Motalo

18 Nĩvo ĩndĩ Yeova waneenie na Alũni amwĩa: “We na ana maku vamwe na nyũmba ya aa-ĩthe maku mũkasũngĩa kwondũ wa ĩvĩtyo o na yĩva yĩkonanĩtye na vala vandũ vatheu, na we vamwe na ana maku mũkasũngĩa kwondũ wa ĩvĩtyo o na yĩva yĩkonanĩtye na wĩa wenyu wa ũthembi. 2 O na ĩngĩ, thengeesya ana-a-ĩthe maku ma mbaĩ ya Livai, mbaĩ ya ĩthe waku, nĩ kana makwatane naku na maiũthũkũma we vamwe na ana maku mbee wa ĩeema ya Ũkũsĩ. 3 Makeanĩasya ianda syoo kwondũ waku na kwondũ wa ĩeema yonthe. Ĩndĩ mayaĩlĩte o na vanini kũthengeea mĩio ya vala vandũ vatheu kana kĩthembeo, nĩ kana mũikakwʼe, we kana mo. 4 Makakwatana naku na maianĩsya ianda syoo ila ikonanĩtye na ĩeema ya kũmbanĩa na ũthũkũmi wʼonthe wa ĩeema, na vai mũndũ ũte mwĩtĩkĩlye* waĩlĩte kũmũthengeea. 5 No nginya mwĩanĩsye kĩanda kyenyu kĩla kĩkonanĩtye na vala vandũ vatheu na kĩthembeo, nĩ kana ndikewʼĩe andũ ma Isilaeli woo ĩngĩ. 6 Nyie mwene nĩnosete ana-a-ĩthe menyu, Alivai, kuma katĩ wa Aisilaeli na ngamũnenga mo ta mũthĩnzĩo. Nĩmanenganĩtwe kwa Yeova nĩ kana meanĩasye ũthũkũmi wa ĩeema ya kũmbanĩa. 7 We na ana maku ninyw’ĩ mũkeanĩasya ianda syenyu sya ũthembi ila ikonanĩtye na kĩthembeo na syĩndũ ila syĩ nthĩnĩ wa ũla vasia, na ninywʼĩ mũkeanĩasya ũthũkũmi ũsu. Nĩnĩmũnengete ũthũkũmi wa ũthembi ta mũthĩnzĩo, na mũndũ ũte mwĩtĩkĩlye* o na wĩva athengeea vo aĩlĩte kũawa.”

8 Na Yeova aneena ĩngĩ na Alũni, aimwĩa: “Nyie mwene nĩnĩnenganĩte mokonĩ maku mĩvothi ĩla ĩkaumawʼa kwondũ wakwa. We na ana maku nĩnamũnenga kĩlungu kĩna kya syĩndũ syonthe ntheu ila syaumw’a nĩ Aisilaeli na nĩkyo mũkaaĩawa ĩvinda yonthe. 9 Kĩĩ nĩkyo mũkaaĩawa kuma nthembonĩ ila ntheu vyũ ivĩvĩtwʼe na mwaki: nthembo syonthe ila meũthemba, o vamwe na nthembo syoo sya lĩu na nthembo syoo sya naĩ na nthembo syoo sya ĩvĩtyo ila mandetee. Kĩu nĩ kĩndũ kĩtheu vyũ kwondũ waku na ana maku. 10 Kĩla wanengwa ũkakĩĩsaa wĩ vandũ vatheu vyũ. Kĩla mũndũũme nũtonya kũkĩya. Kĩkeethĩawa kĩndũ kĩtheu kwaku. 11 O na ĩngĩ, nĩnaũnenga mĩthĩnzĩo ĩla makaumasya vamwe na nthembo syonthe sya kũvyũlwʼa sya Aisilaeli. Nĩnĩnenganĩte syĩndũ isu kwaku na kwa ana maku na kwa eĩtu maku na nĩsyo mũkaaĩawa ĩvinda yonthe. Mũndũ o na wĩva mũtheu nyũmbanĩ yaku nũtonya kũya syĩndũ isu.

12 “Nĩnaũnenga mauta onthe maseo vyũ na mbinyu yonthe nzaũ na nzeo vyũ na lĩu wa mbaa ngetha, ũsyao wa mbee ũla makanenganae kwondũ wa Yeova. 13 Ũsyao wa mbee kwĩwʼa wa kyonthe kya nthĩ yoo, ũla makamũetea Yeova, ũkeethĩawa wĩ waku. Mũndũ o na wĩva mũtheu nyũmbanĩ yaku nũtonya kũũya.

14 “Syĩndũ syonthe syanenganwe kwa Ngai* nthĩnĩ wa Isilaeli ikatwʼĩkaa syaku.

15 “Kĩla ĩkithathi ya* syĩndũ syonthe syĩ thayũ* mamũetee Yeova, yĩthĩwe nĩ mũndũ kana nĩ nyamũ, yĩkeethĩawa yaku. Ĩndĩ vate ndĩi ũkoovoasya ĩkithathi ya* mũndũ, na ĩkithathi ya* nyamũ ila mbuku o nayo nĩwaĩlĩte kwovosya. 16 No nginya ũmovosye na ndĩvi ya wovosyo mavikya mwei ũmwe kwambata, kwosana na thooa ũla ũtwʼĩtwe wa sekeli itano* sya vetha, ithimĩtwe kwosana na kĩthimo kya sekeli ya vala vandũ vatheu.* Isu nĩ ngela 20.* 17 No nzaũ ĩla ĩsyaĩtwe mbee, katũlũme kala kasyaĩtwe mbee, kana mbũi ĩla ĩsyaĩtwe mbee ũtaĩlĩte kwovosya. Isu nĩ ntheu. No nginya ũmizangĩsye nthakame yasyo kĩthembeonĩ, na ũituma mathunya masyo matoa ta nthembo ĩvĩvĩtw’e na mwaki yĩthĩwe mũuke ũmwendeesya* Yeova. 18 Na nyama sya nyamũ isu ikeethĩawa syenyu. Ikeethĩawa syenyu o ta nyama ya kĩthũi ya nthembo ya kũvyũlwʼa na o ta nyama ya kũũ kwa aũme. 19 Mũvothi wʼonthe mũtheu ũla Aisilaeli makamumĩsya Yeova, nĩnamũnenga, we vamwe na ana maku na eĩtu maku, na nĩwʼo mũkaaĩawa ĩvinda yonthe. Ũsu ũkeethĩawa ũtianĩo wa mũnyũ* wa ĩvinda yonthe mbee wa Yeova kwondũ waku na ũsyao waku.”

20 Na Yeova aendeea kũneena na Alũni, aimwĩa: “Ndũkethĩwa na ũtiĩwa nthĩ yoo, na ndũkethĩwa na ngʼũndũ katĩ woo. Ninyie ngʼũndũ yaku na ũtiĩwa waku katĩ wa Aisilaeli.

21 “Yu sisya, nĩnanenga ana ma Livai ilungu syonthe sya ĩkũmi nthĩnĩ wa Isilaeli ta ũtiĩwa nũndũ wa ũthũkũmi ũla meanĩasya, nawʼo nĩ ũthũkũmi ũla ũkonanĩtye na ĩeema ya kũmbanĩa. 22 Andũ ma Isilaeli mayaĩlĩte ĩngĩ kũthengeea ĩeema ya kũmbanĩa, nũndũ meeka ũu makeethĩwa meeka naĩ na makakwʼa. 23 Alivai nĩmo makeanĩasya ũthũkũmi ũla ũkonanĩtye na ĩeema ya kũmbanĩa, na nĩmo makasũngĩa kwondũ wa ĩvĩtyo yoo. Mayaĩlĩte kwĩyosea ũtiĩwa katĩ wa Aisilaeli na ũsu nĩ ũtwʼĩo wa ĩvinda yonthe nzyawanĩ syenyu syonthe. 24 Nũndũ nĩnĩnengete Alivai kĩlungu kya ĩkũmi kya mũvothi ũla andũ ma Isilaeli makamumĩasya Yeova kĩthĩwe ũtiĩwa woo. Nĩkyo kĩtumi nĩmatavĩtye atĩĩ: ‘Katĩ wa Aisilaeli, mayaĩlĩte kwosa ũtiĩwa.’”

25 Na ĩndĩ Yeova aneena na Mose, aimwĩa: 26 “Neena na Alivai, na ũimea atĩĩ: ‘Mũkanengawe kĩlungu kya ĩkũmi kĩla nĩmũnengete kuma kwa Aisilaeli ta ũtiĩwa wenyu, nenyu no nginya mumasye kĩlungu kya ĩkũmi kya kĩlungu kĩu kya ĩkũmi mũnengetwe ta mũvothi kwondũ wa Yeova. 27 Na kĩu mwanengane kĩkatalawa o ta mũvothi wa lĩu wa mbaa ngetha mumĩtye kĩvũĩonĩ kyenyu ene kana ũsyao wʼonthe umĩte iangĩonĩ syenyu ene sya mbinyu na mauta. 28 Ũu nĩwʼo o nenyu mũkamũnengae Yeova mũvothi kuma ilungunĩ sya ĩkũmi ila mũkakwataa kuma kwa Aisilaeli, na kuma ilungunĩ isu mũkamũnengae mũthembi Alũni mũvothi wenyu kwondũ wa Yeova. 29 No nginya mũmumĩasye Yeova mũvothi wa kĩla mũthemba, na mũvothi ũsu ũkeethĩawa wĩ kĩla kĩseo vyũ kuma mĩthĩnzĩonĩ yenyu yonthe ĩla mũnengetwe ta kĩndũ kĩtheu.’

30 “Na no nginya ũmatavye atĩĩ: ‘Yĩla mwaumya kĩla kĩseo vyũ kuma mĩthĩnzĩonĩ ĩsu, kĩu kĩkatalawa ta kyumĩtwʼe nĩ Alivai kuma ũsyaonĩ wa kĩvũĩo kyoo ene na ũsyaonĩ wa iangĩonĩ syoo ene sya mbinyu kana mauta. 31 Na mũkaĩsaa kĩla kyatiala vamwe na mĩsyĩ yenyu mwĩ vandũ o na va, nũndũ nĩ ndĩvi yenyu kwondũ wa ũthũkũmi wenyu ũla ũkonanĩtye na ĩeema ya kũmbanĩa. 32 Mũikatalwa ta mwĩkĩte naĩ ethĩwa nĩmwaumya kĩla kĩseo vyũ kuma mĩthĩnzĩonĩ ĩsu, na mũyaĩlĩte o na vanini kũvukya syĩndũ ntheu sya Aisilaeli, nũndũ mweeka ũu mũkakwʼa.’”