Valũa wa Kelĩ kwa Athesalonika

1 Nyie Vaulo na Silivano * na Timotheo, kwa kĩkundi kya Athesalonika kĩla kĩ ngwatanĩo vamwe na Ngai, ũla nĩwe Ĩthe waitũ, na Mwĩaĩi Yesũ Klĩsto:

2 Ĩthĩwai na ũseo mwingĩ na mũuo kuma kwa Ngai, ũla nĩwe Asa, na kuma kwa Mwĩaĩi Yesũ Klĩsto.

3 Nĩtwĩwʼaa twaĩlĩte kũtũngaa mũvea kwa Ngai kĩla ĩvinda kwondũ wenyu, ana-a-asa. Ũndũ ũsu nĩwaĩle nũndũ mũĩkĩĩo wenyu nũendeee kwongeleka mũno, na wendo wa kĩla ũmwe wenyu kwelekela ala angĩ nũendeee kwongeleka. 4 Na nũndũ wa kĩtumi kĩu nĩtũmũkathaa inywʼĩ ikundinĩ sya Ngai nũndũ wa wũmĩĩsyo na mũĩkĩĩo wenyu nthĩnĩ wa mathĩna menyu onthe na nthĩnĩ wa mawũmũ ala mamũkwataa. * 5 Ũu wĩonanyʼa kana Ngai asilaa kwa nzĩa ya ũlũngalu, na nũndũ wa kĩtumi kĩu nĩmũtalĩlwe kwĩthĩwa mwaĩlĩte kũlika Ũsumbĩnĩ wa Ngai, ũla yu mũũthĩna nũndũ wawʼo.

6 Na nũndũ Ngai nĩ mũlũngalu, akamaĩva thĩna andũ ala meũmũthĩnyʼa inywʼĩ. 7 Ĩndĩ inywʼĩ ala mũũthĩnwʼa mũkakwata ũthũmũo vamwe naitũ ĩvinda ya kũvuanwʼa kwa Mwĩaĩi Yesũ kuma ĩtunĩ e vamwe na alaĩka make me vinya 8 e na ũlĩlĩnzĩ wa mwaki, yĩla ũkaete ũĩvanĩsyo kwa ala matamwĩsĩ Ngai na ala matawĩwʼaa ũvoo mũseo ĩũlũ wa Mwĩaĩi Yesũ. 9 Andũ asu makasilĩlwa wanangĩko wa tene na tene maume mbee wa Mwĩaĩi na mbee wa ũtheu mũtisu wa vinya wake, 10 ĩvinda yĩla ũkoka kũkumwʼa vamwe na atheu make na mũthenya ũsu ala mamũĩkĩĩie makasengʼa nũndũ wake, nũndũ ũkũsĩ ũla twaumisye nĩmwaũĩkĩĩie.

11 Kwondũ wa ũu, kĩla ĩvinda nĩtũvoyaa nĩ kana Ngai amũtale kwĩthĩwa mwaĩle kũnengwa kĩla wamwĩtĩie, na kwa vinya wake ayĩka ũseo wʼonthe ũla ũkwenda na aimina kĩla mwĩthĩĩtwe mũyĩka nũndũ wa mũĩkĩĩo. 12 Nĩ kana ĩsyĩtwa ya Mwĩaĩi Yesũ yĩkumwʼe nthĩnĩ wenyu, nenyu mũkumwʼe mwĩ ngwatanĩo vamwe nake, kwosana na ũseo mwingĩ wa Ngai waitũ na wa Mwĩaĩi Yesũ Klĩsto.