Kwosana na Mathayo

26 Na Yesũ amina kũneena maũndũ asu onthe, amea amanyĩw’a make atĩĩ: 2 “Nĩmwĩsĩ kana Vasaka yĩĩthĩwa mĩthenya ĩlĩ yũkĩte, na Mwana wa mũndũ akanenganwe oaĩwe mũtĩnĩ.”

3 Na ĩndĩ anene ma athembi na atumĩa moombanĩa nza kwa mũthembi mũnene ũla weetawa Kaiava, 4 na masamana vamwe nĩ kana mamũkwate Yesũ matũmĩĩte maũĩ na maimũaa. 5 Ĩndĩ masya: “Tũimũkwata ĩvinda ya mboka, nĩ kana andũ maikambĩĩsye ithokoo.”

6 Yĩla Yesũ waĩ Vethania nyũmbanĩ ya Simoni, ũla mbeenĩ waĩ mũwau mangũ, 7 mũndũ mũka ũmwe waĩ na sũva wa alambasita wĩ na mauta me mũuke mũseo na ma thooa mũnene nĩwookie vala ũĩ, na ambĩlĩĩlya kũmwĩtĩkĩĩsya mauta asu mũtwenĩ wake aendeee kũya. * 8 Yĩla amanyĩw’a moonie ũu, nĩmeewie woo, na makũlya: “Wanango ũũ nĩ wa kĩ? 9 Nũndũ mauta aa meĩ matonya kũthoow’a mbesa mbingĩ na ikanengwa ngya.” 10 Yesũ amanya ũu amakũlilye ũũ: “Nĩkĩ mũũmũthĩny’a mũndũ mũka ũũ? Ambĩka ũndũ mũseo. 11 Nũndũ ngya mwĩ nasyo mavinda onthe, ĩndĩ nyie mũi nakwa mavinda onthe. 12 Yĩla mũndũ mũka ũũ wetĩkĩĩsya mauta me mũuke mũseo mwĩĩnĩ wakwa, eeka ũu nĩ kana ambũmbany’e kwondũ wa mathiko. 13 Nĩ w’o nĩngũmwĩa, o kũla kũkatavanw’a ũvoo ũũ mũseo nthĩ yonthe, ũndũ ũla mũndũ mũka ũũ weeka o naw’o ũkatavanaw’a kwondũ wa kũmũlilikana.”

14 Na ĩndĩ, ũmwe wa ala Ĩkũmi na Elĩ, ũla weetawa Yutasi Isikalioti, athi kwa anene ma athembi 15 na amakũlya: “Mwĩnenga kyaũ nĩ kana nĩmũvũnyanĩe kũla mũĩ?” Na matw’a kũmũnenga ilungu 30 sya vetha. 16 Kwoou, kuma ĩvinda yĩu na kũendeea, ambĩĩa kũmantha mwanya mũseo wa kũmũvũnyanĩa.

17 Mũthenya wa mbee wa Mũkate Ũte Ĩlawa, amanyĩw’a ma Yesũ nĩmookie vala ũĩ na mamũkũlya: “Wĩenda tũũseũvĩsye va, ũĩĩe Vasaka?” 18 Nake amea: “Endai ndũanĩ kwa Ngany’a-wa-ngany’a mũkamwĩe, ‘Mũmanyĩsya easya atĩĩ: “Ĩvinda yakwa yĩla yĩnyuvĩtwe yĩ vakuvĩ; na kwoou nĩtanĩa Vasaka nĩ na amanyĩw’a makwa mũsyĩ kwaku.”’” 19 Kwoou amanyĩw’a meeka o tondũ Yesũ wameaĩe na maseũvya Vasaka.

20 Na kũivika wĩoo, nĩwekalĩte mesanĩ aiya e na amanyĩw’a make 12. 21 Na maiya, amea: “Nĩ w’o nĩngũmwĩa, ũmwe wenyu nũkũmbũnyanĩa.” 22 Na meew’a ũu, makwatwa nĩ kyeva kingĩ na kĩla ũmwe ambĩĩa kũmwĩa: “Mwĩaĩi, tinyie, kana ninyie?” 23 Nake asũngĩa, amea: “Ũla ũkũlikya kw’oko kwake mbakũlinĩ vamwe nakwa, nĩwe ũkũmbũnyanĩa. 24 Nĩ w’o, Mwana wa mũndũ nũkũthi, o tondũ kũandĩkĩtwe ĩũlũ wake, ĩndĩ kyeva nĩ kwa mũndũ ũla kwĩsĩla kwake Mwana wa mũndũ ũkũvũnyanĩwa! Nĩ kavaa ta kethĩwa mũndũ ũsu ndaasyawa.” 25 Nake Yutasi, ũla waĩ vakuvĩ kũmũvũnyanĩa, asũngĩa, asya: “Tinyie, kana ninyie, Lavai?” Nake Yesũ amwĩa: “We mwene nĩwaweta.”

26 Na maendeee na kũya, Yesũ oosa mũkate, na amina kũũathima, aũtilanga, na amanenga amanyĩw’a make, akĩmea: “Osai mũye, ũũ wĩonany’a mwĩĩ wakwa.” 27 Na oosa kĩkombe, na atũnga mũvea na amanenga, akĩmea: “Nyw’ai inyw’onthe, 28 nũndũ kĩĩ kĩonany’a ‘nthakame yakwa ya ũtianĩo,’ ĩla yĩĩtĩkw’a kwondũ wa aingĩ yĩthĩwe ũekeo wa naĩ. 29 Ĩndĩ nĩngũmwĩa: Ndikanyw’a ĩngĩ nongi ya ũsyao ũũ wa mũsavivũ nginya yĩla ngamĩnyw’a yĩ nzaũ nĩ vamwe nenyu Ũsumbĩnĩ wa Asa wakwa.” 30 Na mũthya, ĩtina wa kwina mbathi sya kũmũkumya Ngai, * mathi Kĩĩmanĩ kya Mĩthata.

31 Na ĩndĩ Yesũ amea: “Inyw’onthe nĩmũũlulutĩka nũndũ wakwa ũtukũ ũũ, nĩkwĩthĩwa nĩkũandĩkĩtwe: ‘Ngakũna mũĩthi, na ĩĩthya ya malondu yĩkanyaĩĩka.’ 32 Ĩndĩ ĩtina wa kũthayũũkw’a, ngathi mbee wenyu Kalilii.” 33 Ĩndĩ Vetelo amũsũngĩa, amwĩa: “O na kau ala angĩ makalulutĩka nũndũ waku, nyie ndikalulutĩka!” 34 Nake Yesũ amwĩa: “Nĩ w’o nĩngũkwĩa, ũtukũ ũũ nzamba ĩtanasya, nũũngaĩa mavinda atatũ.” 35 Vetelo amwĩa: “O na natw’ĩka nĩngũkw’a vamwe naku, ndikakũkaĩa nongi.” Na amanyĩw’a ala angĩ onthe masya oou.

36 Na Yesũ athi namo vandũ vetawa Ngesemanii, na amea amanyĩw’a: “Ĩkalai nthĩ vaa, nambe kũthi vaya ngavoye.” 37 Na athi vamwe na Vetelo na ana elĩ ma Sevetii, akwatwa nĩ kyeva na ambĩĩa kũthĩnĩka mũno. 38 Na ĩndĩ amea: “Nĩĩw’a nĩ na * kyeva kingĩ ũkethĩa nĩĩw’a ta ngũkw’a. Ĩkalai vaa na mũyĩendeea kũsyaĩĩsya vamwe nakwa.” 39 Na aendanga mbee vanini, na avalũka nthĩ na ũthyũ, na ambĩĩa kũvoya, akyasya: “Asa wakwa, ethĩwa nĩvatonyeka, eka kĩkombe kĩĩ kĩmbĩtũke. Ĩndĩ ti kwosana na kwenda kwakwa, ĩndĩ kwosana na kwenda kwaku.”

40 Na asyoka vala ve amanyĩw’a na amethĩa makomete, na amwĩa Vetelo atĩĩ: “Mũyĩĩ mũtonya kwĩkala mũsyaĩĩsye vamwe nakwa vandũ va ĩsaa yĩmwe? 41 Endeeai kũsyaĩĩsya na kũvoya mũte kũeka, nĩ kana mũikese kũlika ĩtatwanĩ. Nĩ w’o veva nũkwenda, * ĩndĩ mwĩĩ nĩ mwonzu.” 42 Na athi ya kelĩ, na avoya, akyasya: “Asa wakwa, ethĩwa vaitonyeka kĩkombe kĩĩ kĩkambĩtũka ndakĩnyw’ĩte, eka kwenda kwaku kwĩkĩke.” 43 Na ooka ĩngĩ na amethĩa makomete, nũndũ metho moo maĩ na too mwingĩ. 44 Na amatia, na athi ĩngĩ avoya ya katatũ, aiweta ũndũ o ũla. 45 Na asyoka vala ve amanyĩw’a make, na amea: “Ĩvindanĩ ta yĩĩ no mũkomete mũthũmũĩte! Sisyai! Saa nĩwathengeea wa Mwana wa mũndũ kũvũnyanĩwa kũla kwĩ eki ma naĩ. 46 Ũkĩlai tũthi. Sisyai! Mũvũnyanĩi wakwa nũthengeee.” 47 Na aendeee kũneena, sisya! Yutasi, ũmwe wa ala Ĩkũmi na Elĩ, ooka e na nguthu nene yĩ na mbyũ na nzũma, ĩtũmĩtwe nĩ anene ma athembi na atumĩa.

48 Na mũvũnyanĩi wake nĩwamanengete wonany’o na akamea: “Mũndũ ũla ngũmumunya, nĩwe; mũkwatei.” 49 Na athi ĩmwe kwa ĩmwe kũla kwĩ Yesũ na amwĩa: “Ũvoo, Lavai!” na amũmumunya. 50 Ĩndĩ Yesũ amwĩa: “Nĩ kyaũ kyakũete vaa?” Na ĩndĩ mooka na mamũkwata Yesũ. 51 Ĩndĩ sisya! ũmwe wa ala maĩ na Yesũ akũa ũvyũ wake na atema ngombo ya mũthembi mũnene amĩtila kũtũ. 52 Na Yesũ amwĩa: “Tũnga ũvyũ waku vala wĩkalaa, nũndũ ala matũmĩaa ũvyũ makaminwa na ũvyũ. 53 Kana wĩsũanĩa ndyamba kwĩa Asa wakwa andũmĩe oyu nguthu mbee wa 12 sya alaĩka? 54 Ĩndĩ ũu ũkethĩwa, Maandĩko matonya kwĩanĩw’a ata ala maĩtye kana no nginya ũndũ ũũ wĩkĩke?” 55 Na kavindanĩ kau, Yesũ atavya nguthu ĩsu ya andũ atĩĩ: “Mwooka kũngwata mũkuĩte mbyũ na nzũma ta mũkĩte kũkwata kĩng’ei? Kĩla mũthenya nĩnekalaa ĩkalũnĩ ngĩmanyĩsya na mũyaangwata. 56 Ĩndĩ maũndũ asu onthe meekĩka nĩ kenda maũndũ ala maandĩkiwe nĩ * athani meanĩw’e.” Na amanyĩw’a make onthe masemba mamũtia.

57 Ala mamũkwatie Yesũ mamũtwaie kwa mũthembi mũnene Kaiava, vala aandĩki na atumĩa moombanĩe. 58 Ĩndĩ Vetelo amũatĩĩa e vaasa nginya nza kwa mũthembi mũnene, na amina kũlika nthĩnĩ, ekala nthĩ na athũkũmi ma nyũmba nĩ kana amanye kĩla kĩkũendeea.

59 Na anene ma athembi na Nzama ya Ayuti yonthe mamanthaa ũkũsĩ wa ũvũngũ nĩ kana moae Yesũ. 60 Ĩndĩ mayaakwata ũkũsĩ o na ũmwe, o na kau nĩkwookie ngũsĩ mbingĩ sya ũvũngũ. Ĩtina wa ĩvinda, ngũsĩ ilĩ nĩsyookie 61 na syasya: “Mũndũ ũũ anaisye, ‘Nĩ na ũtonyi wa kwananga ĩkalũ ya Ngai na kũyaka ĩtina wa mĩthenya ĩtatũ.’” 62 Yĩla mũthembi mũnene weewie ũu aũngama na amwĩa: “Ndũũsũngĩa kĩndũ? No ũkwĩw’a ũkũsĩ ũla aũme aa mekumya ĩũlũ waku?” 63 Ĩndĩ Yesũ aendeea kũvindya. Na kwoou mũthembi mũnene amwĩa: “Nĩngũkũavĩthya na Ngai ũla wĩ thayũ ũtũtavye kana nue Klĩsto, Mwana wa Ngai!” 64 Nake Yesũ amwĩa: “We mwene nĩwaneena. Ĩndĩ nĩngũkwĩa: Kuma yu na kũendeea mũkoona Mwana wa mũndũ ailyĩ kw’okonĩ kwa aũme kwĩ vinya na okĩte na mathweo ma ĩtu.” 65 Na ĩndĩ mũthembi mũnene atembũa ngũa syake sya ĩũlũ na asya: “Nĩwauma Ngai! Ve vata ũngĩ mwaũ wa ngũsĩ? Sisyai! Yu nĩmweew’a ayĩuma Ngai. 66 Woni wenyu nĩ mwaũ?” Namo masũngĩa: “Aĩle kũawa.” 67 Na ĩndĩ mamũtw’ĩlanga mata ũthyũ na mamũkũna ngundi. Na angĩ mamũkũna makovi ũthyũ, 68 makyasya: “Twathanĩe, we Klĩsto. Nũũ ũla waũkũna?”

69 Vetelo nake ailyĩ nthĩ nza, mũthũkũmi mwĩĩtu ooka vala ũĩ na amwĩa: “O naku ũnaĩ na Yesũ ũla Mũkalilii!” 70 Ĩndĩ akaĩa mbee woo onthe, akyasya: “Nyie ndyĩsĩ kĩla ũũneenea.” 71 Yĩla waendie kasũmbanĩ kala kaĩ mũvĩanĩ, mwĩĩtu ũngĩ amwona na atavya ala maĩ vau, akĩmea: “Mũndũ ũũ anaĩ na Yesũ Mũnasaleti.” 72 Na ĩngĩ akaĩa na wĩvĩto, akyasya: “Nyie ndyĩsĩ mũndũ ũũ!” 73 Ĩtina wa kavinda, ala maũngamangĩte kũu ũtee mooka na mamwĩa Vetelo: “Vate nzika, we wĩ ũmwe woo, nĩkwĩthĩwa o na mũneenele waku nũkwonany’a * ũu.” 74 Na ĩndĩ ambĩĩa kwĩyĩumanĩa na kwĩvĩta, akyasya: “Nyie ndyĩsĩ mũndũ ũũ!” Na o mĩtũkĩ nzamba yasya. 75 Na Vetelo alilikana ũndũ Yesũ wamũtavĩtye: “Nzamba ĩtanasya, nũũngaĩa mavinda atatũ.” Na aumaala nza na aĩa kĩĩo kĩ woo.