũndũ ũmbano ũsu waĩ na kĩthokoo, o na aingĩ ala maĩ vo mayeesĩ nĩkĩ mombanĩte. 33 Kwoou mamumya Alekisanda ĩkomanonĩ, na Ayuti mamũluuta athi mbee, nake ookĩlya kwʼoko ayenda kwĩtetea mbee wa andũ. 34 Ĩndĩ yĩla mamanyie kana nĩ Mũyuti, onthe mambĩĩa kũlonzanyʼa kwa ĩvinda ya masaa ta elĩ, makyasya: “Alitemi wa Aeveso nĩ mũnene!”
35 Yĩla mũandĩki wa ndũa wesie kũvindĩthya ĩkomano yĩu, nĩwayĩie atĩĩ: “Andũ ma Eveso, nũũ ũla ũtesĩ kana ndũa ya Aeveso nĩyo ĩsũvĩaa ĩkalũ ya Alitemi mũnene na mũvwʼanano ũla wavalũkile kuma ĩtunĩ? 36 Na nũndũ maũndũ asu mayamba kũkananĩwʼa, mwaĩle kũusya na mũieka kwĩka maũndũ na mbuka. 37 Nĩkwĩthĩwa mũetie aũme aa vaa na mayũyĩte ĩkalũnĩ kana makauma ngai yitũ nga. 38 Kwoou ethĩwa Ndemetelio na andũ ala angĩ ũseũvasya mavisa namo me na ũndũ na mũndũ, kwĩ mĩthenya ya kũsila makoani na kwĩ anene; * nĩmoke masikatane. 39 Ĩndĩ ethĩwa mwĩmantha ũndũ ũngĩ eka ũsu, no nginya ũtuwe kwosana na mĩao. 40 Nũndũ kwa wʼo ũndũ ũũ weekĩka ũmũnthĩ nũtonya kũtũlikya mũisyonĩ wa kũsikatĩwa kũleana na mũsumbĩ, nĩkwĩthĩwa tũi na itumi sya kwonanyʼa nĩkĩ ĩkomano yĩĩ yĩ na ithokoo.” 41 Na amina kwasya ũu ombũũkya ĩkomano.