Ĩvuku ya Kelĩ ya Samũeli
16 Yĩla Ndaviti waĩ anavĩtũka o vanini mũthya wa kĩĩma, Nziva, mũthũkũmi wa Mevivosethi, aĩ vau amweteelete e na mangʼoi elĩ matandĩke, na mangʼoi asu makuĩte mĩkate 200, tũmĩkate 100 twa nzavivũ mbũmĩthye, tũmĩkate 100 twa matunda ma ĩvinda ya sua,* na mbisũ nene ya mbinyu. 2 Nĩvo ĩndĩ mũsumbĩ wakũlilye Nziva atĩĩ: “Nĩkĩ waete syĩndũ ii? Nake Nziva amũsũngĩa: “Mangʼoi nĩ ma kũkua andũ ma nyũmba ya mũsumbĩ, nawʼo mũkate na matunda ma ĩvinda ya sua nĩ ma kũĩwa nĩ anake, na mbinyu nĩ ya kũnyuwa nĩ ala manoea weũnĩ.” 3 Na ĩndĩ mũsumbĩ amũkũlya: “Na aĩva mwana* wa vwana waku?” Nake Nziva amwĩa mũsumbĩ: “E Yelusalemu, nũndũ aisye, ‘Ũmũnthĩ nyũmba ya Isilaeli nĩkũndũngĩa ũsumbĩ wa ĩthe wakwa.ʼ” 4 Na ĩndĩ mũsumbĩ eea Nziva: “Sisya! Syĩndũ syonthe sya Mevivosethi nĩ syaku.” Nake Nziva amũsũngĩa: “Nĩnaũkumanĩa. Eka none ũseo methonĩ maku, mwĩai wakwa mũsumbĩ.”
5 Yĩla Mũsumbĩ Ndaviti wavikie Mbaulimu, mũndũũme ũmwe wa mũsyĩ wa nyũmba ya Saũlo, weetawa Simei, mwana wa Ngela, nĩwaumaalũkile na ooka amũthengeeete amũumangĩte na wasya mũnene. 6 Aendeee kũkimanga Mũsumbĩ Ndaviti na athũkũmi make onthe na mavia, o vamwe na andũ onthe na aũme me vinya ala maĩ kwʼokonĩ kwake kwa aũme na kwʼokonĩ kwake kwa aka. 7 Simei aumanganaa ayasya: “Ĩvetange vaa, ĩvetange vaa, we mũndũ wĩ na ĩvĩtyo ya kwĩtĩkya nthakame! Wĩ mũndũ vathei! 8 Yeova nĩwatũnga ĩũlũ waku ĩvĩtyo yonthe ya nthakame ĩla wetĩkisye ya nyũmba ya Saũlo, ũla ũsumbĩkĩte vandũ vake, ĩndĩ Yeova nĩwanengane ũsumbĩ kwʼokonĩ kwa Avisalomu mwana waku. Yu mũisyo nĩwaũkwata nũndũ wĩ na ĩvĩtyo ya kwĩtĩkya nthakame!”
9 Nĩvo ĩndĩ Avisai mwana wa Nzeluia weeie mũsumbĩ atĩĩ: “Yo ngitĩ ĩĩ ngwʼũ yĩumanga mwĩai wakwa mũsumbĩ nĩkĩ? Mwa, eka nĩthi, nĩtile mũtwe wake.” 10 Ĩndĩ mũsumbĩ asya atĩĩ: “Twĩthĩnanĩsya kyaũ nenyu, inywʼĩ ana ma Nzeluia? Ekai ambumange, nĩkwĩthĩwa Yeova amwĩa, ‘Umanga Ndaviti!’ Kwoou nũũ waĩlĩte kũmũkũlya, ‘Wĩĩka ũu nĩkĩ?’” 11 Na ĩndĩ Ndaviti eea Avisai na athũkũmi make onthe atĩĩ: “Yu ethĩwa mwana wakwa mwene, ũla nzyaĩte, nũkũmantha thayũ wakwa, ti mbee mũnango Mũmbenyamini! Ekanai nake ambumange, nũndũ Yeova amwĩa eke ũu! 12 Noĩthwa Yeova akona kũnyamaa kwakwa, na Yeova aindũngĩa ũseo vandũ va kũumangwa kũla Simei wambumanga ũmũnthĩ.” 13 Kwoou Ndaviti na aũme make maendeea kũtheea na nzĩa, nake Simei esĩlĩte ũtee wa kĩĩma avasanĩte nake, aumanganĩte na ekĩtye mavia na kĩtoo kingĩ.
14 Mũthya, mũsumbĩ na andũ onthe ala maĩ vamwe nake nĩmavikie vala maendete me anou mũno, na mavika mathũmũa.
15 Ĩvindanĩ o yĩu, Avisalomu na aũme onthe ma Isilaeli nĩmavikie Yelusalemu, na Aithoveli aĩ vamwe nake. 16 Yĩla Usiai ũla waĩ Mũaliki, mũnyanyae wa Ndaviti, wookie vala ve Avisalomu, eeie Avisalomu atĩĩ: “Mũsumbĩ nĩekale ĩvinda yĩasa! Mũsumbĩ nĩekale ĩvinda yĩasa!” 17 Nĩvo ĩndĩ Avisalomu wakũlilye Usiai: “Ũũ nĩwʼo ũkwonyʼa mũnyanyau wendo ũtathelaa? Nĩkĩ ũtanaendanyʼa na mũnyanyau?” 18 Kwoou Usiai eea Avisalomu: “Aiee, nĩ ngalĩkonĩ ya ũla ũnyuvĩtwe nĩ Yeova, andũ aa, na aũme onthe ma Isilaeli. Ũsu nĩwe ngwĩkala nake. 19 O na ĩngĩ nĩasya, We nũũ naĩlĩte kũthũkũma? Yo ndyaĩlĩte kũthũkũma mwana wake? O tondũ nathũkũmie ĩthe waku, nowʼo ngũũthũkũma.”
20 Na ĩndĩ Avisalomu eea Aithoveli: “Nenge ũtao. Twaĩlĩte kwĩka ata?” 21 Nĩvo ĩndĩ Aithoveli weeie Avisalomu: “Koma na iveti sya ndũsyo* sya ĩthe waku, ila ũnatiie isũvĩe nyũmba.* Na ĩndĩ Aisilaeli onthe nĩmekwĩwʼa kana nũtwʼĩkĩte mũuke mũthũku vala ve ĩthe waku, na ala maũkwete mbau nĩmeũlũlũmĩĩlwʼa.” 22 Kwoou mamwambĩa Avisalomu ĩeema kĩalanĩ, na akoma na iveti sya ndũsyo* sya ĩthe wake mbee wa metho ma Aisilaeli onthe.
23 Mĩthenyanĩ ĩsu ũtao ũla Aithoveli wanengane woonekaa ta* ndeto ya Ngai ũla wa w’o. Ũu nĩwʼo Ndaviti na Avisalomu manengete ũtao wʼonthe wa Aithoveli ndaĩa.