Valũa wa Mbee kwa Akolintho
11 Atĩĩai ngelekanyʼo yakwa o tondũ nyie nĩatĩĩaa ngelekanyʼo ya Klĩsto.
2 Nĩngũmũkatha nũndũ maũndũnĩ onthe nĩmũndilikanaa na nĩmũlũmĩtye vyũ ila syĩthĩo o tondũ namũmanyĩisye syo. 3 Ĩndĩ nĩenda mũmanye kana mũtwe wa kĩla mũndũũme nĩ Klĩsto, nawʼo mũtwe wa mũndũ mũka nĩ mũndũũme; nawʼo mũtwe wa Klĩsto nĩ Ngai. 4 Mũndũũme o na wĩva ũla ũvoyaa kana akaumya wathani avwʼĩkĩte mũtwe wake nĩwũũsonokasya; 5 na mũndũ mũka o na wĩva ũla ũvoyaa kana akathana atavwʼĩkĩte mũtwe wake nĩwũũsonokasya, nũndũ no ũndũ ũmwe na mũndũ mũka wĩ na mũtwe mwenze. 6 Nũndũ ethĩwa mũndũ mũka ndeũvwʼĩka mũtwe wake aĩlĩte kũtila nzwʼĩĩ yake; ĩndĩ ethĩwa nĩ nthoni kwa mũndũ mũka kũtila nzwʼĩĩ yake kana kwenza, aĩlĩte kũvwʼĩka mũtwe wake.
7 Nũndũ mũndũũme ndaĩlĩte kũvwʼĩka mũtwe wake, nĩkwĩthĩwa we nĩ mũvwʼano wa Ngai na onanasya ũnene wake, ĩndĩ mũndũ mũka onanasya ũnene wa mũndũũme. 8 Nũndũ mũndũũme ndaauma kwa mũndũ mũka, ĩndĩ mũndũ mũka aumie mũndũũmenĩ. 9 Na eka ũu, mũndũũme ndaaũmbwa kwondũ wa mũndũ mũka, ĩndĩ mũndũ mũka kwondũ wa mũndũũme. 10 Nĩkyo kĩtumi mũndũ mũka waĩle kwĩthĩwa na wonanyʼo wa ũkũmũ mũtwenĩ wake, nũndũ wa alaĩka.
11 Ũndũ ũngĩ nĩ kana, nthĩnĩ wa Mwĩaĩi, mũndũ mũka ndethĩwa vate mũndũũme, na mũndũũme ndethĩwa vate mũndũ mũka. 12 Nũndũ o tondũ mũndũ mũka waumie mũndũũmenĩ, o ta ũu, mũndũũme asyaawa nĩ mũndũ mũka; ĩndĩ syĩndũ syonthe syaumie kwa Ngai. 13 Twʼai inywʼĩ ene: Nĩ ũndũ waĩle mũndũ mũka kũvoya kwa Ngai atavwʼĩkĩte mũtwe wake? 14 Wʼo mũmbĩle wa mũndũ ndwonanasya nesa kana ti ũndũ wa ndaĩa kwa mũndũũme kwĩthĩwa na nzwʼĩĩ ndaasa, 15 na ethĩwa mũndũ mũka e na nzwʼĩĩ ndaasa nĩ ndaĩa kwake? Nũndũ nũnengetwe nzwʼĩĩ vandũ va kĩndũ kya kũvwʼĩka mũtwe. 16 Ĩndĩ ethĩwa mũndũ eenda kũleana na ũndũ ũsu nũndũ wa kĩthĩo kĩngĩ, ithyĩ tũi na kĩthĩo kĩngĩ, o na ikundi sya Ngai ii na kĩngĩ.
17 Ĩndĩ ngĩmũnenga motao aa ndiũmũkatha, nũndũ mũyũmbanaa kwondũ wa ũseo ĩndĩ mũmbanaa kwondũ wa ũthũku. 18 Ũndũ wa mbee, nĩĩwʼa kana yĩla mwoombana kĩkundinĩ, nĩkwĩthĩawa na mũaanĩko katĩ wenyu; na no nĩĩkĩĩe ũndũ ũsu. 19 Nũndũ vate nzika vakeethĩwa mũtilĩkangano katĩ wenyu, nĩ kana ala metĩkĩlĩkĩte katĩ wenyu mamanyĩke.
20 Yĩla mwoombana vamwe, kwa wʼo mũyĩthĩawa mũiya Kyaũya kya Wĩoo kya Mwĩaĩi. 21 Nũndũ mũtanamba kũkĩya, kĩla ũmwe wenyu ambaa kũya kyaũya kyake kya wĩoo, na ũyĩthĩa ũmwe e na nzaa ĩndĩ ũngĩ nĩ mũmile. 22 No mwĩthĩawa na nyũmba mũtonya kũĩĩa na kũnywʼĩĩa? Kana mũvũthasya kĩkundi kya Ngai, na mũituma ala mate na kĩndũ mewʼa nthoni? Yu ndonya kwasya ata? Nĩnaĩle kũmũkatha? Ndyamba kũmũkatha ũndũnĩ ũsu.
23 Nũndũ kĩla noosie kuma kwa Mwĩaĩi nĩnamũmanyĩisye, kana ũtukũ ũla Mwĩaĩi Yesũ waĩ avũnyanĩwe oosie mũkate, 24 na ĩtina wa kũtũnga mũvea aũtilanga, na asya: “Ũũ wĩonanyʼa mwĩĩ wakwa, ũla wĩnenganwe kwondũ wenyu. Ĩkaai ũu kwondũ wa kũndilikana.” 25 Na ũu nowʼo weekanie na kĩkombe, ĩtina wa kũya kyaũya kya wĩoo, akyasya: “Kĩkombe kĩĩ kĩonanyʼa ũtianĩo mweũ kwĩsĩla nthakame yakwa. Ĩkaai ũu yĩla mũũkĩnywʼa kwondũ wa kũndilikana.” 26 Nũndũ o yĩla mũũya mũkate ũũ na mũũnywʼa kĩkombe kĩĩ, mũendeeaa kũtangaasa kĩkwʼũ kya Mwĩaĩi nginya yĩla wĩũka.
27 Kwoou ũla ũĩsaa mũkate kana akanywʼa kĩkombe kya Mwĩaĩi ũndũ vataĩle, ethĩawa aivĩtĩsya mwĩĩ na nthakame ya Mwĩaĩi. 28 Mbee eka kĩla mũndũ eyĩosye we mwene asisye kana nĩwaĩle, na amina kwĩka ũu aiya mũkate na ainywʼa kĩkombe. 29 Nũndũ ũla ũĩsaa na ũnyusaa ate kũmanya vata wa mwĩĩ, aĩsaa na ainywʼa ũsilĩlo ĩũlũ wake. 30 Kĩu nĩkyo kĩtumi aingĩ katĩ wenyu nĩ onzu na nĩ awau na aingĩ nĩmakwie. * 31 Ĩndĩ tũkeyĩosya nesa ũndũ tũilye, tũitonya kũsilĩlwa. 32 Ĩndĩ yĩla twasilĩlwa, twĩthĩawa twakanwʼa nĩ Yeova, nĩ kana tũikese kwosewa ĩtambya vamwe na nthĩ. 33 Kwoou ana-a-asa, yĩla mwoombana vamwe nĩ kana mũye kyaũya kĩu, eteelanaai. 34 Ethĩwa mũndũ o na wĩva e na nzaa, nĩ aye mũsyĩ, nĩ kana yĩla mwoombana vamwe mũikethĩwe mwoombana kwondũ wa ũsilĩlo. Maũndũ ala matiala ngamalũngalya nooka.