Ũvuanyʼo kwa Yoana
20 Na noona mũlaĩka atheeete kuma ĩtunĩ e na ũvungũo wa yĩla ĩima yĩte kĩtulu, * na aĩ na nyololo nene kw’okonĩ kwake. 2 Na akwata ũla mũkũnga, ĩla nzoka ngũũ, ũla nĩwe Ndevili na Satani, na amwova myaka 1,000. 3 Na amwĩkya yĩla ĩimanĩ yĩte kĩtulu * na ayĩvinga na ayĩsiĩla, nĩ kana ndakakenge mbaĩ ĩngĩ nginya ĩla myaka 1,000 ĩthele. Na ĩtina wa ũu, no nginya athaw’e kwa ĩvinda ĩkuvĩ.
4 Na noona ivĩla sya ũsumbĩ, na ala masyĩkalĩle manengwa ũkũmũ wa kũsila. Ĩĩ, noona mathayũ * ma ala mooaiwe nũndũ wa kumya ũkũsĩ ĩũlũ wa Yesũ na kũneena ĩũlũ wa Ngai, na ala mataathaitha ĩla nyamũ ya kĩthekanĩ na mũvw’anano wayo, na ala mataaĩkĩwa ũla ũvano itulyanĩ syoo na mokonĩ moo. Na meethĩwa thayũ na masumbĩka me asumbĩ vamwe na Klĩsto myaka 1,000. 5 (Akw’ũ ala angĩ mayaaĩthĩwa thayũ nginya yĩla myaka 1,000 yathelile.) Ũsu nĩw’o ũthayũũkyo wa mbee. 6 Nĩ mũtanu na nĩ mũtheu mũndũ o na wĩva ũla wĩ na kĩanda ũthayũũkyonĩ wa mbee; nũndũ kĩkw’ũ kya kelĩ kĩi na ũkũmũ ĩũlũ wa asu, ĩndĩ makeethĩwa athembi ma Ngai na ma Klĩsto, na makasumbĩka me asumbĩ vamwe nake myaka 1,000.
7 Na ĩla myaka 1,000 yathela oou, Satani akathaw’a kuma kyovonĩ, 8 na akathi kũkenga mbaĩ ila syĩ ngalĩko inya sya nthĩ, Ngoki na Makoki, nĩ kana amombany’e vamwe kwondũ wa kaũ. Na ũtalo woo ũkeethĩwa ta kĩthangathĩ kya ũkanga. 9 Na mathi ĩũlũ wa nthĩ yonthe na mathyũlũlũka maeema ma ala atheu na ĩla ndũa yendetwe. Ĩndĩ mwaki wauma ĩtunĩ na wamamina vyũ. 10 Na Ndevili ũla wamakengaa ekw’a ĩianĩ ya mwaki na mũvĩlĩtĩ, vala ĩla nyamũ ya kĩthekanĩ na ũla mwathani wa ũvũngũ maĩ; na makathĩnĩw’a * vau mũthenya na ũtukũ tene na tene.
11 Na noona kĩvĩla kyeũ kya ũsumbĩ na Ũla wakĩkalĩle. Na nthĩ na ĩtu syakĩa syauma mbee wake, na vaiĩ vandũ vaaoneka kwondũ wasyo. 12 Na noona akw’ũ, anene na anini, maũngamĩte mbee wa kĩvĩla kĩu kya ũsumbĩ, na mavuku ma kũkũnzwa mavingũwa. Ĩndĩ ĩvuku yĩngĩ ya kũkũnzwa yavingũwa; yĩu nĩ ĩvuku ya thayũ. Na akw’ũ masilĩlwa kwĩanana na maũndũ ala maandĩkĩtwe mavukunĩ asu ma kũkũnzwa kwosana na meko moo. 13 Na ũkanga waumya akw’ũ ala maĩ nthĩnĩ waw’o, na kĩkw’ũ na Mbũa * syaumya akw’ũ ala maĩ nthĩnĩ wasyo, na masilĩlwa kĩla mũndũ kwosana na meko make. 14 Na kĩkw’ũ na Mbũa * syekw’a yĩla ĩianĩ ya mwaki. Kĩu nĩkyo kĩkw’ũ kya kelĩ, yĩla ĩia ya mwaki. 15 O na ĩngĩ ũla ũtaaĩthĩwa aandĩkĩtwe yĩla ĩvukunĩ ya thayũ ekw’a ĩianĩ ya mwaki.