Mwambĩlĩĩlyo

19 Ala alaĩka elĩ mavikie Sotomo ĩ ya wĩoo, na Loti ekalĩte nthĩ mũvĩanĩ wa ndũa ya Sotomo. Yĩla wamonie nĩwookĩlile amathaũe, na amavikĩa akumanyʼa ũthyũ wake nginya nthĩ. 2 Na ĩndĩ asya: “Eai makwa, nĩngũmwĩsũva ame, mwathũke nyũmbanĩ ya mũthũkũmi wenyu nĩ kana mwĩkale vo ũtukũ wʼonthe na mũithambwʼa maaũ. Na ũnĩ kwakya tene no mũamũke na mũiendeea na kyalo kyenyu.” Namo mamwĩa: “Aiee, twĩĩkala kĩwanzanĩ kya ndũa ũtukũ wʼonthe.” 3 Ĩndĩ nĩwamesũvie mũno nginya mathi nake nyũmba kwake. Na ĩndĩ aseũvya mboka kwondũ woo na amauĩa mĩkate ĩte ĩlawa, na maya.

4 Ĩndĩ o na matanamba kwĩyilĩĩla makome, aũme onthe ma ndũa ya Sotomo, kuma kamwana nginya mũtumĩa, nĩmookie na mathyũlũlũka nyũmba ya Loti me nguthu. 5 Na mamwĩta Loti ĩngĩ na ĩngĩ, maimwĩa: “Maĩ va aũme ala mokie kwaku ũmũnthĩ wĩoo? Maumaalye vaa tũkome namo.”

6 Na ĩndĩ Loti aumaala vala maĩ mũomonĩ na aũvinga. 7 Na amea: “Nĩngũmwĩsũva, ana-a-asa makwa, mũikeke ũndũ ũũ ũthũkĩte ũu. 8 Mwa nenyu, vaa nĩ na eĩtu makwa elĩ mataakoma na mũndũũme. Nĩngũmwĩsũva, ekai nĩmumaalĩlye mo mũmeke kĩla inywʼĩ mũkwona kyaĩlĩte. Ĩndĩ aũme aa mũikameke ũndũ o na ũmwe, nũndũ mokie ungu wa ũsũvĩo* wa kĩala kyakwa.” 9 Namo mamwĩa: “Ĩvete vaa!” Na mongela kwasya: “We ũũ ti mũeni wookie e weka kwĩkala vaa? Aĩ na yu akwetye kũtũsilĩla! Yu twĩkwĩka ũndũ mũthũku kwĩ ũla tũũmeka.” Na mamũmbĩĩa* Loti na masukumana nĩ kana matũle mũomo. 10 Kwoou ala aũme elĩ matambũũkya moko moo na mamwosa Loti mamũlikya nyũmba vala maĩ, na mavinga mũomo. 11 Na makũna aũme asu maĩ mũomonĩ wa nyũmba na mbindu, kuma ũla mũnini kũvika ũla mũnene, nginya mavinya makwetye kũmantha mũomo.

12 Na ĩndĩ aũme asu meea Loti: “Wĩ na andũ angĩ vaa? Methĩwe nĩ athoni maku, ana maku, eĩtu maku, na andũ maku onthe ala me ndũanĩ ĩno, mose mume vaa! 13 Nũndũ nĩtũkwananga vandũ vaa, nĩkwĩthĩwa kĩĩo kya ala meũnyungunyĩsya nũndũ wa ndũa ĩno nĩ kĩnene matũnĩ ma Yeova, na Yeova nũtũtũmie tũmyanange.” 14 Kwoou Loti aumaala na ambĩĩa kũneena na anake ala maĩ matwae eĩtu make ĩngĩ na ĩngĩ, aimea: “Ũkĩlai! Umai vandũ vaa, nũndũ Yeova nũkwananga ndũa ĩno!” Ĩndĩ athoni make moonaa ta ũkũvũa ngũĩ.

15 Na kũkilyĩ kũkya, alaĩka mamũkalaata Loti, maimwĩa: “Ũkĩla! Osa kĩveti kyaku, na eĩtu maku elĩ ala me vaa naku, nĩ kana mũikananganĩwʼe na ndũa ĩno nũndũ wa ũthũku wayo!” 16 O na ũu wĩ o vo, Loti nĩwaendeeie kwĩkusya, ĩndĩ Yeova amwĩwʼĩa ĩnee, na nũndũ wa ũu, aũme asu makwata kw’oko kwake, na kw’oko kwa mũka wake, na moko ma eĩtu make elĩ, na mamumaalya mamũtwaa nza wa ndũa. 17 Na yĩla mamavikisye ũtee wa ndũa, ũmwe woo amwĩa: “Kĩa ũvonokye thayũ waku! Ndũkasisye ĩtina, na ndũkaũngame vandũ o na va ũiĩnĩ!* Kĩĩa kĩsionĩ kĩla kĩ iĩma nĩ kana ndũkanangwe!”

18 Na ĩndĩ Loti amea: “Yeova, nĩngũkwĩsũva, eka kũmbĩa nĩthi kũu! 19 Nĩngũkwĩsũva ũmbĩthukĩĩsye. Nĩ wʼo kana mũthũkũmi waku nĩwonete ũseo methonĩ maku na nũmbĩtĩkĩlĩtye nĩkale thayũ nũndũ wa wendo waku ũtathelaa. Ĩndĩ nditonya kũkĩĩa kĩsionĩ kĩla kĩ iĩma, nũndũ nĩngũkĩa kũkwatwa nĩ mũisyo na ndikwʼa. 20 Nĩngũkwĩsũva, vaa ve ndũa ndonya kũkĩĩa vo. No ndũa nini. Ame! mbĩtĩkĩlye nĩkĩĩe vo. No ndũa nini, na nakĩĩa vo nĩngũvonoka.” 21 Nake amwĩa: “Nũseo ĩndĩ, nĩngũkwĩthukĩĩsya, na ndiananga ndũa ĩsu ũũweta.” 22 Ĩkalaate yu! Kĩĩa vo, nũndũ ndiĩka ũndũ nginya ũvike vo! Nĩkyo kĩtumi weetie ndũa ĩsu Nzoali.*

23 Loti aivika Nzoali, sua yaĩ yĩnambata. 24 Na ĩndĩ Yeova ausya mbua ya mũvĩlĩtĩ na mwaki ĩũlũ wa Sotomo na Ngomola, na yetĩka kuma kwa Yeova, kuma ĩtunĩ. 25 Na kwoou aananga ndũa isu syonthe, ĩĩ, ũiĩ ũsu wʼonthe, vamwe na ekali ma ndũa isu na kĩla kĩndũ kyameete ĩũlũ wa nthĩ ĩsu. 26 Ĩndĩ mũka wa Loti, ũla waĩ ĩtina wake, ambĩĩa kũsisya ĩtina, na atwʼĩka kĩtuĩ kya mũnyũ.

27 Nĩvo ĩndĩ Avalaamu waamũkie kwakya tene, na athi vala vandũ waũngamĩte mbee wa Yeova. 28 Na yĩla wasyaisye ĩtheo ngalĩko ya Sotomo na Ngomola na ũiĩ wʼonthe wa nthĩ ĩsu, oona ũndũ wa kũtelemya. Syũki yĩito nĩyookĩlĩte ĩũlũ wa nthĩ ĩsu, o ta syũki yĩito yĩũtoa ikonĩ ĩnene! 29 Kwoou yĩla Ngai waanangaa ndũa sya ũiĩ ũsu, nĩwamũlilikanĩte Avalaamu nũndũ nĩwamwovoisye Loti kuma ndũanĩ isu waanangie, o ndũa ila Loti watwĩe.

30 Ĩtina, Loti nĩwambatie kuma Nzoali na eĩtu make elĩ na ambĩĩa kwĩkala kĩla kĩsionĩ kĩ iĩma nũndũ nĩwakĩaa kwĩkala Nzoali. Kwoou ambĩĩa kwĩkala ngunganĩ e na eĩtu make elĩ. 31 Na mwĩĩtu ũla mũkũũ eea mũinae: “Ĩthe witũ nũkũie, na vai mũndũ kĩsionĩ kĩĩ ũtonya kũkoma naitũ o tondũ andũ ĩũlũ wa nthĩ yonthe mekaa. 32 Ũka tũnenge ĩthe witũ mbinyu anywʼe, na tũikoma nake nĩ kana tũmũkĩlĩlye ũsyao.”

33 Kwoou ũtukũ ũsu nĩmaendeeie kũmũnenga ĩthe woo mbinyu. Na ĩndĩ mwĩĩtu ũla mũkũũ alika na akoma na ĩthe wake, ĩndĩ Loti ndaamanya yĩla mwĩĩtu ũsu wakomie na yĩla wookĩlile. 34 Na ĩndĩ mũthenya ũla waatĩĩe mwĩĩtu ũla mũkũũ eea mũinae atĩĩ: “Sisya! Nĩngomie na nau ũtukũ wa ĩyoo. Eka tũmũnenge mbinyu ĩngĩ ũtukũ wa ũmũnthĩ o nawʼo. Na ĩndĩ ũilika ũkome nake, nĩ kana tũmũkĩlĩlye ĩthe witũ ũsyao.” 35 Kwoou ũtukũ ũsu o nawʼo nĩmaendeeie kũmũnenga ĩthe woo mbinyu. Na ĩndĩ mwĩĩtu ũla mũnini alika na akoma nake, ĩndĩ Loti ndaamanya yĩla mwĩĩtu ũsu wakomie na yĩla wookĩlile. 36 Na kwoou eĩtu elĩ ma Loti maitava ĩtina wa kũkoma na ĩthe woo. 37 Ũla mũkũũ nĩwasyaie mwana na amwĩta Moavi. Nĩwe ĩthe wa ala metawa Amoavi ũmũnthĩ. 38 O nake mũinae nĩwasyaie mwana na amwĩta Mbeni-ami. Nĩwe ĩthe wa ala metawa Aamimoni ũmũnthĩ.