Ũvuanyʼo kwa Yoana
12 Na wonany’o mũnene wooneka ĩtunĩ: Kwaĩ mũndũ mũka ũvw’ĩkĩtwe syũa, na mwei waĩ ungu wa nyaaĩ syake, na mũtwenĩ wake vaĩ ngovia ya ũsumbĩ yĩ na ndata 12, 2 na aĩ mũito. Na nĩwaĩaa akyaũnya nĩ woo wa kũsyaa.
3 Na kwooneka wonany’o ũngĩ ĩtunĩ. Sisya! Mũkũnga mũnene na mũtune mũno, wĩ na mĩtwe mũonza na mbya ĩkũmi, na mĩtwenĩ yaw’o waĩ na ngovia mũonza sya ũsumbĩ; 4 na kĩsithe kyaw’o kyakusĩtye kĩlungu kya katatũ kya ndata sya ĩtunĩ, na wasyĩkya ĩũlũ wa nthĩ. Na mũkũnga ũsu waũngama mbee wa mũndũ mũka ũsu waĩ vakuvĩ kũsyaa, nĩ kana asyaa, ũmelye kana kake.
5 Na asyaa kavĩsĩ, ĩĩ, mũndũũme ũla ũkaĩthya mbaĩ syonthe na ndata ya kyũma. Na kana kake kavulw’a katwawa kwa Ngai, ũla waĩ kĩvĩlanĩ kyake kya ũsumbĩ. 6 Na mũndũ mũka ũsu akĩa athi vandũ vala waseũvĩw’e nĩ Ngai weũnĩ, na aĩ aĩthw’e mĩthenya 1,260 e vau.
7 Na kwaĩ kaũ ĩtunĩ: Mikaeli * na alaĩka make mokita na ũla mũkũnga vamwe na alaĩka maw’o 8 ĩndĩ mayaasinda, * na vayaĩ mwanya woo ĩngĩ ĩtunĩ. 9 Na mũkũnga ũsu wekw’a nthĩ, ĩla nzoka ngũũ, ĩla yĩtawa Ndevili na ĩngĩ Satani, ũla ũkengaa nthĩ yonthe; ekw’a nthĩ, na alaĩka make mekw’a nthĩ vamwe nake. 10 Na neew’a wasya mũnene kuma ĩtunĩ ũyasya:
“Yu ve ũtangĩĩo na vinya na Ũsumbĩ wa Ngai waitũ na ũkũmũ wa Klĩsto wake, nũndũ ũla ũsikataa ana-a-asa maitũ nĩwekw’a nthĩ, ũla ũmasikataa kwa Ngai mũthenya na ũtukũ! 11 Na mamũsinda nũndũ wa nthakame ya kala Kalondu na nũndũ wa ndeto ya ũkũsĩ woo, na mayaaenda mathayũ moo o na yĩla maĩ vakuvĩ kũawa. 12 Na nũndũ wa ũu, tanai inyw’ĩ matu na ala mũtwĩe nthĩnĩ wamo! Kyeva nĩ kwa nthĩ na ũkanga, nũndũ Ndevili nĩwatheea kũla mũĩ, e na ũthatu mwingĩ, nũndũ nĩwĩsĩ e na kavinda o kanini.”
13 Yĩla ũla mũkũnga woonie kana nĩwekw’a nthĩ, wamũthĩny’a ũla mũndũ mũka wasyaie kala kana kavĩsĩ. 14 Ĩndĩ mũndũ mũka ũsu anengwa nthwau ilĩ sya ndiũ nene, nĩ kana aũlũke athi vala vandũ vake weũnĩ, vala waĩ aĩthw’e kwa ĩvinda, mavinda, na nusu ĩvinda, * e vaasa na ũthyũ wa ĩla nzoka.
15 Na nzoka yatavĩka kĩw’ũ kingĩ ta ũsĩ kuma kanyw’anĩ wayo ĩtina wa ũla mũndũ mũka, nĩ kana oawe nĩ ũsĩ ũsu. 16 Ĩndĩ nthĩ yamũtetheesya mũndũ mũka ũsu, na nthĩ yaathamya kanyw’a wayo na yamelya ũsĩ ũsu mũkũnga watavĩkie kuma kanyw’anĩ waw’o. 17 Nĩvo ĩndĩ mũkũnga wathatĩie mũndũ mũka ũsu na wathi kũkita na ala matialĩte ma ũsyao wake, ala makwataa mĩao ya Ngai, na me na wĩa wa kumya ũkũsĩ ĩũlũ wa Yesũ.