Kũtũngĩlĩĩlwa kwa Mĩao
18 “Athembi Alivai, ĩĩ, mbaĩ yonthe ya Livai, ndĩkanengwa kĩanda kana ũtiĩwa vamwe na Isilaeli. Makaya nthembo ivĩvĩtwʼe na mwaki kwondũ wa Yeova, ila nĩ ũtiĩwa wake. 2 Kwoou mayaĩlĩte kwĩthĩwa na ũtiĩwa katĩkatĩ wa ana-a-ĩthe moo. Yeova nĩwe ũtiĩwa woo, o tondũ ũmatavĩtye.
3 “Yu kĩĩ nĩkyo andũ maĩlĩte kũnenga athembi: Mũndũ ũla waumya nthembo, yĩthĩwe nĩ nzaũ kana ĩlondu, aĩlĩte kũnenga mũthembi ituo, ngambu, na ĩvu. 4 Mwaĩlĩte kũmũnenga ũsyao wa mbee wa lĩu wenyu wa mbaa ngetha, mbinyu yenyu nzaũ, mauta menyu, na wʼĩa wa mbee ũla mwatila malondu menyu. 5 Yeova Ngai wenyu nũmũnyuvĩte vamwe na ana make kuma mbaĩnĩ syenyu syonthe mathũkũmae ĩsyĩtwanĩ ya Yeova ĩvinda yonthe.
6 “Ĩndĩ ethĩwa Mũlivai nĩwauma ndũanĩ ĩmwe katĩ wa ndũa syenyu ila syĩ Isilaeli vala ũnekalaa na nĩwenda* kũthi vala Yeova ũnyuvĩte,* 7 no athũkũmĩae vau ĩsyĩtwanĩ ya Yeova Ngai wake o ta ana-a-ĩthe onthe, Alivai, ala mathũkũmĩaa vau mbee wa Yeova. 8 Akanengawe lĩu wĩanene na woo, o vamwe na kĩla wakwata athoosya malĩ ya aa-ũmae make.
9 “Yĩla mũkalika nthĩ ĩla Yeova Ngai wenyu ũkũmũnenga, mũikemanyĩsye kũatĩĩa imanyĩo sya kũthatya sya mbaĩ isu. 10 Vaikoneke nthĩnĩ wenyu mũndũ ũkũvĩtĩlya mwana wake kana mwĩĩtu wake mwakinĩ, mũndũ o na wĩva ũkwaũsya, mũndũ o na wĩva ũkwĩka syama sya ũwe, mũndũ o na wĩva ũkũmantha maũndũ meũmwonyʼa ĩũlũ wa ĩvinda yũkĩte, mũoi, 11 mũndũ o na wĩva ũla wovaa angĩ na syama sya ũwe, mũndũ o na wĩva ũla ũneenanasya na maveva kana ũla wĩ na mavinya ma kũvuanyʼa ĩvinda yũkĩte, kana mũndũ o na wĩva ũla ũkũlasya ĩũlũ wa akwʼũ. 12 Nĩkwĩthĩwa mũndũ ũla wĩkaa maũndũ asu nũmũthatasya Yeova, na nũndũ wa imanyĩo isu sya kũthatya Yeova Ngai wenyu nũkũlũngya mbaĩ isu syume mbee wenyu. 13 Mwaĩle kũĩkĩĩthya kana mũiweteka ũthũku mbee wa Yeova Ngai wenyu.
14 “Nĩkwĩthĩwa mbaĩ ii ila mũkwosa nthĩ yoo nĩsyethukĩĩasya ala meekaa syama sya ũwe na ala maũasya, ĩndĩ Yeova Ngai wenyu ndamwĩtĩkĩlĩtye mwĩke ũndũ o na ũmwe ta ũsu. 15 Yeova Ngai wenyu akamũkĩlĩlya mwathani ũilye takwa kuma ana-a-ĩthenĩ menyu. No nginya mũmwĩthukĩĩsye. 16 Nũndũ ũu nĩwʼo mwakũlilye Yeova Ngai wenyu mwĩ Olevu ũla mũthenya wa ũmbano yĩla mwaisye, ‘Ndũkaeke twĩwʼe wasya wa Yeova Ngai witũ kana twone mwaki ũũ mũnene ĩngĩ, nĩ kana tũikakwʼe.’ 17 Nĩvo ĩndĩ Yeova wambĩie, ‘Kĩla maweta nĩ kĩseo. 18 Ngamokĩlĩlya mwathani ũilye taku kuma katĩkatĩ wa ana-a-ĩthe moo, na ngeekĩa ndeto syakwa kanywʼanĩ wake, na akamatavya maũndũ onthe ala ngũmwĩaĩa. 19 Ĩĩ, ngenda mũndũ ũla ũtakethukĩĩsya ndeto syakwa ila ũkaneena ĩsyĩtwanĩ yakwa asũngĩe.
20 “‘Ethĩwa mwathani o na wĩva nĩwalikwa nĩ mĩtũlyo na aweta ndeto ndamwĩaĩe ĩsyĩtwanĩ yakwa kana aneena ĩsyĩtwanĩ ya ngai ingĩ, mwathani ũsu no nginya akwʼe. 21 Ĩndĩ, no mwasye ũũ ngoonĩ syenyu: “Tũkamanya ata kana Yeova ndanaweta ndeto ĩsu?” 22 Yĩla mwathani waneena ĩsyĩtwanĩ ya Yeova na ndeto ĩla waneena ndĩneanĩa kana ndĩnekĩka, Yeova ndananeena ndeto ĩsu. Mwathani ũsu aneena nũndũ wa mĩtũlyo. Mũyaĩlĩte kũmũkĩa.’