Valũa wa Yakovo
3 Ana-a-asa makwa, ti aingĩ katĩ wenyu maĩle kwĩthĩwa amanyĩsya, mũimanya kana tũkakwata ũsilĩlo mũito kwĩ ala angĩ. 2 Nũndũ ithyonthe nĩtũlulutĩkaa * mavinda maingĩ. Ethĩwa mũndũ o na wĩva ndalulutĩkaa ndetonĩ, ũsu nĩ mũndũ ũte na naĩ, ũtonya kũsiĩĩa mwĩĩ wake wʼonthe. 3 Yĩla tweekĩa itangʼa makanywʼanĩ ma mbalasi nĩ kana syĩke ũndũ tũkwenda, nĩtũtongoeasya mwĩĩ wasyo wʼonthe o nawʼo. 4 Sisyai meli o nasyo: O na kau syĩthĩawa syĩ nene mũno na itwaawa nĩ iseve syĩ na vinya, ikomoawa nĩ sukani nini mũno ikathi vandũ o na va vala mũndũ ũla ũtwaĩte ũkwenda.
5 O ta ũu ũĩmĩ nĩ kamutha kanini ka mwĩĩ, ĩndĩ wĩkathĩĩaa mũno. Sisyai ũndũ mwaki mũnini ũtonya kũvĩvya kĩtheka kĩnenevete! 6 Ũĩmĩ o nawʼo nĩ mwaki. Na katĩ wa mamutha maitũ onthe, ũĩmĩ wusũĩte maũndũ mate malũngalu, nũndũ nũvukasya mwĩĩ wʼonthe na nũkwatasya mwaki thayũ wa mũndũ wʼonthe, na mwaki wawʼo wumaa Ngiena. * 7 Nũndũ kĩla mũthemba wa nyamũ ya kĩthekanĩ, na nyũnyi, na tũsamũ tũla tũtambũkaa, * na nyamũ sya ũkanganĩ no ivoovwʼe na nivoovawʼa nĩ andũ. 8 Ĩndĩ vaiĩ mũndũ ũtonya kũvoovya ũĩmĩ. Nũndũ ndũtonya kũvoovwʼa na nũtonya kũũmĩsya, na wusũĩte sumu mũthũku mũno. 9 Nĩtũtũmĩaa ũĩmĩ kũmũtaĩa Yeova, ũla nĩwe Ĩthe waitũ, na tũitũmĩa ũĩmĩ o ũsu kũumanĩa andũ ala moombiwe “na mũvwʼano wa Ngai.” 10 Ũathimo na kĩumo nĩsyumaa kanywʼanĩ o ũmwe.
Ana-a-asa makwa, ti ũseo maũndũ kwĩthĩwa mailye ũu. 11 Yo nthongo ĩmwe nĩtonya kumya kĩwʼũ kĩseo na kĩwʼũ kĩ ũũ? 12 Ana-a-asa makwa, mũkũyũ ndũtonya kũsyaa matunda ma mũthata, kana mũsavivũ ũkasyaa makũyũ, kana nũtonya? O na kĩthima kĩ mũnyũ kĩitonya kuma kĩwʼũ kĩseo.
13 Nũũ ũla mũĩ na wĩ na ũmanyi katĩ wenyu? Ekai kwĩsĩla mwĩkalĩle wake mũseo onanyʼe meko ala wĩkĩte e na ũuu ũla wumanaa na ũĩ. 14 Ĩndĩ ethĩwa mwĩ na kĩwĩu kyai na masindano ngoonĩ syenyu, mũikethĩwe mũyĩkathĩĩa na kũneenea ũla wʼo ũvũngũ. 15 Ũsu ti ũĩ ũla wumaa ĩũlũ; ĩndĩ nĩ ũĩ wa nthĩ, wa kĩ-mwĩĩ, na wa ndaimoni. 16 Nũndũ vala ve kĩwĩu na masindano, vethĩawa kĩthokoanyʼo na kĩla ũndũ mũthũku.
17 Ĩndĩ ũĩ ũla wumaa ĩũlũ, mbee nĩ mũtheu, na nũetae mũuo, nĩwĩtĩkĩlaa mawoni, nĩwĩthukĩĩasya, nĩwĩthĩawa na tei mwingĩ na mosyao maseo, ndwĩ kyende, na ndwĩ wanganganyʼa. 18 O na ĩngĩ, ũsyao wa ũlũngalu ũvandawa yĩla kwĩ mũuo kwa * ala maetae mũuo.