Meko ma Atũmwa

6 Na mĩthenyanĩ ĩsu yĩla amanyĩw’a maendeee na kwongeleka, Ayuti ala maneenaa Kĩkiliki nĩmambĩĩie kũnyungunyĩsya ĩũlũ wa Ayuti ala maneenaa Kĩevelania, nũndũ ndiwa syoo iyakwataa lĩu ũla wanenganawe kĩla mũthenya. 2 Kwondũ wa ũu, ala Ĩkũmi na Elĩ mameta amanyĩw’a onthe, na mamea: “Ti ũseo * kwitũ kũtia ndeto ya Ngai nĩ kana tũaanasye lĩu mesanĩ. 3 Kwoou ana-a-asa, ĩnyuvĩei katĩ wenyu aũme mũonza me nguma nzeo, * mausũĩtwe nĩ veva na ũĩ, nĩ kana tũmanenge wĩa ũsu wa vata; 4 ĩndĩ ithyĩ nĩtũkwĩyumya mboyanĩ na ũthũkũminĩ wa ĩla ndeto.” 5 Ndeto ila maneenie nĩsyendeeisye amanyĩw’a onthe, na manyuva Sitivini, mũndũũme wausũĩtwe nĩ mũĩkĩĩo na veva mũtheu, o na manyuva Vilivu, Volokolo, Nikanoli, Timona, Valimena, na Nikolai, mũndũ wa kuma Andiokia ũla waalyũlĩte mũĩkĩĩo. 6 Na mamatwaa vala ve atũmwa, na ĩtina wa kũvoya, mamailĩĩla moko.

7 Na kwondũ wa ũu, ndeto ya Ngai yaendeea kũnyaĩĩka, na ũtalo wa amanyĩw’a waendeea kwongeleka mũno Yelusaleme; na athembi aingĩ meetĩkĩla ũla mũĩkĩĩo.

8 Na Sitivini nĩweekaa maũndũ manene ma ũsengy’o na syama andũnĩ nũndũ aĩ na vinya wa Ngai na nĩwamwonetye ũseo. 9 Ĩndĩ andũ amwe ma yĩla yeetawa Ĩsinakoke ya Andũ Athasye, na andũ angĩ kuma Kulene na Alekisandalia, na angĩ kuma Silisia na Asia, nĩmookie kũkananĩa na Sitivini. 10 Ĩndĩ mayaamũsinda nũndũ wa ũĩ wake na veva ũla wamũtongoeasya kũneena. 11 Nĩvo ĩndĩ maneenie na andũ amwe kĩmbithĩnĩ na mamea masye atĩĩ: “Nĩtũmwĩw’ĩte aineena ndeto sya kũumana ĩũlũ wa Mose na Ngai.” 12 Na mookĩlya ithokoo katĩ wa andũ, atumĩa, na aandĩki, na o mĩtũkĩ mathi vala ũĩ na mamwosa na vinya mamũtwaa mbee wa Nzama ya Ayuti. 13 Na maete ngũsĩ sya ũvũngũ ila syaisye: “Mũndũũme ũũ atindĩaa kũneena ndeto itaĩlĩte ĩũlũ wa vandũ vaa vatheu na ĩũlũ wa Mĩao. 14 Kwa ngelekany’o, nĩtũmwĩw’ĩte akyasya kana Yesũ Mũnasaleti akaananga vandũ vaa na aialyũla syĩthĩo ila Mose watũtiĩe.”

15 Na onthe ala mekalĩte Nzamanĩ ya Ayuti mamũketeea, na moona ũthyũ wake ũilye ta wa mũlaĩka.