Kwosana na Maliko
3 Na ĩngĩ alika ĩsinakokenĩ na vau vaĩ mũndũ waĩ na kw’oko kwonzu. 2 Na mamũsyaĩĩsya nesa mone kana nũkũvosya mũndũ ũsu mũthenya wa Savato, nĩ kana mamũsikate. 3 Na amwĩa mũndũ ũsu waĩ na kw’oko kwonzu atĩĩ: “Ũkĩla wũke vaa katĩ.” 4 Na amakũlya atĩĩ: “Nĩ ũndũ wĩva, kwosana na mĩao, waĩle kwĩkwa mũthenya wa Savato; nĩ ũndũ mũseo kana nĩ ũndũ mũthũku, nĩ kũtangĩĩa thayũ kana nĩ kũaa?” Ĩndĩ mayaamũsũngĩa. 5 Ĩtina wa kũmasisya onthe ew’ĩte woo, nĩweewie kyeva kingĩ nũndũ wa kwona wũmũ wa ngoo syoo, na amwĩa mũndũ ũsu atĩĩ: “Tambũũkya kw’oko kwaku.” Nake atambũũkya kw’oko kwake, na kwavoa. 6 Yĩla Avalisi moonie ũu, maumaala na mĩtũkĩ na mathi nzama na aatĩĩi ma kyama kya Elote, nĩ kana mamũae.
7 Ĩndĩ Yesũ auma vau athi ũkanganĩ e na amanyĩw’a make, na andũ aingĩ kuma Kalilii na Yutia mamũatĩĩa. 8 O na angĩ kuma Yelusaleme na Itumea na angĩ kuma mũingo wa Yolotani na ngalĩko sya Tile na Sitoni, nguthu nene ya andũ nĩyookie vala ũĩ yĩla meewie maũndũ maingĩ ala weekaa. 9 Na amea amanyĩw’a make mamũmanthĩe kasiwa * nĩ kana ĩkomano yĩikamũvivinye. 10 Na nũndũ nĩwavoisye aingĩ, onthe ala maĩ na mowau mathũku nĩmamũthyũlũlũkĩte nĩ kana mamũkiite. 11 O na maveva mavuku, o yĩla mamwona, nĩmavalũkaa mbee wake na maineena na wasya mũnene, makyasya: “We nue Mwana wa Ngai.” 12 Ĩndĩ mavinda maingĩ nĩwameaĩaa kwa ũito maikawete we nĩwe ũũ.
13 Na ambata kĩĩmanĩ, ameta ala wendaa, na mooka vala ũĩ. 14 Na anyuva * kĩkundi kya andũ 12, ala wametie atũmwa, na nĩmo maĩ maendanasye nake na aimatũma makatavany’e 15 na mayĩthĩwa na ũkũmũ wa kumya ndaimoni.
16 Na kĩkundi kya ala 12 wanyuvie * nĩ Simoni, ũla wamwĩtie Vetelo, 17 Yakovo mwana wa Sevetii na Yoana mwana-a-inyia wa Yakovo (asu namo amanengie ĩsyĩtwa Voaneliki, yĩla ũalyũlo wayo nĩ, “Ana ma Kĩtundumo”), 18 Endelea, Vilivu, Valitholomayo, Mathayo, Thoma, Yakovo mwana wa Alivaio, Thatayo, Simoni Mũkena, * 19 na Yutasi Isikalioti, ũla wesie kũmũvũnyanĩa.
Na ĩndĩ alika nyũmba, 20 na ĩkomano yoombana ĩngĩ, nginya weethĩa maitonya kũya lĩu. 21 Ĩndĩ yĩla andũ ma mũsyĩ mamanyie ũu, nĩmaendie kũmũkwata, nũndũ maasya: “E na ndũũka.” 22 O na aandĩki ala matheeie kuma Yelusaleme maasya: “E na Veelisevuli, * na aumasya ndaimoni aitũmĩa vinya wa mũnene wa ndaimoni.” 23 Na amina kũmeta moke vala ũĩ, aneena namo na ngelekany’o, akyasya: “Satani atonya kũlũngya Satani ata? 24 Ethĩwa ũsumbĩ nũaanĩkĩte, ũsumbĩ ũsu ndũtonya kũũngama; 25 na ethĩwa nyũmba nĩaanĩkĩte, nyũmba ĩsu ndĩtonya kũũngama. 26 O na ĩngĩ, ethĩwa Satani nũkwĩyũkita mwene na nũaanĩkĩte, ndatonya kũũngama, ĩndĩ okĩte kũthela. 27 Kwa w’o, vaiĩ mũndũ ũtonya kũlika nyũmbanĩ ya mũndũ wĩ vinya na kũmũyĩa malĩ yake atambĩte kũmwova mũndũ ũsu wĩ vinya. No ekie ũu nĩ kana amũvene malĩ ĩla yĩ nyũmbanĩ yake. 28 Nĩ w’o nĩngũmwĩa, ana ma andũ makaekewa maũndũ onthe, o na ethĩwa mekĩte naĩ syĩva kana maneenete ndeto syĩva sya kũumana. 29 Ĩndĩ mũndũ o na wĩva ũla ũumaa veva mũtheu ndakaaekewa o na ĩndĩĩ, ĩndĩ akeethĩawa e na naĩ ya tene na tene.” 30 Aneenie ũu nũndũ maasya: “E na veva mũvuku.”
31 Nĩvo ĩndĩ inyia wake na ana-a-inyia mookie, na maũngamĩte nza, matũma mũndũ akamwĩte. 32 Na nũndũ vaĩ na ĩkomano yekalĩte nthĩ yĩmũthyũlũlũkĩte, mamwĩa: “Sisya! Inyia waku na ana-a-inyia maku me vaya nza maikũmantha.” 33 Ĩndĩ amasũngĩa, amea: “Inyia wakwa na ana-a-inyia makwa naaũ?” 34 Na ĩndĩ asisya ala mekalĩte nthĩ mamũthyũlũlũkĩte na asya: “Sisyai! Inyia wakwa na ana-a-inyia makwa! 35 Mũndũ o na wĩva ũla wĩkaa kwenda kwa Ngai, ũsu nĩwe mwana-a-inyia wakwa, na mwĩĩtu-a-inyia wakwa, na inyia wakwa.”