Ĩvuku ya Mbee ya Samũeli
23 Ĩtina wa ĩvinda, Ndaviti ataviwʼe atĩĩ: “Avilisiti nĩmavithũkĩa Keila, na maendeee kũmavena lĩu wa mbaa ngetha ũla wĩ ivũĩonĩ syoo.” 2 Kwoou Ndaviti akũlya Yeova atĩĩ: “Yo nĩnaĩle kũthi ngoae Avilisiti asu?” Nake Yeova asũngĩa Ndaviti amwĩa: “Enda, ũkoae Avilisiti asu na ũivonokya Keila.” 3 Ĩndĩ aũme ma Ndaviti mamwĩie atĩĩ: “Sisya! Nĩtũũkĩa twĩ vaa Yuta; wĩona ta veũthi ata twathi Keila tũkokite na ikosi sya kaũ sya Avilisiti!” 4 Kwoou Ndaviti akũlya ũtao wa Yeova ĩngĩ. Yu Yeova amũsũngĩie atĩĩ: “Ũkĩla; theea Keila nũndũ nĩngũnengane Avilisiti kwʼokonĩ kwaku.” 5 Kwoou Ndaviti nĩwaendie na aũme make Keila na okita na Avilisiti; nĩwoosie indo syoo na ooaa Avilisiti aingĩ mũno, na Ndaviti avonokya ekali ma Keila.
6 Yu yĩla Aviathali mwana wa Aimeleki wasembie athi kũla kwĩ Ndaviti kũu Keila, asembie na evoti. 7 Saũlo ataviwʼe atĩĩ: “Ndaviti nĩwooka Keila.” Nĩvo ĩndĩ Saũlo waisye: “Ngai nĩwamũnengane mokonĩ makwa,* nĩkwĩthĩwa nĩweelikya kĩteinĩ kwa kũlika ndũanĩ yĩ na mĩvĩa na mĩamba.” 8 Kwoou Saũlo nĩweetie andũ onthe mathi kaũnĩ, matheee Keila makatwʼĩkanĩsye Ndaviti na aũme make. 9 Yĩla Ndaviti wamanyie kana Saũlo aendeee kũvanga mũvango wa kũmũaa, eeie mũthembi Aviathali atĩĩ: “Ete evoti vaa.” 10 Nĩvo ĩndĩ Ndaviti waisye atĩĩ: “Ame Yeova Ngai wa Isilaeli, vate nzika, mũthũkũmi waku nĩweewʼa kana Saũlo avangĩte kũka Keila nĩ kana anange ndũa ĩsu nũndũ wakwa. 11 Mo atongoi* ma Keila nĩmeũnengane kwʼokonĩ kwake? We Saũlo nũkũtheea oke o tondũ mũthũkũmi waku weewʼa? Ame Yeova Ngai wa Isilaeli, mwa tavya mũthũkũmi waku.” Nĩvo ĩndĩ Yeova wamwĩie atĩĩ: “Nũkũtheea oke.” 12 Ndaviti akũlilye: “Mo atongoi ma Keila nĩmeũnengane vamwe na aũme makwa kwʼokonĩ kwa Saũlo?” Nake Yeova amũsũngĩa: “Nĩmeũkũnengane.”
13 Vau kwa vau, Ndaviti nĩwookĩlile e na aũme make, aũme ta 600, na mauma Keila na mathi kũndũ o na kwĩva kũla maĩ matonya kũthi. Yĩla Saũlo wataviwʼe kana Ndaviti nĩwakĩa auma Keila, ndaamũatĩĩa. 14 Ndaviti nĩwekalile weũnĩ kũndũ kwĩ vinya kũvikĩka, kĩsionĩ kĩ iĩma weũnĩ wa Nzivu. Saũlo nĩwaendeeie kũmũmantha, ĩndĩ Yeova ndaamũnengane kwʼokonĩ kwake. 15 Ndaviti e weũnĩ wa Nzivu kũu Olesi nĩweesĩ kana* Saũlo nĩwamũmanthaa amũae.*
16 Yu Yonathani mwana wa Saũlo nĩwaendie kũla kwĩ Ndaviti kũu Olesi, na amũtetheesya akwate vinya nthĩnĩ wa Yeova.* 17 Amwĩie atĩĩ: “Ndũkakĩe, nĩkwĩthĩwa ĩthe wakwa Saũlo ndakaũkwata; we ũkeethĩwa mũsumbĩ wa Isilaeli, nakwa ngeethĩwa wa kelĩ kuma vala ũĩ; o na ĩthe wakwa Saũlo nĩwĩsĩ ũu.” 18 Nĩvo ĩndĩ me elĩ matianĩie ũtianĩo mbee wa Yeova, na Ndaviti ekala Olesi, na Yonathani asyoka mũsyĩ kwake.
19 Ĩtina wa ĩvinda, aũme ma Nzivu nĩmambatie kũla kwĩ Saũlo kũu Ngivea na mamwĩa atĩĩ: “We Ndaviti ndevithĩte vakuvĩ naitũ kũndũnĩ kwĩ vinya kũvikĩka kũu Olesi, kalĩmanĩ ka Akila, ngalĩkonĩ ya ĩtheo* ya Yesimoni?* 20 Ĩvinda o na yĩva yĩla ũkwenda* kũtheea, we mũsumbĩ, theea, na nĩtũũmũnengane kwʼokonĩ kwa mũsumbĩ.” 21 Nake Saũlo asya: “Yeova namũathime, nũndũ nĩmwambĩwʼĩa ĩnee. 22 Mwa endai na mũitata kũmanya kwa wʼo aĩva na mũndũ ũla ũnamwonie kũu, nũndũ nĩnĩtavĩtwʼe kana e ũseleke mũno. 23 Tatai mũmanye nesa kũndũ kwʼonthe kũla wĩvithaa na mũimbetee ũkũsĩ wa ũndũ ũsu. Nĩvo ĩndĩ ngaendanyʼa nenyu, na ethĩwa e nthĩ ĩno, ngamũmantha katĩ wa makili onthe ma* Yuta.”
24 Kwoou mauma vau na mathi Nzivu mbee wa Saũlo, na ĩvindanĩ yĩu Ndaviti na aũme make maĩ weũnĩ wa Maoni, ũla wĩ Alava ngalĩko ya ĩtheo ya Yesimoni. 25 Nĩvo ĩndĩ Saũlo wookie na aũme make amũmanthe. Yĩla Ndaviti wataviwʼe ũu, vau kwa vau nĩwatheeie ĩvianĩ yĩ ngũka na ekala weũnĩ wa Maoni. Nake Saũlo eewʼa ũu, nĩwasembanisye Ndaviti weũnĩ wa Maoni. 26 Yĩla Saũlo wavikie ngalĩkonĩ ĩmwe ya kĩĩma, Ndaviti na aũme make maĩ ngalĩkonĩ ĩla ĩngĩ ya kĩĩma. Ndaviti nĩweekalatĩte mũno asembe athi vaasa na Saũlo, ĩndĩ Saũlo na aũme make maendeee kũthengeea Ndaviti na aũme make nĩ kana mamakwate. 27 Ĩndĩ mũtũmwa ooka vala ve Saũlo, ayasya: “Ũka mĩtũkĩ, nũndũ Avilisiti nĩmavithũkĩa nthĩ yitũ!” 28 Saũlo eewʼa ũu, nĩwaekie kũsembanyʼa Ndaviti na athi kũkita Avilisiti. Nĩkyo kĩtumi vandũ vau veetiwe Ĩvia yĩ Ngũka ya Kũtaanĩsya.
29 Nĩvo ĩndĩ Ndaviti wambatie kuma vau na athi kwĩkala kũndũnĩ kwĩ vinya kũvikĩka kũu Eni-ngeti.