Meko ma Atũmwa
5 Ĩndĩ mũndũũme ũmwe weetawa Anania, vamwe na mũka wake Savaila, nĩmathooisye kĩsio kĩmwe kya kĩtheka kyoo. 2 Ĩndĩ nĩwavithie mbesa imwe o mũka esĩ, na ila ingĩ aitwaa na asiia maaũnĩ ma atũmwa. 3 Na Vetelo amwĩa: “Anania, nĩkĩ weetĩkĩlya Satani akũnenge ũkũmbaũ wa kũkenga veva mũtheu na kũvitha mbesa imwe sya kĩtheka? 4 Ũtanamba kũthoosya kĩtheka kĩu, kyo kĩinaĩ o kyaku? Na wamina kũkĩthoosya, kĩla ũnakwatie kĩinaĩ o kyaku? Nĩkĩ ũsũanĩie ũndũ ta ũũ ngoonĩ yaku? Wakenga Ngai, ĩndĩ ti andũ.” 5 Yĩla Anania weewie ndeto isu, nĩwavalũkile na akw’a. Na onthe ala meewie ũndũ ũsu makwatwa nĩ wia mwingĩ. 6 Nĩvo ĩndĩ anake mookĩlile, mamwova na itambaa, na mamũkua mamumaalya na mamũthika.
7 Ĩtina wa masaa ta atatũ, mũka wake nĩwookie, na ndeesĩ kĩla kyaĩ kĩneekĩka. 8 Na ĩndĩ Vetelo amũkũlya: “Kwandavye, inyw’ĩ mũnathooisye kĩtheka o mbesa isu?” Nake asũngĩa: “Ĩĩ, tũnathooisye o mbesa isu.” 9 Kwoou Vetelo amwĩa: “Nĩkĩ inyw’elĩ mwĩtĩkĩlanile kũtata veva mũtheu wa Yeova? Sisya! Nyaaĩ sya ala mathika mũemeu syĩ mũomonĩ, na nĩmeũkũkua makumaalye.” 10 Na vau kwa vau, avalũka maaũnĩ ma Vetelo na akw’a. Na ala anake masyoka, meethĩa e mũkw’ũ na mamũkua mamũthika ũtee wa mũũme wake. 11 Kwoou kĩkundi kyonthe na onthe ala meewie maũndũ asu makwatwa nĩ wia mwingĩ.
12 O na ĩngĩ, atũmwa nĩmaendeeie kwĩka syama na maũndũ maingĩ ma ũsengy’o andũnĩ; na onthe nĩmoombanaa vamwe Valandanĩ wa Solomoni. 13 Kwa w’o, vai mũndũ ũngĩ waĩ na ũkũmbaũ wa kũlikana namo; ĩndĩ andũ nĩmamakathĩĩaa mũno. 14 O na eka ũu, ala mamũĩkĩĩie Mwĩaĩi nĩmaendeeie kwongeleka kwa wingĩ, aũme na aka. 15 O na nĩmaetie ala awau nzĩanĩ nene na mamaia vo me mokomonĩ na mĩkekanĩ, nĩ kana Vetelo avĩtĩte wĩthĩe kyuu kyake no kyavikĩa amwe moo. 16 Na nguthu sya andũ kuma ndũanĩ ila syathyũlũlũkĩte Yelusaleme nĩmaendeeie kũka, makuĩte andũ ala maĩ awau na ala mathĩnaw’a nĩ maveva mavuku, na onthe nĩmavoaw’a.
17 Ĩndĩ mũthembi mũnene aũngama vamwe na onthe ala maĩ nake, ala maĩ ma kĩkundi kya ndĩni ya Asatukai, namo maĩ na kĩwĩu kingĩ. 18 Na mamakwata atũmwa na mamavingĩa yela. 19 Ĩndĩ ũtukũ, mũlaĩka wa Yeova avingũa mĩomo ya yela na amaumaalya, na amea: 20 “Endai mũkaũngame ĩkalũnĩ, na mũiendeea kũtavya andũ ndeto syonthe ĩũlũ wa thayũ ũũ.” 21 Meew’a ũu, nĩmalikile ĩkalũnĩ kũikya na mambĩĩa kũmanyĩsya.
Na yĩla mũthembi mũnene na ala maĩ nake mavikie, moombany’a Nzama ya Ayuti na atumĩa onthe ma ana ma Isilaeli, na matũmana yela nĩ kana atũmwa maetwe mbee woo. 22 Ĩndĩ yĩla asikalĩ mavikie vau mayaamethĩa yela. Kwoou masyoka na mamaelesya, 23 makyasya: “Tweethĩa yela yĩ ĩvinge nesa, na asungi maũngamĩte mĩomonĩ, ĩndĩ twavingũa, tũinethĩa mũndũ o na ũmwe nthĩnĩ.” 24 Yĩla kavuteni wa ĩkalũ na anene ma athembi meewie ndeto isu, masaanĩw’a mũno nĩkwĩthĩwa mayeesĩ kĩla kĩtonya kwĩkĩka. 25 Ĩndĩ mũndũ ũmwe ooka, na amea atĩĩ: “Sisyai! Aũme ala mũnavingĩie yela me ĩkalũnĩ, maũngamĩte maimanyĩsya andũ.” 26 Na kavuteni athi vamwe na asikalĩ make na mamaete, ĩndĩ mateũtũmĩa vinya, nũndũ nĩmakĩaa kũkimangwa na mavia nĩ andũ.
27 Kwoou mamaete na mamaũngamya mbee wa Nzama ya Ayuti. Na ĩndĩ mũthembi mũnene 28 amea atĩĩ: “Tũnamwĩaĩe kwa ũito mũeke kũtavany’a ĩũlũ wa ĩsyĩtwa yĩu, na sisyai! nĩmusũĩtye Yelusaleme momanyĩsyo menyu, na nĩmũtw’ĩte kũete nthakame ya mũndũ ũsu ĩũlũ witũ.” 29 Nake Vetelo na atũmwa ala angĩ masũngĩa, masya: “No nginya tũmwĩw’e Ngai nũndũ nĩwe mũsumbĩ, vandũ va kũmew’a andũ. 30 Ngai wa aa-ũmae maitũ nĩwamũthayũũkisye Yesũ, ũla mũnamũaie kwa kũmũathĩĩa mũtĩnĩ. 31 Ngai nĩwamũnenevisye ũsu ethĩwe Mũtongoi Mũnene na Mũtangĩĩi na amwĩkalya kw’okonĩ kwake kwa aũme, nĩ kana Aisilaeli matonye kwĩlila na maikwata ũekeo wa naĩ. 32 Na twĩ ngũsĩ sya maũndũ asu vamwe na veva mũtheu, ũla Ngai ũnengete ala mamwĩw’aa nũndũ nĩwe mũsumbĩ.”
33 Yĩla meewie ũu, nĩmathatie mũno * na menda kũmamina. 34 Ĩndĩ Mũvalisi ũmwe weetawa Kamalieli aũngama mbee wa Nzama ya Ayuti, nake aĩ mũmanyĩsya wa Mĩao ũla wanengetwe ndaĩa nĩ andũ onthe, na aumya mwĩao aũme asu maumaalw’e nza kwa kavinda. 35 Na ĩndĩ amea: “Andũ ma Isilaeli, ĩthĩwai mwĩ metho ĩũlũ wa ũndũ mũkwenda kwĩkana na aũme aa. 36 Kwa ngelekany’o, ĩvinda ĩna ĩvĩtu Theutasi nĩwookĩlile, ayasya we mwene nĩ mũndũ wa vata, na aũme kauta, ta 400, malika kyamanĩ kyake. Ĩndĩ nĩwaminiwe, na onthe ala mamũatĩĩe manyaĩĩkw’a na ũvoo woo wathela. 37 Ĩtina wake, nĩkwookĩlile Mũkalilii weetawa Yutasi mĩthenyanĩ ya kũandĩkĩthw’a, na akusya andũ mamũatĩĩa. Mũndũ ũsu nĩwathelile, na onthe ala mamũatĩĩe manyaĩĩkw’a. 38 Kwoou ũmũnthĩ nĩenda kũmwĩa mũikalikĩlĩĩle aũme aa, ĩndĩ ekanai namo. Nũndũ ethĩwa mũvango ũũ kana wĩa ũũ wumĩte kwa andũ, ũkaanangwa; 39 ĩndĩ ethĩwa wumĩte kwa Ngai, mũitonya kũwananga. O na eka ũu, nĩmũtonya kwĩthĩwa mũyũkita na Ngai mwene.” 40 Yĩla meewie ũu nĩmaatĩĩie ũtao wake, na meeta atũmwa, mamavũa, * na mameaĩa maeke kũneena ĩũlũ wa ĩsyĩtwa ya Yesũ, na ĩndĩ mamalekya mathi.
41 Kwoou mauma mbee wa Nzama ya Ayuti, matanĩte nũndũ nĩmatalilwe kwĩthĩwa maĩlĩte kũvũthw’a kwondũ wa ĩsyĩtwa yake. 42 Na kĩla mũthenya ĩkalũnĩ na nyũmba kwa nyũmba maendeea kũmanyĩsya mate kũeka, na kũnyaĩĩkya ũvoo mũseo ĩũlũ wa Klĩsto, Yesũ.