Ũvuanyʼo kwa Yoana
5 Na kw’okonĩ kwa aũme kwa Ũla wĩkalĩte kĩvĩlanĩ kya ũsumbĩ nĩnoonie ĩvuku ya kũkũnzwa yĩandĩkĩtwe ngalĩko syelĩ, yĩsiĩlĩtwe na mosiĩlo mũonza yĩkalũma vyũ. 2 Na noona mũlaĩka wĩ vinya aineena na wasya mũnene, akyasya: “Nũũ ũla waĩlĩte kũvingũa ĩvuku ya kũkũnzwa na kũmbũa mosiĩlo mayo?” 3 Ĩndĩ vaiĩ o na ũmwe ĩtunĩ kana ĩũlũ wa nthĩ kana ungu wa nthĩ waĩ atonya kũvingũa ĩvuku yĩu ya kũkũnzwa kana kũsisya nthĩnĩ wayo. 4 Nĩnaĩie mũno nũndũ vayaĩ o na ũmwe waaoneka ũla ũtonya kũvingũa ĩvuku yĩu ya kũkũnzwa kana kũsisya nthĩnĩ wayo. 5 Ĩndĩ ũmwe wa ala atumĩa ambĩa: “Eka kũĩa. Sisya! Mũnyambũ wa mbaĩ ya Yuta, mwĩi wa Ndaviti, nĩwasindie nĩ kana avingũe ĩvuku ya kũkũnzwa na mosiĩlo mayo mũonza.”
6 Na noona kalondu kaũngamĩte vakuvĩ na kĩvĩla kya ũsumbĩ na katĩ wa ila syũmbe inya syĩ thayũ na ala atumĩa, na kailye ta kathĩnze, na kaĩ na mbya mũonza na metho mũonza, na metho asu meonany’a maveva mũonza ma Ngai, ala matũmĩtwe nthĩ yonthe. 7 Na vau kwa vau athengeea mbee na ayosa kuma kw’okonĩ kwa aũme kwa Ũla wekalĩte kĩvĩlanĩ kya ũsumbĩ. 8 Yĩla woosie ĩvuku yĩu ya kũkũnzwa, ila syũmbe inya syĩ thayũ na ala atumĩa 24 mavalũka mbee wa kala Kalondu, na kĩla ũmwe woo aĩ na mbeve na mbakũli sya thaavu ila syausũĩte ũvani. (Ũvani wĩonany’a mboya sya ala atheu.) 9 Na meina wathi mweũ, makyasya: “Nĩwaĩlĩte kwosa ĩvuku ya kũkũnzwa na kũvingũa mosiĩlo mayo, nũndũ nĩwooaiwe na kwĩsĩla nthakame yaku wamũthooea Ngai andũ kuma kwa kĩla ũko na kĩthyomo na andũ na mbaĩ, 10 na wamatw’ĩkĩthya asumbĩ na athembi kwa Ngai waitũ, na makasumbĩka nthĩ me asumbĩ.”
11 Na noona, na neew’a wasya wa alaĩka aingĩ kũthyũlũlũka kĩvĩla kĩu kya ũsumbĩ na ila syũmbe syĩ thayũ na ala atumĩa, na ũtalo woo waĩ ngili mbingĩ mũno kũndũ ngili mbingĩ mũno na makili kũndũ makili, 12 na maneenaa na wasya mũnene, makyasya: “Kalondu kala kooaiwe nĩkaĩlĩte kũnengwa ũtonyi na ũthwii na ũĩ na vinya na ndaĩa na nguma na ũathimo.”
13 Na neew’a syũmbe syonthe ila syĩ ĩtunĩ na ĩũlũ wa nthĩ na ungu wa nthĩ na ũkanganĩ, na syĩndũ syonthe ila syĩ nthĩnĩ wasyo, ikyasya: “Kwa Ũla wĩkalĩte kĩvĩlanĩ kya ũsumbĩ na kwa kala Kalondu nĩkwĩthĩwe ũathimo na ndaĩa na nguma na vinya tene na tene.” 14 Na ila syũmbe inya syĩ thayũ syasya: “Ameni!” na ala atumĩa mavalũka na mathaitha.