Ũvuanyʼo kwa Yoana

1 Ũvuany’o wa Yesũ Klĩsto ũla Ngai wamũnengie asyony’e ngombo syake maũndũ ala matalea kwĩkĩka o mĩtũkĩ. Na nĩwatũmie mũlaĩka wake aũnengane kwa nzĩa ya mawonany’o kwa ngombo yake Yoana, 2 ũla waumisye ũkũsĩ ĩũlũ wa ndeto ĩla Ngai wanenganie, na ĩũlũ wa ũkũsĩ ũla Yesũ Klĩsto waumisye, ĩĩ, ĩũlũ wa maũndũ onthe ala woonie. 3 Nĩ mũtanu mũndũ ũla ũsomaa na wasya mũnene na ala mew’aa ndeto sya wathani ũũ, na ala maatĩĩaa maũndũ ala maandĩkĩtwe vo, nĩkwĩthĩwa ĩvinda yĩla yĩnyuvĩtwe yĩ vakuvĩ.

4 Nyie Yoana, kwa ikundi mũonza ila syĩ kĩsionĩ kya Asia:

Ĩthĩwai na ũseo mwingĩ na mũuo kuma kwa “Ũla wĩ kw’o na waĩ kw’o na wũkĩte,” na kuma kwa maveva mũonza ala me mbee wa kĩvĩla kyake kya ũsumbĩ, 5 na kuma kwa Yesũ Klĩsto, “Ngũsĩ Ndĩkĩĩku,” “ũla waĩ wa mbee kũthayũũkw’a,” na “Mũsumbĩ wa asumbĩ ma nthĩ.”

Na kwa ũla ũtwendete na watũthaisye kuma naĩnĩ kwĩsĩla nthakame yake mwene, 6 na atũtw’ĩkĩthya asumbĩ na athembi kwa Ngai wake, ũla nĩwe Ĩthe wake, ĩĩ, kwake nĩkwĩthĩwe ndaĩa na vinya tene na tene. Ameni.

7 Sisyai! Nĩwũkĩte na mathweo, na kĩla itho yĩkamwona, o na ala mamũtonyie; na mbaĩ syonthe sya nthĩ ikeekũnanga syĩ na kyeva nũndũ wake. Ĩĩ, Ameni.

8 “Ninyie Aliva na Omeka,” * easya ũu Yeova Ngai, “Ũla wĩ kw’o na waĩ kw’o na wũkĩte, Mwene Vinya W’onthe.”

9 Nyie Yoana, mwana-a-asa wenyu na wĩ mũamba nenyu thĩnanĩ na ũsumbĩnĩ na wũmĩĩsyonĩ ta mũatĩĩi wa Yesũ, naĩ kĩthamanĩ kĩtawa Vatimo nũndũ wa kũneena ĩũlũ wa Ngai na kumya ũkũsĩ ĩũlũ wa Yesũ. 10 Na nĩtongoew’e nĩ veva mũtheu nĩneeyĩthĩie mũthenyanĩ wa Mwĩaĩi, na neew’a wasya mũnene ta wa soo ũineena ĩtina wakwa, 11 ũkyasya: “Maũndũ ala ũkwona, andĩka ĩvukunĩ ya kũkũnzwa na ũiyĩtũma kwa ikundi ii mũonza: kya Eveso, kya Simulina, kya Velikamo, kya Thiatila, kya Salite, kya Vilatelivia, na kya Laotisia.”

12 Nĩneethyũũie nĩsisye ũla waneenaa nakwa, na yĩla neethyũũie nĩnoonie syĩndũ mũonza sya thaavu sya kwilĩĩla taa, 13 na ũmwe ũilye mwana wa mũndũ aĩ katĩkatĩ wa syĩndũ isu sya kwilĩĩla taa, ekĩĩte ngũa ndaasa ĩvikĩte nyaaĩnĩ na akeyova mũsivi wa thaavu kĩthũinĩ kyake. 14 O na ĩngĩ, mũtwe wake na nzw’ĩĩ yake syaĩ nzaũ ta w’ĩa mweũ, ta ĩa, * na metho make mailye ta ũmũĩ wa mwaki, 15 na nyaaĩ syake syailye ũthuku * mũseo wĩ ĩikonĩ ĩnene ya mwaki, na wasya wake waĩ ta wasya wa kĩw’ũ kingĩ. 16 Na kw’okonĩ kwake kwa aũme akwete ndata mũonza, na kanyw’anĩ wake vaumĩlĩte ũvyũ mũĩ, mũasa ũtemaa na ngalĩ syelĩ, na ũthyũ wake wailye ta syũa saa ila yĩthĩawa yakanĩte vyũ. 17 Yĩla namwonie navalũka nyaaĩnĩ syake ta nĩ mũkw’ũ.

Nake ambilĩĩla kw’oko kwake kwa aũme, na asya: “Ndũkakĩe. Ninyie ũla wa Mbee na ũla wa Mũthya, 18 na ũla wĩ thayũ, na nĩnakwie, ĩndĩ sisya! nĩ thayũ tene na tene, na nĩ na mbungũo sya kĩkw’ũ na sya Mbũa. * 19 Kwoou andĩka maũndũ ala woona, na maũndũ ala me vo, na maũndũ ala mekwĩkĩka ĩtina wa aa. 20 Nakyo kĩmbithĩ kĩtheu kya ila ndata mũonza woona kw’okonĩ kwakwa kwa aũme na ila syĩndũ mũonza sya thaavu sya kwilĩĩla taa nĩ kĩĩ: Ila ndata mũonza syĩonany’a alaĩka mũonza ma ila ikundi mũonza, nasyo ila syĩndũ mũonza sya kwilĩĩla taa syĩonany’a ila ikundi mũonza.