Kuma
23 “Ndũkanyaĩĩkye* ũvoo ũte wa wʼo. Ndũkakwatane na mũndũ mũthũku kwa kwĩthĩwa ngũsĩ ĩkwenda kũũmĩsya angĩ. 2 Ndũkaatĩanĩe na wingĩ wa andũ wĩke ũthũku, na ndũkelelũkye sila wa katĩ kwa kumya ũkũsĩ nĩ kana ũkwatĩanĩe na wingĩ wa andũ.* 3 Ndũkethĩwe na kyende ĩkoaninĩ ya mũndũ ngya.
4 “Ethĩwa nĩwakomana na nzaũ kana ĩngʼoi ya mũmaitha waku yaĩte, no nginya ũmũtũngĩe. 5 Ethĩwa nĩwoona ĩngʼoi ya mũndũ ũkũmenete yĩvalũkĩte nũndũ wa kũemeewa nĩ mĩio yayo mĩito, ndũketwʼe ndũnayona na ũithi. No nginya ũmũtetheesye kũvonokya nyamũ ĩsu.
6 “Ndũkelelũkye sila wa mũndũ ngya ũla wĩ katĩ wenyu ĩkoaninĩ yake.
7 “Ĩvathane vyũ na maũndũ ma ũvũngũ ma kũmũsikata mũndũ ũngĩ,* na ndũkoae mũndũ ũte na ĩvĩtyo na mũlũngalu, nũndũ ndikamũtala ũla mũthũku kwĩthĩwa e mũlũngalu.*
8 “Ndũketĩkĩle ĩvaki, nũndũ ĩvaki nĩyĩlindaa metho ma ala monaa nthĩ nesa na no yelelũkye ndeto sya ala alũngalu.
9 “Ndũkathĩnyʼe mwĩkali wa ũeninĩ. Nĩwĩsĩ ũndũ mũndũ wĩwʼaa e mũeni,* nũndũ mwaĩ ekali ma ũeninĩ nthĩ ya Misili.
10 “Waĩlĩte kũvanda mbeũ nthĩ yaku na ũyũmbanyʼa ũsyao wayo myaka thanthatũ. 11 Ĩndĩ mwaka wa mũonza waĩlĩte kũmĩtia ĩte nĩme na ũimĩeka ĩthũmũe, na ala ngya katĩ wa andũ maku makaya kĩla kĩ vo, na kĩla metialya, nyamũ sya kĩthekanĩ ikaya. Ũu nĩwʼo waĩle kwĩkana na mũũnda waku wa mĩsavivũ na mũũnda waku wa mĩthata.
12 “Ũkatethasya wĩa waku mĩthenya thanthatũ, ĩndĩ mũthenya wa mũonza waĩlĩte kũeka kũthũkũma, nĩ kana nzaũ yaku na ĩngʼoi yaku itonye kũthũmũa na mwana wa mwĩĩtu waku ngombo na mwĩkali wa ũeninĩ matonye kũthũmũa.
13 “No nginya wĩthĩawe wĩ metho wĩkae maũndũ onthe ala naũtavya, na ndũkawete masyĩtwa ma ngai ingĩ; mayaĩlĩte kwĩwʼĩka ilomonĩ syaku.*
14 “Mavinda atatũ kwa mwaka ũkeethĩawa na mboka kwondũ wakwa. 15 Ũkatanĩaa Mboka ya Mũkate ũte Ĩlawa. Ũkaĩsaa mũkate ũte ĩlawa mĩthenya mũonza, o tondũ nĩkwĩaĩe, ĩvindanĩ yĩla yĩnyuvĩtwe mweinĩ wa Avivu,* nũndũ ĩvinda yĩu nĩwaumie Misili. Vai mũndũ waĩlĩte kũka mbee wakwa moko mathei. 16 O na ĩngĩ, ũkatanĩaa Mboka ya Ngetha* ya ũsyao mwĩu wa mbee wa wĩa waku, wa kĩla ũũvanda mũũndanĩ; na Mboka ya Kũmbanyʼa* mũthyanĩ wa mwaka, yĩla ũkũmbanyʼa kuma mũũndanĩ ũsyao wa wĩa waku. 17 Mavinda atatũ kwa mwaka aũme maku onthe makookaa mbee wa Mwĩai ũla wa w’o, Yeova.
18 “Ndũkaumye nthakame ya nthembo yakwa vamwe na kĩndũ o na kĩva kĩkĩĩtwe ĩlawa. Na mathunya ma nthembo ala naumĩwʼa mbokanĩ syakwa mayaĩle kwĩkala ũtukũ wʼonthe nginya kwakya.
19 “Waĩlĩte kũete nyũmbanĩ ya Yeova Ngai waku ũsyao mwĩu wa mbee ũla mũseo vyũ wa nthĩ yaku.
“Ndũkatheũkĩsye katena ka mbũi ĩianĩ ya inyia wako.
20 “Nĩngũtũma mũlaĩka mbee wenyu amũsũvĩe nzĩanĩ na aimũete vandũ vala nzeũvĩtye. 21 Mwĩthukĩĩsyei nesa, na mũyĩwʼa wasya wake. Mũikaleane nake, nũndũ ndakamũekea mavĩtyo menyu, nĩkwĩthĩwa ĩsyĩtwa yakwa yĩ nthĩnĩ wake. 22 O na ũu wĩ o vo, mweethukĩĩsya wasya wake vyũ na mweeka kyonthe kĩla ngũmũtavya, ngeethĩwa mũmaitha wa amaitha menyu na ngavĩnga ala mamũvĩngaa. 23 Nũndũ mũlaĩka wakwa akathi mbee wenyu na akamũete nthĩ ya Aamoli, Aititi, Avelisi, Akanaanĩ, Aivi, na Ayevusi, na ngamamina. 24 Mũikakumanĩe ngai syoo kana mũsesengwe mũithaithe, na mũikaatĩĩe imanyĩo syoo. Vandũ va ũu, mwaĩlĩte kũsyananga vyũ na mũitumbanga ituĩ syoo sya ũthaithi. 25 No nginya mũthũkũme Yeova Ngai wenyu, na akaathima mũkate wenyu na kĩwʼũ kyenyu. Ngavetanga mowau katĩ wenyu. 26 Iveti sya nthĩ yenyu iikavuna kana kwĩthĩwa ngũngũ, na ngatuma mwĩkala ĩvinda yĩasa.*
27 “Ngatuma andũ mangĩa o na mũtavikĩte, na ngavũavũany’a andũ onthe o na mũtakomanĩte namo, na ngatuma amaitha menyu onthe masindwa na maisemba mamũkĩĩte.* 28 O na mũtambĩte kũvika, ngatuma andũ matũlĩka ngoo,* na kĩu kĩkatuma Aivi, Akanaanĩ, na Aititi masemba mamũkĩĩte. 29 Ndikamalũngya maume mbee wenyu mwakanĩ ũmwe, nĩ kana nthĩ ndĩkatiwe yĩ nthei na nyamũ sya kĩthekanĩ iyongeleka na iimũũmĩsya. 30 Ngamalũngya maume mbee wenyu o kavola kwa kavola, nginya yĩla mũkaingĩva na mũimesya nthĩ ĩsu.
31 “Ngeekĩa mũvaka wenyu kuma Ũkanganĩ Mũtune nginya ũkanganĩ wa Avilisiti na kuma weũnĩ nginya ũla Ũsĩnĩ;* nũndũ nganengane ekali ma nthĩ ĩsu mokonĩ menyu, nenyu mũkamalũngya maume mbee wenyu. 32 Mũikatianĩe ũtianĩo namo kana na ngai syoo. 33 Mayaĩle kũtũa nthĩ yenyu, nĩ kana maikatume mũmbĩtĩsya. Ethĩwa mũkathũkũma ngai syoo, vate nzika kĩu kĩkatwʼĩka kĩtei kwenyu.”