Valũa wa Katatũ wa Yoana
1 Nyie mũtumĩa, kwa Kaio ũla mwendwa, ũla nendete mũno.
2 Mwendwa, nĩvoya nĩ kana maũndũnĩ onthe ũendeee nesa, na ũyĩthĩwa mũima, o tondũ yu ũendeee nesa. 3 Nũndũ nĩnatanie mũno yĩla ana-a-asa mookie na maumya ũkũsĩ ĩũlũ wa ũndũ ũlũmĩtye ũla w’o, na ũndũ ũendaa nthĩnĩ wa ũla w’o. 4 Ndi na ũtanu ũngĩ mwingĩ ũvĩtũkĩte ũũ: * kwĩw’aa kana syana syakwa iendaa nthĩnĩ wa ũla w’o.
5 Mwendwa, nĩwonanasya ũĩkĩĩku waku maũndũnĩ ala wĩkaa kwondũ wa ana-a-asa, o na kau nĩ aeni kwaku. 6 Nĩmaumĩtye ũkũsĩ ĩũlũ wa ũndũ wendete kĩkundi. Maithi matetheesye kwa nzĩa ĩla ĩtonya kũmwendeesya Ngai. 7 Nũndũ maendie kũndũ kwĩ kĩvathũkany’o kwondũ wa ĩsyĩtwa yake, na mayaaosa kĩndũ kuma kwa andũ ma mbaĩ ingĩ. 8 Kwoou no nginya tũthokye andũ ta asu, nĩ kana twĩthĩwe atethya ma wĩa vamwe namo nthĩnĩ wa ũla w’o.
9 Ve ũndũ naandĩkĩie kĩkundi ĩndĩ Ndioteleve, ũla wendete kwĩthĩwa e wa mbee katĩ woo, nũvũthĩĩasya ũndũ o na wĩva ũla wumĩte kwitũ. 10 Nĩkyo kĩtumi nesa kũka nĩvuany’a maũndũ ala wĩkaa kwa kũtũneenea ndeto nthũku. O na eka ũu, nũleaa kũthokya ana-a-asa na ndaĩa; na ala mekwenda kũmathokya nũtataa kũmasiĩĩa na kũmalũngya kĩkundinĩ.
11 Mwendwa, ndũkaatĩĩe ngelekany’o ya maũndũ mathũku, ĩndĩ atĩĩa ngelekany’o ya maũndũ ala maseo. Ũla wĩkaa maũndũ maseo aumanĩte na Ngai. Ũla wĩkaa maũndũ mathũku ndaamwona Ngai. 12 Ndemetelio nĩwĩthĩĩtwe aikũsĩĩwa nesa nĩ andũ onthe, o na ũla w’o nũmũkũsĩĩaa. O naitũ nĩtumasya ũkũsĩ ĩũlũ wake, na nĩmwĩsĩ kana ũkũsĩ ũla tumasya nĩ wa w’o.
13 Nĩ na maũndũ maingĩ ma kũkũandĩkĩa, ĩndĩ ndikwenda kũendeea kũkũandĩkĩa na kalamu na ingi. 14 Ĩndĩ nĩ na wĩkwatyo wa kũkwona mĩtũkĩ, na tũkaneena ũthyũ kwa ũthyũ.
Ĩthĩwa na mũuo.
Anyanyae maku nĩmaũkethya. Ngethesye anyanyawa, kĩla ũmwe na ĩsyĩtwa yake.