Valũa wa Mbee kwa Timotheo

5 Ndũkamumany’e mũtumĩa. Vandũ va ũu, mũtae ta ĩthe waku, namo anake ta ana-a-au, 2 iveti ngũũ ta aa-inyia maku, na aka ma mũika ta eĩtu-a-inyia maku, vamwe na ũtheu w’onthe.

3 Manenge ndaĩa aka ndiwa ala kwa w’o nĩ ndiwa. * 4 Ĩndĩ ethĩwa ve ndiwa yĩ na syana kana esũkũũe, eka asu mambe kwĩmanyĩsya kĩkĩo kya Ngai me mũsyĩ kwoo na mayĩĩva asyai moo na aa-ũmae na aa-ũsũe kĩla kĩmaĩlĩte, nũndũ ũndũ ũsu nĩwĩtĩkĩlĩkaa methonĩ ma Ngai. 5 Na mũndũ mũka ũla kwa w’o nĩ ndiwa na nde na mũndũ ũtonya kũmũtethya, ethĩawa amwĩkwatĩtye Ngai na avoyaa na kĩthing’ĩĩsyo ũtukũ na mũthenya. 6 Ĩndĩ mũndũ mũka ũla wĩnenganae mwene eke mawendi make ma mwĩĩ, nĩ mũkw’ũ o na kau e thayũ. 7 Kwoou endeea kũmamanyĩsya * maũndũ asu nĩ kana methĩwe mataweteka ũthũku. 8 Vate nzika ethĩwa mũndũ o na wĩva ndamanthĩaa andũ make, na mũno mũno ala ma nyũmba yake mwene, nũkaĩĩte mũĩkĩĩo na nĩ mũthũku mbee wa mũndũ ũla ũte na mũĩkĩĩo.

9 Mũndũ mũka ndiwa ũla waĩle kũtalwa ta waĩle kũtethw’a nĩ ũla wĩ na myaka 60 na kwambata, na aĩ kĩveti kya mũũme ũmwe, 10 wĩ na nguma sya kwĩka maũndũ maseo, waeie syana syake nesa, waĩ mũlau, wathambisye atheu maaũ, watetheeisye ala me na thĩna, weeyumisye kwondũ wa wĩa mũseo.

11 Ĩndĩ, aka ndiwa ala mate akũũ mayaĩle kũtalwa, nũndũ yĩla wendi woo wa kũmanyana kĩ-mwĩĩ wamavathany’a na Klĩsto, mendaa kũtwawa. 12 Na makasilĩlwa nũndũ nĩmatiĩte ũndũ mathanĩte mbeenĩ. * 13 Na ĩvindanĩ o yĩu nĩmethĩĩtwe na kĩmanyĩo kya kwĩkala mana, mayuma nyũmba ĩmwe kũthi ĩla ĩngĩ; ĩĩ, eka kwĩkala mana, ĩndĩ o na kũsukana na kwĩlikya maũndũnĩ ma andũ angĩ, maineenea maũndũ mataĩle kũneenea. 14 Kwoou, ndonya kwenda aka ndiwa ala mate akũũ matwawe, masyae syana, maũngamĩe mĩsyĩ yoo, meeka ũu maikanenga mũvĩnganĩsya mwanya wa kũtumany’a. 15 Nĩ w’o kana amwe nĩmelelũkĩte makamũatĩĩa Satani. 16 Ethĩwa mũndũ mũka o na wĩva e na andũ ma mũsyĩ, namo nĩ ndiwa, eka amatetheesye nĩ kana kĩkundi kĩikaĩkw’e mũio mũito. Nĩ kana kĩthĩwe kĩtonya kũtetheesya ala kwa w’o nĩ ndiwa. *

17 Atumĩa ala maũngamĩaa maũndũ kwa nzĩa nzeo manengwe ndaĩa nene, * na mũno mũno ala methĩawa na kĩthito nthĩnĩ wa kũneena na kũmanyĩsya. 18 Nũndũ ĩandĩko yaĩtye: “Ndũkove nzaũ kanyw’a ĩvinda yĩla ĩendeee kũvũa ngetha,” na, “Mũtethya wa wĩa nĩwaĩle kũnengwa ndĩvi yake.” 19 Ethĩwa mũtumĩa nĩwasikatwa, ndũketĩkĩle ũndũ ũsu ate o ve na ũkũsĩ wa ngũsĩ ilĩ kana itatũ. 20 Ala maendeea kwĩka naĩ makanĩsye mbee wa andũ onthe, nĩ kana ala angĩ makĩe. 21 Nĩkwĩaĩa kwa ũito mbee wa Ngai na Klĩsto Yesũ na alaĩka anyuve ũatĩĩe maũndũ asu ũteũtw’a ũndũ na mĩtũkĩ na ũte na kyende.

22 Ndũkailĩĩle mũndũ moko na mĩtũkĩ; * o na ndũkelikye naĩnĩ sya angĩ; ĩyĩkalye wĩ mũtheu.

23 Kuma yu ndũkanyusae kĩw’ũ kĩ kyoka, ĩndĩ nyusaa mbinyu nini nũndũ wa ĩvu yaku nĩkwĩthĩwa nũkothaa kũwaa.

24 Naĩ sya andũ amwe syĩthĩawa ũtheinĩ, na makwataa ũsilĩlo mĩtũkĩ, ĩndĩ sya angĩ imanyĩkaa ĩtina. 25 O ta ũu, meko maseo nĩmonekaa ũtheinĩ ĩndĩ ala mate maseo mayĩsa kũendeea kwĩkala me mavithe.