Meko ma Atũmwa
14 Na Vaulo na Valanava me Ikonio nĩmalikile ĩsinakokenĩ ya Ayuti, na maneena namo kwa nzĩa nzeo nginya nguthu nene ya Ayuti na Akiliki matw’ĩka etĩkĩli. 2 Ĩndĩ Ayuti ala mataaĩkĩĩa mathokoany’a ilĩko sya andũ ma mbaĩ ingĩ, na ũu watuma methĩwa na woni ũtaĩlĩte ĩũlũ wa ana-a-asa. 3 Kwoou nĩmekalile ĩvinda yĩasa kũu, na Yeova amanenga vinya nĩ kana maneene na ũkũmbaũ. Na amatũmĩa kwĩka syama na maũndũ ma ũsengy’o nĩ kana maĩkĩĩthye ũvoo ũla matavanasya ĩũlũ wa ũseo wake mwingĩ nĩ wa w’o. 4 Ĩndĩ, andũ ma ndũa ĩsu maanĩka; amwe moo mathi ngalĩ ya Ayuti, namo ala angĩ mathi ngalĩ ya atũmwa. 5 Na yĩla andũ ma mbaĩ ingĩ vamwe na Ayuti na atongoi moo mavangie kũmekĩĩthya nthoni na kũmakimanga na mavia, 6 Vaulo na Valanava nĩmataviw’e ũndũ ũsu, na makĩa mathi ndũanĩ sya Laikonia, Lisitela, na Ndelive, na isionĩ ingĩ ila syaĩ vakuvĩ. 7 Na mathi matavanĩtye ũvoo mũseo isionĩ isu.
8 Na Lisitela kwaĩ mũndũũme ũmwe waĩ mwonzu maaũ na ndaĩ aathi na maaũ kuma kũsyawa. 9 Mũndũ ũsu nĩwekalĩte nthĩ amwĩthukĩĩsye Vaulo aendeee na kũneena. Nake Vaulo amũketeea, na yĩla woonie kana e na mũĩkĩĩo ũtonya kũtuma avow’a, 10 aneena na wasya mũnene, na amwĩa: “Ũngama.” Na mũndũũme ũsu athaanyũka na ambĩĩa kũthi. 11 Na yĩla ĩkomano yoonie kĩla Vaulo weeka, yaneena na wasya mũnene na kĩthyomo kya Laikonia, yĩkyasya: “Yu ngai nitw’ĩkie andũ na syatheea kũũ tũĩ!” 12 Na Valanava mambĩĩa kũmwĩta Nzeusi, nake Vaulo mamwĩta Emesi, nũndũ mavinda maingĩ nĩwe waneenaa. 13 Na mũthembi wa Nzeusi, ngai ĩla ĩkalũ yayo yaĩ vakuvĩ na ndũa, aete nzaũ na syove sya malaa mĩvĩanĩ ya ndũa ĩsu, ayenda kumya nthembo e vamwe na ĩkomano yĩu.
14 Ĩndĩ yĩla mũtũmwa Valanava na mũtũmwa Vaulo meewie ũu, matembũanga ngũa syoo na masemba malika ĩkomanonĩ na maneena na wasya mũnene, makyasya: 15 “Ana-a-asa, nĩkĩ mũkwĩka maũndũ aa? Ithyĩ twĩ o andũ, na twĩ na mawonzu o tenyu. Na twĩmũtavya ũvoo mũseo nĩ kana mũalyũke kuma maũndũnĩ aa ma mana mũke kwa Ngai ũla wĩ thayũ, ũla woombie ĩtu na nthĩ na ũkanga na syĩndũ syonthe ila syĩ nthĩnĩ wasyo. 16 Na nzyawanĩ sya ĩvinda ĩvĩtu nĩweetĩkĩlilye andũ ma mbaĩ ingĩ maendeee kwĩka ũndũ mekwenda, 17 o na kau nĩwaumisye ũkũsĩ ĩũlũ wake mwene kwa kwĩka maũndũ maseo ta kũmũnenga mbua kuma ĩtunĩ na mavinda ma ngetha mbingĩ, na kũmũnenga lĩu ũmwĩanĩe, na atuma mwĩthĩwa na ũtanu mwingĩ ngoonĩ syenyu.” 18 Ĩndĩ o na ĩtina wa kũmaelesya maũndũ asu, waĩ ũndũ wĩ vinya mũno kũsiĩĩa ĩkomano yĩikamathembee.
19 Ĩndĩ Ayuti mavika kuma Andiokia na Ikonia na maneena na ĩkomano, na yamũkimanga Vaulo na mavia na yamũkusũlany’a yamũtwaa nza wa ndũa, nũndũ yoonaa ta mũkw’ũ. 20 Ĩndĩ, yĩla amanyĩw’a mamũthyũlũlũkile, ookĩla na alika ndũanĩ. Na ũnĩ wake auma kũu athi Ndelive e na Valanava. 21 Na ĩtina wa kũtavany’a ũvoo mũseo ndũanĩ ĩsu na kũtw’ĩkĩthya andũ aingĩ amanyĩw’a, masyoka Lisitela, Ikonio, na Andiokia. 22 Mavika kũu nĩmeekĩie amanyĩw’a vinya na mamathangaasya maendeee kwĩkala mũĩkĩĩonĩ, na mamea atĩĩ: “No nginya tũlike Ũsumbĩnĩ wa Ngai kwĩsĩla mathĩna maingĩ.” 23 O na nĩmanyuvie atumĩa nthĩnĩ wa kĩla kĩkundi, na mavoya na kũtĩĩa kũya, na mamanengane kwa Yeova, ũla maĩ manamũĩkĩĩa.
24 Na ĩndĩ mesĩla Visitia na mathi nginya Vambilia, 25 na ĩtina wa kũtavany’a ndeto Velika, matheea Atalia. 26 Na mauma vau malika melinĩ mathi Andiokia, vala Ngai wamonisye ũseo wake mwingĩ nũndũ wa wĩa ũla maĩ manamina kũtethya.
27 Na yĩla mavikie na moombany’a vamwe ala maĩ kĩkundinĩ, nĩmamaeleisye maũndũ maingĩ ala Ngai weekĩte kwĩsĩla kwoo, na ũndũ wamavingũĩe andũ ma mbaĩ ingĩ mũomo malike mũĩkĩĩonĩ. 28 Namo mekala na amanyĩw’a kũu ĩvinda yĩasa.