Valũa wa Kelĩ wa Vetelo
3 Endwa, ũũ nĩwʼo valũa wakwa wa kelĩ ngũmũandĩkĩa, ũla nthĩnĩ wawʼo, o ũndũ neekie valũanĩ wakwa wa mbee, ngwenda kũamũkya ũtonyi wenyu wa kũsũanĩa kwĩsĩla kũmũlilikanyʼa, 2 kana nĩmwaĩle kũlilikana maũndũ ala mbeenĩ maneeniwe nĩ athani atheu na mwĩao wa Mwĩaĩi na Mũtangĩĩi kwĩsĩla atũmwa menyu. 3 Ũndũ wa mbee manyai ũũ kana mĩthenyanĩ ya mũminũkĩlyo andũ me kĩvũthya makooka na kĩvũthya kyoo, mayĩka maũndũ kwosana na mawendi moo, 4 makyasya: “Kwĩthĩwa vo kwake kũla kwathaniwe kũĩ va? Nũndũ kuma mũthenya ũla aa-ũmae maitũ makwie, maũndũ onthe maendeee o ũndũ matwĩe mailye kuma mwambĩlĩlyo wa wũmbi.”
5 Nĩkwĩthĩwa nĩmavũthĩĩasya na ngũlũ ũndũ ũũ wa wʼo: kana kuma tene kwaĩ matu na kwaĩ nthĩ yumĩlĩte kĩwʼũnĩ yĩ ndũmu na yĩ katĩkatĩ wa kĩwʼũ nũndũ wa ndeto ya Ngai; 6 na kwa nzĩa isu nthĩ ya ĩvinda yĩu nĩyaanangiwe yĩla yavwʼĩkiwe na kĩwʼũ. 7 Ĩndĩ kwa ndeto o ĩsu matu na nthĩ ila syĩ kwʼo siĩtwe syeteele mwaki, na siĩtwe nginya mũthenya wa sila na wa kwanangwa kwa andũ ala matamũkĩaa Ngai.
8 Ĩndĩ mũikolwe nĩ ũndũ ũũ, endwa, kana mũthenya ũmwe kwa Yeova no ta myaka ngili na myaka ngili no ta mũthenya ũmwe. 9 Yeova ti mũtulu ĩũlũ wa kwĩanĩsya watho wake o tondũ andũ amwe masũanĩaa, ĩndĩ nũmũmĩĩasya nũndũ ndendaa o na ũmwe wenyu anangwe, ĩndĩ endaa onthe mavikĩe kwĩlila. 10 Ĩndĩ mũthenya wa Yeova ũkooka ta kĩngʼei, na mũthenya ũsu matu makavĩta na kĩlitũko kĩnene, na syĩndũ ila syĩ nthĩnĩ wamo ikaminwa na mwaki mũvyũ mũno, na nthĩ na mawĩa mayo makaumĩlwʼa.
11 Na nũndũ syĩndũ isu ĩkaminwa kwa nzĩa ĩsu, sũanĩai mwaĩle kwĩthĩwa mwĩ andũ ma mũthemba mwaũ maũndũnĩ ala makonetye mwĩkalĩle mũtheu na meko ala monanasya mũndũ nũmũkĩaa Ngai, 12 o mũendeee kweteela na kũlilikana ĩũlũ wa kwĩthĩwa vo kwa mũthenya wa Yeova. Mũthenyanĩ ũsu matu makavĩvwʼa na mwaki na syĩndũ ila syĩ nthĩnĩ wamo ikatweka nũndũ wa mwaki mwai! 13 Ĩndĩ kwosana na watho wake tweteele matu meũ na nthĩ nzaũ, na nthĩnĩ wasyo ũlũngalu ũkekalaa.
14 Kwoou, endwa, nĩkwĩthĩwa mweteele maũndũ asu, tatai ũndũ mũtonya nĩ kana mũminũkĩlyonĩ emwĩthĩa mũte na ĩlanga na mũte na ĩsola * na mwĩ na mũuo. 15 O na ĩngĩ, wonei wũmĩĩsyo wa Mwĩaĩi waitũ ta ũtangĩĩo, o tondũ mwana-a-asa waitũ mwendwa Vaulo o nake wamũandĩkĩie kwosana na ũĩ ũla wanengiwe, 16 aineenea maũndũ asu o tondũ wĩkaa valũanĩ syake syonthe. Ĩndĩ maũndũ amwe valũanĩ syake me vinya kũeleeka, na maũndũ asu nĩmo andũ ala mate na ũmanyi na mate alũmu mathyoekasya, o tondũ mekanaa na Maandĩko ala angĩ o namo, na ũu ũkamaetee wanangĩko.
17 Kwoou, inywʼĩ endwa, nũndũ nĩmũmanyĩte maũndũ asu, ĩthĩwai mwĩ metho nĩ kana mũikelelũkwʼe vamwe namo nĩ mavĩtyo ma atũli ma mĩao na mũivalũka kuma ũlũmunĩ wenyu. 18 Vandũ va ũu, endeeai kwĩana nthĩnĩ wa ũseo mwingĩ na nthĩnĩ wa ũmanyi ĩũlũ wa Mwĩaĩi na Mũtangĩĩi waitũ Yesũ Klĩsto. Nguma nĩ syake yu na tene na tene. Ameni.