Ĩvuku ya Mbee ya Samũeli
12 Mũthya, Samũeli eeie Aisilaeli onthe atĩĩ: “Sisyai, nĩnĩkĩte* maũndũ onthe ala mũngũlĩtye nĩke, na nĩnĩnyuvĩte mũsumbĩ amũsumbĩke. 2 Yu ũũ nĩwe mũsumbĩ ũla ũmũtongoesye!* A vakwa, nĩ mũkũũ na nĩ na mbuĩ, na ana makwa me vaa vamwe nenyu, na nĩnĩmũtongoesye kuma nĩ wa mũika nginya ũmũnthĩ ũũ. 3 Ninyioo vaa. Umyai ũkũsĩ ĩũlũ wakwa mbee wa Yeova na mbee wa mwĩtĩkĩwʼa mauta wake: Nosete nzaũ yaũ kana ĩngʼoi yaũ? Kana nũũ nĩvenete kwa nzĩa ya ũkengani kana ngavinyĩĩa? Nosete ĩvaki* kuma kwʼokonĩ kwaũ nĩ kana nelelũkye sila wa katĩ? Ethĩwa nĩnĩkĩte ũu, nĩngũmũtũngĩa.” 4 Namo masya: “Ndũtũvenete kwa nzĩa ya ũkengani kana ũkatũvinyĩĩa kana ũketĩkĩla kĩndũ o na kĩva kuma kwʼokonĩ kwa mũndũ o na wĩva.” 5 Kwoou amea atĩĩ: “Yeova nĩ ngũsĩ kwenyu, na mwĩtĩkĩwʼa mauta wake nĩ ngũsĩ ũmũnthĩ kana mũinona ũndũ o na wĩva mũtonya kũnzikata ĩũlũ wawʼo.”* Namo masya: “We nĩ ngũsĩ.”
6 Kwoou Samũeli eea andũ atĩĩ: “Yeova, ũla watũmĩie Mose na Alũni na ũla waumisye aa-ũmae menyu kuma nthĩ ya Misili, nĩ ngũsĩ. 7 Na yu ũkai na mũyĩũngama vaa, na nĩngũmũtwʼĩĩa sila mbee wa Yeova nũndũ wa meko onthe malũngalu ala Yeova ũmwĩkĩte na weekie aa-ũmae menyu.
8 “Yĩla Yakovo wookie Misili oou na aa-ũmae menyu mambĩĩa kũmwĩkaĩla Yeova amatetheesye, Yeova nĩwatũmie Mose na Alũni matongoesye aa-ũmae menyu kuma Misili na maituma mũtũa vandũ vaa. 9 Ĩndĩ nĩmoolilwe nĩ Yeova Ngai woo, na amathoosya kw’okonĩ kwa Sisela mũnene wa ita sya Asoli na kw’okonĩ kwa Avilisiti na kw’okonĩ kwa mũsumbĩ wa Moavi, na mamokita. 10 Na mamwĩkaĩla Yeova amatetheesye na masya, ‘Nĩtũvĩtĩtye, nũndũ nĩtũmũtiĩte Yeova nĩ kana tũthũkũme Mbaali na mĩvwʼanano ya Asitolethi; yu tũvonokye kuma kwʼokonĩ kwa amaitha maitũ nĩ kana tũũthũkũme.’ 11 Nĩvo ĩndĩ Yeova watũmie Yelumbaali na Mbetani na Yevitha na Samũeli na amavonokya kuma kwʼokonĩ kwa amaitha ala mamũthyũlũlũkĩte kĩla vandũ, nĩ kana mwĩkale mwĩ asũvĩĩku. 12 Yĩla mwoonie kana Naasu mũsumbĩ wa Aamimoni aĩ anooka kũkita nenyu, mwatindĩie kũmbĩa, ‘Aiee, nĩtũtwʼĩte kwĩthĩwa na mũsumbĩ nĩ kana atũsumbĩke!’ o na kau Yeova Ngai wenyu nĩwe Mũsumbĩ wenyu. 13 Yu mũsumbĩ ũla mũnyuvĩte nĩwe ũũ, ũla mweetisye. Sisyai! Yeova nũnyuvĩte mũsumbĩ amũsumbĩke. 14 Mwamũkĩa Yeova na mwamũthũkũma na mweewʼa wasya wake na mwaema kũleana na mwĩao wa Yeova, na ethĩwa inywʼĩ na mũsumbĩ ũla ũmũsumbĩkĩte mũkaatĩĩaa Yeova Ngai wenyu, nĩ ũseo. 15 Ĩndĩ mwaema kwĩwʼa wasya wa Yeova na mwaleana na mwĩao wa Yeova, kwʼoko kwa Yeova kũkeethĩwa ĩũlũ wenyu na aa-ĩthe menyu. 16 Yu ũkai na mũũngame vaa mwone ũndũ ũũ mũnene Yeova ũkwĩka mbee wa metho menyu. 17 Yo ũmũnthĩ ti ĩvinda ya ngetha ya nganũ? Nĩngũmwĩkaĩla Yeova aete kĩtundumo na mbua; nĩvo ĩndĩ mũũmanya na mũielewa ũndũ mũthũku ũla mwĩkĩte methonĩ ma Yeova kwa kwĩyĩtĩsya mũsumbĩ.”
18 Nũndũ wa ũu, Samũeli nĩwamwĩkaĩlile Yeova, na Yeova atuma kũtunduma na kua mbua mũthenya ũsu, kwoou andũ onthe mamũkĩa Yeova mũno na Samũeli. 19 Na andũ onthe meea Samũeli atĩĩ: “Mũvoye Yeova Ngai waku kwondũ wa athũkũmi maku, nũndũ tũikwenda kũkwʼa, nĩkwĩthĩwa nĩtwongelete ũthũku ũngĩ naĩnĩ sitũ syonthe kwa kwĩtya mũsumbĩ.”
20 Kwoou Samũeli eea andũ atĩĩ: “Mũikakĩe. Vate nzika, nĩmwĩkĩte ũthũku ũũ wʼonthe. Ĩndĩ mũikelelũke mũeke kũmũatĩĩa Yeova, na mũthũkũmei Yeova na ngoo yenyu yonthe. 21 Mũikelelũke mũatĩĩe maũndũ ma mana,* ala matatethya na matatonya kũtũvonokya, nũndũ nĩ ma mana.* 22 Kwondũ wa ĩsyĩtwa yake ĩnene, Yeova ndakatia andũ make, nĩkwĩthĩwa Yeova nũtwʼĩte we mwene kũmũtwʼĩkĩthya andũ make. 23 A vakwa, ndyamba kũsũanĩa kũmũvĩtĩsya Yeova kwa kũeka kũvoya kwondũ wenyu, na nĩendeea kũmũmanyĩsya nzĩanĩ ĩla nzeo na yaĩlĩte. 24 Ĩndĩ kĩai Yeova, na mũthũkũmei mwĩ aĩkĩĩku* na ngoo yenyu yonthe, nũndũ sisyai maũndũ manene ala wĩkĩte kwondũ wenyu. 25 Ĩndĩ mwaendeea kwĩka kĩla kĩthũku mũte kwĩwʼa nthoni, mũkatutwa vyũ, inywʼĩ na mũsumbĩ wenyu.”