Ĩvuku ya Mbee ya Samũeli
14 Mũthenya ũmwe, Yonathani mwana wa Saũlo eeie mũthũkũmi ũla wamũkuĩaa mĩio yake ya kaũ atĩĩ: “Ũka tũinge tũthi kĩsesenĩ kya Avilisiti kĩla kĩ ngalĩko ĩla ĩngĩ.” Ĩndĩ ndaatavya ĩthe wake. 2 Saũlo ekalaa vakuvĩ na mũvaka wa Ngivea ungu wa mũtĩ wa makũngũmanga kũu Mikiloni, na aĩ vamwe na aũme ta 600. 3 (Na Aiya mwana wa Aituvu, mwana-a-ĩthe wa Ikavotu, mwana wa Vineasi, mwana wa Eli, mũthembi wa Yeova kũu Silo, nĩwe wakuaa evoti.) Na andũ mayeesĩ kana Yonathani aĩ aendie. 4 Yu katĩkatĩ wa kũndũ kũla Yonathani watataa kũingĩla nĩ kana avike kĩsesenĩ kya Avilisiti vaĩ na ĩvia yĩmwe yĩ ngũka yailye ĩeo ngalĩko ĩmwe na ĩvia yĩ ngũka yailye ĩeo ngalĩko ĩla ĩngĩ; yĩmwe yeetawa Mbosesi, na yĩla yĩngĩ yeetawa Sene. 5 Ĩvia yĩmwe yĩ ngũka yaĩ kĩtuĩ ngalĩkonĩ ya ĩũlũ yĩsyaĩtye Mikimasi, na yĩla yĩngĩ ngalĩkonĩ ya ĩtheo yĩsyaĩtye Ngeva.
6 Kwoou Yonathani eea ũla wamũkuĩaa mĩio yake ya kaũ atĩĩ: “Ũka tũinge tũthi kĩsesenĩ kya aũme aa mate aĩke. Noĩthwa Yeova atũtetheesya, nũndũ vai kĩndũ kĩtonya kũmũsiĩĩa Yeova kũtangĩĩa atũmĩĩte andũ aingĩ kana atũmĩĩte andũ anini.” 7 Nĩvo ĩndĩ ũla wamũkuĩaa mĩio yake ya kaũ wamwĩie: “Ĩka ũndũ o na wĩva ũla ngoo yaku ĩkũkwĩkĩa vinya wĩke. Thi vala ũkwenda, na nĩngũkũatĩĩa vandũ o na va vala ngoo yaku ĩkũkwĩkĩa vinya ũthi.” 8 Na ĩndĩ Yonathani asya: “Twĩinga tũthi kũla kwĩ aũme asu na tũyĩyonanyʼa kũla maĩ. 9 Matwĩa, ‘Ũngamai vau nginya tũke kũla mũĩ!’ twĩũngama vala tũĩ na tũiambata kũla maĩ. 10 Ĩndĩ matwĩa, ‘Ambatai mũke!’ nĩtũkwambata, nũndũ Yeova nũkũmanengane kwʼokonĩ kwitũ. Ũsu nĩwʼo ũkwĩthĩwa wonanyʼo kwitũ.”
11 Nĩvo ĩndĩ me elĩ meeyonanisye kĩsesenĩ kya Avilisiti. Avilisiti maisye atĩĩ: “Sisyai! Aevelania makwetye kuma maimanĩ vala matwĩe mevithĩte.” 12 Kwoou aũme ma kĩsese kĩu meeie Yonathani na ũla wamũkuĩaa mĩio yake ya kaũ: “Ambatai kũũ tũĩ, na nĩtũũmwonyʼa!” Yonathani ate kwananga ĩvinda eeie ũla wamũkuĩaa mĩio yake ya kaũ atĩĩ: “Mbatĩĩe, nũndũ Yeova nũkũmanengane kwʼokonĩ kwa Isilaeli.” 13 Na Yonathani alĩsa na moko na maaũ, na ũla wamũkuĩaa mĩio yake ya kaũ amũatĩĩa; na Yonathani ambĩĩa kũvithũkĩa Avilisiti, nake ũla wamũkuĩaa mĩio yake ya kaũ amũatĩĩa amoaĩte. 14 Yĩla Yonathani na ũla wamũkuĩaa mĩio yake ya kaũ mamavithũkĩie ya mbee, makũnie mooaa aũme ta 20 mũũndanĩ wĩ na ũasa ta wa nusu eka ũtonya kũĩmwa na mũlaũ.*
15 Nĩvo ĩndĩ wia mwingĩ wanyaĩĩkie andũnĩ ala maĩ kambinĩ ĩla yaĩ mũũndanĩ na katĩ wa andũ onthe ala maĩ kĩsesenĩ kĩu, na o na ikundi ila sya kũvithũkĩa syakwatwa nĩ wia. Nthĩ nĩyambĩĩie kũthingitha, na kweethĩwa na wia mwingĩ kuma kwa Ngai. 16 Asungi ma Saũlo ala maĩ Ngivea ya Mbenyamini nĩmoonie kana kĩthokoanyʼo kĩu kyaendeee kũnyaĩĩka ngalĩko syonthe.
17 Saũlo eeie andũ ala maĩ vamwe nake atĩĩ: “Mwa talai andũ, mwone nũũ ũtũtiie.” Yĩla matalile andũ, nĩmamanyie kana Yonathani na ũla wamũkuĩaa mĩio yake ya kaũ mayaĩ vo. 18 Nĩvo ĩndĩ Saũlo weeie Aiya atĩĩ: “Thengeesya Ĩsandũkũ ya Ngai ũla wa w’o!” (Nĩkwĩthĩwa Ĩsandũkũ ya Ngai ũla wa w’o yaĩ na Aisilaeli ĩvindanĩ yĩu.*) 19 Na Saũlo aendeee kũneena na mũthembi, kĩthokoanyʼo kambinĩ ya Avilisiti kyaendeee kwongeleka mũno. Nĩvo ĩndĩ Saũlo weeie mũthembi atĩĩ: “Eka ũndũ ũkwĩka.”* 20 Kwoou Saũlo na andũ onthe ala maĩ nake nĩmoombanie na mathi kaũnĩ, vala meethĩie kana Avilisiti maĩ manambĩĩa kũaana mo ene na mbyũ, na kũvũavũana kwaĩ kwingĩ mũno. 21 O na ĩngĩ, Aevelania ala vau mbeenĩ makwataa mbau Avilisiti na ala mambatanĩtye namo kambinĩ maendeee kũkĩlanĩlya kũla kwĩ Aisilaeli ala matongoewʼe nĩ Saũlo na Yonathani. 22 Aũme onthe Aisilaeli ala meevithĩte kĩsionĩ kĩ iĩma kya Evilaimu nĩmeewie kana Avilisiti maĩ manasemba makakĩa, na nũndũ wa ũu, o namo nĩmalikile kaũnĩ na mamasembanyʼa. 23 Kwoou Yeova nĩwatangĩĩie Aisilaeli mũthenya ũsu, na kaũ wanyaĩĩka nginya Mbethi-aveni.
24 Ĩndĩ mũthenya ũsu aũme ma Isilaeli maĩ avinyĩĩe mũno, nũndũ Saũlo nĩwaavĩthĩtye andũ aimea atĩĩ: “Nĩ mũumanĩe mũndũ ũla ũkũya lĩu* o na ũmwe ĩtavikĩte ĩ ya wĩoo na ndambĩte kwĩyĩĩvanĩsya amaitha makwa!” Kwoou vai mũndũ waaya lĩu o na ũmwe mũthenya ũsu.
25 Na andũ onthe* malika kĩthekanĩ, na kũu kwaĩ ũkĩ wa nzũkĩ wetĩkangĩte nthĩ. 26 Yĩla andũ mavikie kĩthekanĩ, nĩmoonie ũkĩ ũyĩtĩka, ĩndĩ vai mũndũ waatata kwĩkĩa kwʼoko kwake kanywʼanĩ wake aũsame, nũndũ nĩmakĩaa ũla wĩvĩto. 27 Ĩndĩ Yonathani ndeewʼĩte ĩthe ayĩavĩthya andũ, kwoou nĩwatambũũkisye mũthya wa ndata ĩla wakwete na atina mawa ma ũkĩ. Yĩla waumisye kwʼoko kwake vau na aya ũkĩ ũsu, metho make nĩmakenie. 28 Nũndũ wa ũu, mũndũ ũmwe katĩ wa andũ aisye atĩĩ: “Ĩthe waku nĩwavĩthisye andũ kwa ũito, aimea, ‘Nĩ mũumanĩe mũndũ ũla ũkũya lĩu ũmũnthĩ!’ Nĩkyo kĩtumi andũ manoete mũno wĩana ũu.” 29 O na ũu wĩ o vo, Yonathani aisye atĩĩ: “Ĩthe wakwa nũetete thĩna mũnene nthĩ ĩno. Sisyai ũndũ metho makwa makenete nĩkwĩthĩwa nĩnasama kalũkĩ kaa kanini ka nzũkĩ. 30 Wĩthĩwa wĩ ũndũ ũseũvĩte ata keka ũmũnthĩ andũ nĩmaĩe mũtavo ũla mavenie amaitha moo mateũsiĩĩwa! Nĩvo ĩndĩ Avilisiti aingĩ mũno vyũ methĩwa moaiwe.”
31 Mũthenya ũsu nĩmaendeeie kũaa Avilisiti kuma Mikimasi nginya Aiyaloni, na andũ manoa mũno. 32 Kwoou andũ mambĩĩa kũsembea mũtavo me na ĩtomo, na moosa malondu na ngʼombe na tũsaũ na maithĩnzĩa vau nthĩ, na maĩsanĩsya nyama na nthakame. 33 Nĩvo ĩndĩ Saũlo wataviwʼe atĩĩ: “Sisya! Andũ maendeee kũmũvĩtĩsya Yeova nũndũ meĩsanĩsya nyama na nthakame.” Nake Saũlo asya atĩĩ: “Mweeka ta andũ mate na mũĩkĩĩo. Vingilityai ĩvia ĩnene mũyĩete vala nĩĩ mĩtũkĩ.” 34 Na ĩndĩ Saũlo asya atĩĩ: “Endai kwʼonthe kũla kwĩ andũ na mũimea, ‘Kĩla ũmwe wenyu no nginya aete nzaũ yake na ĩlondu yake na aithĩnzĩa vaa na ĩndĩ mũyĩiya. Mũikamũvĩtĩsye Yeova kwa kũĩsanĩsya nyama na nthakame.’” Kwoou ũtukũ ũsu kĩla ũmwe woo aete nzaũ yake na amĩthĩnzĩa vau. 35 Na Saũlo aakĩa Yeova kĩthembeo. Kĩĩ nĩkyo kĩthembeo kya mbee kĩla waakĩie Yeova.
36 Ĩtina, Saũlo aisye atĩĩ: “Ekai tũtheee tũatĩĩe Avilisiti ũtukũ na tũimavena syĩndũ syoo nginya kũkye. Tũieka o na ũmwe woo avonoke.” Namo mamwĩa atĩĩ: “Ĩka ũndũ o na wĩva ũkwona wĩ ũseo methonĩ maku.” Nĩvo ĩndĩ mũthembi waisye: “Ekai tũmũthengeee Ngai ũla wa w’o vandũnĩ vaa.” 37 Na Saũlo akũlya Ngai: “Nĩnaĩlĩte kũtheea nĩatĩĩe Avilisiti? Nũũmanengane kwʼokonĩ kwa Isilaeli?” Ĩndĩ Ngai ndaamũsũngĩa mũthenya ũsu. 38 Kwoou Saũlo asya: “Ũkai vaa, inywʼĩ anene onthe ma andũ, mũmanthe nĩ naĩ yĩva yĩkiwe ũmũnthĩ. 39 Nũndũ vate nzika, o tondũ Yeova wĩ thayũ, ũla ũvonoketye Aisilaeli, o na tweethĩa nĩ mwana wakwa Yonathani, no nginya akwʼe.” Ĩndĩ vai mũndũ o na ũmwe waamũsũngĩa. 40 Nĩvo ĩndĩ weeie Aisilaeli onthe atĩĩ: “Mwĩĩthĩwa ngalĩko ĩmwe, nakwa na mwana wakwa Yonathani tũyĩthĩwa ngalĩko ĩla ĩngĩ.” Na andũ meea Saũlo: “Ĩka kĩndũ o na kĩva ũkwona kĩ kĩseo methonĩ maku.”
41 Na ĩndĩ Saũlo eea Yeova atĩĩ: “Ame Ngai wa Isilaeli, sũngĩa na Thumimu!” Nĩvo ĩndĩ Yonathani na Saũlo manyuviwe, na andũ maekwa mathi. 42 Yu Saũlo aisye: “Kũnai kula mũtwʼe katĩkatĩ wakwa na mwana wakwa Yonathani.” Na Yonathani anyuvwa. 43 Na ĩndĩ Saũlo akũlya Yonathani atĩĩ: “Ndavye, wĩkie ata?” Kwoou Yonathani amwĩa: “Nzamie o kalũkĩ kanini ka nzũkĩ na mũthya wa ndata ĩno ngwete. Yu nĩ vaa! Nĩnĩyũmbanĩtye kũkwʼa!”
44 Nũndũ wa ũu, Saũlo asya: “Kwoou Ngai nandetee ũkũno mũnene na ayĩka ũu o na mbeange ethĩwa we Yonathani ndwĩkwʼa.” 45 Ĩndĩ andũ meea Saũlo atĩĩ: “Yonathani, ũla ũeteie Aisilaeli ũsindi* ũũ ũnenevete ũu, nĩwaĩle kũkwʼa? Nĩ ũndũ ũtasũanĩĩka! Vate nzika, o tondũ Yeova wĩ thayũ, vai ũswʼĩĩ o na ũmwe wa mũtwe wake waĩlĩte kũvalũka nthĩ, nũndũ Ngai nĩwe ũmũtetheeisye kwĩanĩsya ũndũ ũsu ũmũnthĩ.” Kwoou andũ mamũvonokya* Yonathani, na ndaakwʼa.
46 Nũndũ wa ũu, Saũlo aeka kũatĩĩa Avilisiti, namo Avilisiti mathi kĩsionĩ kyoo.
47 Saũlo nĩwalũlũmĩĩilye ũsumbĩ wake ĩũlũ wa Isilaeli na okita na amaitha make onthe ngalĩko syonthe, okita na Amoavi, Aamimoni, Aetomu, asumbĩ ma Nzova, na Avilisiti; na kĩla vandũ waendaa nĩwamasindaa. 48 Na okita na ũkũmbaũ na asinda Aamaleki na atangĩĩa Aisilaeli kuma kwʼokonĩ kwa ala matavaa syĩndũ syoo.
49 Ana ma Saũlo maĩ Yonathani, Isivi, na Maliki-sua. Na aĩ na eĩtu elĩ; ũla mũkũũ eetawa Melavu, na ũla mũnini eetawa Mikali. 50 Mũka wa Saũlo eetawa Ainoamu mwĩĩtu wa Aimaasi. Mũnene wa ita syake eetawa Avineli mwana wa Neli, mwendwʼa-ĩthe wa Saũlo. 51 Kisi nĩwe waĩ ĩthe wa Saũlo, na Neli ĩthe wa Avineli aĩ mwana wa Avieli.
52 Mĩthenyanĩ yonthe ya Saũlo, kweethĩawa kaũ mũvyũ katĩ wake na Avilisiti. Yĩla Saũlo woona mũndũ o na wĩva wĩ vinya na wĩ ũkũmbaũ, nĩwamũlikasya ũthũkũminĩ wake.